ភ្លើង​ឆេះ​​សម្លាប់​មនុស្ស ១៧នាក់នៅ​ភាគ​ខាង​ត្បូង​​ប្រទេស​ឥណ្ឌា

យោងតាមការចេញផ្សាយរបស់ទីភ្នាក់ងារព័ត៌មាន​ AP កាលថ្ងៃទី១៨ខែឧសភា មនុស្សយ៉ាងហោចណាស់ ១៧នាក់​បានស្លាប់ និងជាច្រើននាក់ទៀតរងរបួសនៅក្នុងហេតុការណ៍អគ្គិភ័យឆាបឆេះអគារមួយនៅជិតវិមានប្រវត្តិសាស្ត្រ Charminar ភាគខាងត្បូងទីក្រុង Hyderabad ប្រទេសឥណ្ឌា ។

យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា អគ្គិភ័យនេះបានឆេះ​អគារកម្ពស់៣ជាន់មួយដែលមានហាង​លក់​គ្រឿង​​អលង្ការ​នៅ​ជាន់​ផ្ទាល់​ដី និង​លំនៅឋាន​ខាង​លើកាលពីថ្ងៃអាទិត្យ។ មនុស្សជាច្រើននាក់ត្រូវបានគេប្រទះ​ឃើញសន្លប់ដោយសារផ្លូវតូចចង្អៀតមិនអាចរត់គេចខ្លួនបាន​ទាន់​ពេល​និង​រង​ផ្សែង​ពុល​ ហើយត្រូវបានបញ្ជូនទៅកាន់មន្ទីរពេទ្យនានា។ ក្រោយមកទើបមានការបញ្ជាក់ថា មានមនុស្ស១៧នាក់​បានបាត់បង់ជីវិត។

បើតាមរដ្ឋមន្ត្រីសហព័ន្ធ និងមេដឹកនាំគណបក្ស Bharatiya Janata លោក G Kishan Reddy បានប្រាប់អ្នក​យកព័ត៌មាននៅកន្លែងកើតហេតុថា «ឧបទ្ទវហេតុនេះបានកើតឡើងដោយសារតែបញ្ហាចរន្តអគ្កិសនី»។ ទោះយ៉ាងភ្លើងត្រូវបានគ្រប់គ្រងបាននៅថ្ងៃដដែលនោះ។

ពាន់ព័ន្ធហេតុការណ៍នេះនាយករដ្ឋមន្ត្រីឥណ្ឌាលោក Narendra Modi បានប្រកាសអំពីសំណងលុយសម្រាប់គ្រួសារជនរងគ្រោះ ហើយបានចូលរួមរំលែកទុក្ខនិងសោកស្តាយយ៉ាងខ្លាំងចំពោះការបាត់បង់ជីវិតដ៏ច្រើននេះផងដែរ។

គួរបញ្ជាក់ថាបញ្ហាគ្រោះអគ្កិភ័យគឺជារឿងធម្មតានៅក្នុងប្រទេសឥណ្ឌា ដោយសារតែអ្នកសាងសង់ជារឿយៗបំពានបទដ្ឋានសុវត្ថិភាព បូករួមជាមួយអ្នករស់នៅខ្វះការយល់ដឹងពីបញ្ហាសុវត្ថិភាព៕

អត្ថបទ៖ ប៊ុន សុភាព