ថៃ ត្រៀមខ្លួនទទួលព្យុះមួយទៀត នៅប៉ុន្មានថ្ងៃខាងមុខ

ប្រទេសថៃ កំពុងត្រៀមខ្លួនទទួលព្យុះត្រូពិកមួយ ដែលនឹងវាយប្រហារនៅប៉ុន្មានថ្ងៃខាងមុខ ខណៈបច្ចុប្បន្ន ព្យុះនេះកំពុងស្ថិតនៅសមុទ្រចិនខាងត្បូងនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post នៅថ្ងៃអង្គារទី១០ខែមិថុនាឆ្នាំ២០២៥, ពេលនេះការិយាល័យធនធានទឹកជាតិ (ONWR) កំពុងជូនដំណឹងដល់ភ្នាក់ងាររដ្ឋាភិបាលទាំងអស់ ត្រូវយកចិត្តទុកដាក់តាមដានស្ថានភាព និងត្រៀមចាត់វិធានការបន្ទាន់ ដើម្បីដោះស្រាយជាមួយភ្លៀងធ្លាក់ខ្លាំងនិងទឹកជំនន់រហ័ស ព្រមទាំងគ្រោះធម្មជាតិនានា។ 

ដោយសារតែឥទ្ធិពលនៃព្យុះនេះ នាយកដ្ឋានឧតុនិយមថៃ បានចេញការព្រមានឲ្យពលរដ្ឋប្រុងប្រយ័ត្នភ្លៀងធ្លាក់ខ្លាំងចាប់ពីដើមសប្តាហ៍នេះទៅ ជាពិសេសតំបន់នៅប៉ែកខាងកើតនិងនិរតី។

មុនការមកដល់របស់ព្យុះនេះ ប្រទេសថៃ មានកង្វល់ចិត្តរួចទៅហើយថា ភ្លៀងធ្លាក់ដូចហែកមេឃនាពេលថ្មីៗ កំពុងទាញស្ថានការណ៍ឲ្យដូចទៅនឹងឆ្នាំ២០១១ ដែលជាឆ្នាំកើតទឹកជំនន់ធំ បង្កទុក្ខលំបាកដល់ប្រជាជន។

កាលពីឆ្នាំ២០១១ ប្រទេសថៃជួបទឹកធំដោយសារឥទ្ធិពលព្យុះភ្លៀងមូសុង បណ្តាលឲ្យមនុស្សស្លាប់ជាង៨០០នាក់ និងប៉ះពាល់ពលរដ្ឋជាង១៣លាននាក់ និងឈានដល់ការប្រកាសអាសន្ននៅខេត្តចំនួន៦០។ 

ក្រៅពីសម្លាប់មនុស្ស, ទឹកជំនន់ឆ្នាំ២០១១ គឺស្ថិតក្នុងចំណោមគ្រោះមហន្តរាយធម្មជាតិដែលបង្កការខាតបង់ទឹកប្រាក់ច្រើនបំផុតលើពិភពលោកនាពេលនោះ ដោយបំផ្លាញសេដ្ឋកិច្ចថៃ ក្នុងទំហំទឹកប្រាក់ ៤៥ពាន់លានដុល្លារអាមេរិក។

យ៉ាងណាឆ្នាំនេះ បាតុភូតព្យុះភ្លៀងមូសុងបានវាយប្រហារប្រទេសថៃសាជាថ្មី ដោយទិន្នន័យគិតចាប់ពីថ្ងៃទី១-១៤ខែឧសភាបង្ហាញថា ទីក្រុងបាងកក មានភ្លៀងធ្លាក់ឈានដល់កម្រិត១៨៨.៥មិល្លីម៉ែត្រ  ពោលគឺកើនឡើង ៩៥% បើធៀបនឹងកម្រិតទឹកភ្លៀងជាមធ្យមរយៈពេល៣០ឆ្នាំ៕

អត្ថបទ៖ សុខ សុវណ្ណ

ចុចអាន៖ ព្យុះមូសុង បង្កើនកម្លាំងវាយប្រហារ ថៃ បង្កហានិភ័យគ្រោះទឹកជំនន់ រួមទាំងបាងកក ​