ព័ត៌មានអន្ដរជាតិ

ចិនប្រកាសធ្វើព្យុហយាត្រាយោធាដ៏ធំ រម្លឹកដល់ការបញ្ចប់សង្រ្គាមលោកលើកទី២

បានផុស

៤១ វិនាទី មុន

នៅ

ថ្ងៃអង្គារ ២៤ មិថុនា ២០២៥

ដោយ

Chheang

ប្រទេសចិន នឹងធ្វើព្យុហយាត្រាយោធាទ្រង់ទ្រាយធំនៅទីលាន Tiananmen នៅថ្ងៃទី៣ខែកញ្ញា ដើម្បីរម្លឹកខួបលើកទី៨០នៃការចុះចាញ់របស់ជប៉ុន ក្នុងការបញ្ចប់សង្គ្រាមលោកលើកទី២។

ក្បួនដង្ហែយោធាចិនឆ្នាំ២០១៩ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតី ស៊ី ជីនពីង ដែលមានតួនាទីជាប្រធានគណៈកម្មាការយោធាមជ្ឈិម គ្រោងនឹងចុះត្រួតពិនិត្យកងទ័ព និងថ្លែងសុន្ទរកថា ក្នុងអំឡុងពេលព្រឹត្តិការណ៍នេះ ដែលមានការចូលរួមពីកងទ័ពថ្មើរជើង ក្បួនរថយន្តយោធា និងជើងហោះហើរលើអាកាសទ្រង់ទ្រាយធំ ព្រមទាំងការតាំងបង្ហាញអាវុធទំនើបៗ ដូចជា មីស៊ីលល្បឿនលឿនជាងសំឡេង ប្រព័ន្ធគ្មានមនុស្សបើក ប្រព័ន្ធការពារជាតិ និង«សមត្ថភាពប្រយុទ្ធប្រភេទថ្មី»ផ្សេងៗទៀត។

វិមានក្រឹមឡាំង បាននិយាយថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន នឹងចូលរួម ខណៈមេដឹកនាំពិភពលោកផ្សេងទៀត ក៏ត្រូវបានគេរំពឹងថានឹងមានវត្តមានផងដែរនៅក្នុងពិធីរម្លឹកខួបមួយនេះ។

សូមជម្រាបថា កាលពីឆ្នាំ២០១៥ចំខួបលើកទី៧០នៃការអបអរបញ្ចប់សង្គ្រាមលោកលើកទី២ ចិនបានប្រារព្ធពិធីដង្ហែក្បួនដ៏ធំមួយ ជាមួយនឹងកាំភ្លើងធំ ៧០ដើម ហើយកងទ័ពរាប់ពាន់នាក់បានដើរព្យុហយាត្រាយ៉ាងតឹងរ៉ឹងឆ្លងកាត់ទីលាន Tiananmen។ រថក្រោះ និងមីស៊ីល ត្រូវបានដាក់ដង្ហែតាមពីក្រោយ ខណៈយន្តហោះជិត ២០០គ្រឿងធ្វើការហោះហើរលើផ្ទៃមេឃពណ៌ដ៏ខៀវស្រងាត់។

កាលណោះ អាជ្ញាធរចិនបានប្រមូលផ្តុំអ្នកទស្សនារាប់សែននាក់ បិទផ្លូវនានានៅទូទាំងកណ្តាលទីក្រុង បិទព្រលានយន្តហោះ និងកាត់បន្ថយរោងចក្រ-យានយន្តដែលបញ្ចេញផ្សែង ដើម្បីធានាឲ្យបាននូវផ្ទៃមេឃដែលមានពណ៌ខៀវល្អសម្រាប់ប្រារព្ធពិធី៕