ខេត្តប៉ែកឦសានប្រទេសថៃ ត្រូវដាច់ភ្លើងនិងបិទសាលារៀន ដោយសារទឹកជំនន់ធ្ងន់ធ្ងរ

ស្រុកមួយចំនួននៅក្នុងខេត្ត Maha Sarakham ភាគឦសានប្រទេសថៃ កំពុងជួបប្រទះទឹកជំនន់យ៉ាងធ្ងន់ធ្ងរ ឈានដល់ការបិទសាលារៀន ខណៈក៏មានការដាច់ចរន្តអគ្គិសនីផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានឧតុនិយមថៃ បានចេញការព្រមានឲ្យពលរដ្ឋនៅ Maha Sarakham ប្រុងប្រយ័ត្នព្រោះទឹកជំនន់មានជម្រៅជ្រៅ ខណៈយានយន្តមួយចំនួនក៏ត្រូវជាប់គាំងនៅក្នុងតាមដងផ្លូវផងដែរ។

យោងតាមសេចក្តីរាយការណ៍របស់ The Nation នៅថ្ងៃព្រហស្បតិ៍ទី១២ខែមិថុនាឆ្នាំ២០២៥ គ្រោះធម្មជាតិនៅ Maha Sarakham គឺបង្កឡើងដោយឥទ្ធិពលនៃព្យុះត្រូពិក ដែលកំពុងវាយប្រហារទូទាំងប្រទេស។

មិនមែនតែ Maha Sarakham, ព្យុះនេះក៏បង្កផលប៉ះពាល់ដល់ខេត្តផ្សេងទៀតផងដែរដូចជា Loei, Nong Khai, Bueng Kan, Nong Bua Lamphu, Udon Thani, Sakon Nakhon, Nakhon Phanom, Chaiyaphum, Khon Kaen, Maha Sarakham, Kalasin, Roi Et, Yasothon, Mukdahan, Nakhon Ratchasima, Amnat Charoen, Sisaket និង Ubon Ratchathani។ 

សូមជម្រាបជាថ្មី ដោយសារស្ថានភាពអាកាសធាតុឆ្នាំនេះប្រហែលធ្ងន់ធ្ងរ ប្រទេសថៃ កំពុងបារម្ភថា ភ្លៀងធ្លាក់ដូចហែកមេឃនាពេលថ្មីៗ កំពុងទាញស្ថានការណ៍ឲ្យដូចទៅនឹងឆ្នាំ២០១១ ដែលជាឆ្នាំកើតទឹកជំនន់ធំ បង្កទុក្ខលំបាកដល់ប្រជាជន។

ឆ្នាំនោះ ប្រទេសថៃជួបទឹកធំដោយសារឥទ្ធិពលព្យុះភ្លៀងមូសុង បណ្តាលឲ្យមនុស្សស្លាប់ជាង៨០០នាក់ និងប៉ះពាល់ពលរដ្ឋជាង១៣លាននាក់ និងឈានដល់ការប្រកាសអាសន្ននៅខេត្តចំនួន៦០។

ក្រៅពីសម្លាប់មនុស្ស, ទឹកជំនន់ឆ្នាំ២០១១ គឺស្ថិតក្នុងចំណោមគ្រោះមហន្តរាយធម្មជាតិដែលបង្កការខាតបង់ទឹកប្រាក់ច្រើនបំផុតលើពិភពលោកនាពេលនោះ ដោយបំផ្លាញសេដ្ឋកិច្ចថៃ ក្នុងទំហំទឹកប្រាក់ ៤៥ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ ថៃ ត្រៀមខ្លួនទទួលព្យុះមួយទៀត នៅប៉ុន្មានថ្ងៃខាងមុខ