ក្រោយជោគជ័យនៅអ៊ីរ៉ង់ ត្រាំ ហាក់ចង់ប្តូរឈ្មោះក្រសួងការពារជាតិ ទៅ «ក្រសួងសង្គ្រាម» វិញ

តាមការចុះផ្សាយរបស់ USA Today នៅថ្ងៃព្រហស្បតិ៍ទី២៦ខែមិថុនាឆ្នាំ២០២៥, ប្រធានាធិបតីអាមេរិក ដូណាល់ ត្រាំ ហាក់ដូចជាចង់ប្តូរឈ្មោះក្រសួងការពារជាតិ ទៅជាក្រសួងសង្គ្រាម ដូចកាលពីអតីតវិញ បន្ទាប់ពីអះអាងទទួលជោគជ័យយ៉ាងត្រចះត្រចង់ លើការវាយប្រហារកម្ទេចរោងចក្រនុយក្លេអ៊ែរអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយបញ្ចប់កិច្ចប្រជុំកំពូលណាតូ នៅទីក្រុងឡាអេប្រទេសហូឡង់ លោកត្រាំនិយាយថា «រដ្ឋមន្ត្រីការពារជាតិ Pete Hegseth គួរតែហៅគាត់ថាជា រដ្ឋមន្ត្រីសង្គ្រាម។ ឋានៈជារដ្ឋមន្ត្រីការពារជាតិនេះ ពីមុនធ្លាប់ត្រូវគេហៅជារដ្ឋមន្ត្រីសង្គ្រាម យើងប្រហែលជាហៅបែបនេះ២-៣សប្តាហ៍ ព្រោះយើងមានអារម្មណ៍ដូចជាអ្នកចម្បាំង»។

លោក ត្រាំនិយាយថា ឈ្មោះរបស់ក្រសួងសង្គ្រាម ក៏អាចមើលឃើញនៅលើជញ្ជាំងនៃអគារការិយាល័យប្រតិបត្តិ Eisenhower ជាប់នឹងសេតវិមានផងដែរ។

សូមជម្រាបថា ក្រសួងសង្គ្រាមត្រូវបានបង្កើតឡើងនៅថ្ងៃទី៧ខែសីហាឆ្នាំ១៧៨៩ ក្រោមការដឹកនាំរបស់ប្រធានាធិបតី George Washington។ ក្រសួងនេះមានតួនាទីទទួលខុសត្រូវលើកិច្ចការយោធាទាំងអស់ រួមទាំងកងទ័ពជើងគោកផងដែរ។

ដំបូងឡើយ ក្រសួងនេះថែមទាំងទទួលខុសត្រូវលើកិច្ចការកងទ័ពជើងទឹកទៀតផង ប៉ុន្តែលុះដល់ឆ្នាំ១៧៩៨ ទើបផ្តាច់ចេញវិញ ក្រោយការបង្កើតក្រសួងកងទ័ពជើងទឹក។

ក្រសួងសង្គ្រាមធ្វើការអស់រយៈពេល១៥៨ឆ្នាំ រហូតដល់ថ្ងៃទី១៨ខែកញ្ញាឆ្នាំ១៩៤៧ ហើយក្រោយចប់សង្គ្រាមលោកលើកទី២ សហរដ្ឋអាមេរិកបានរៀបចំរចនាសម្ព័ន្ធយោធារបស់ខ្លួនឡើងវិញ ដោយក្រសួងសង្គ្រាមត្រូវបានបំបែកទៅជា ក្រសួងកងទ័ពជើងគោក និងក្រសួងកងទ័ពអាកាស។

ក្រសួងទាំងពីរនេះ រួមជាមួយក្រសួងកងទ័ពជើងទឹក ត្រូវបានដាក់បញ្ចូលគ្នាទៅក្រោមស្ថាប័នថ្មីមួយដែលមានឈ្មោះថា គ្រឹះស្ថានយោធាជាតិ លុះក្រោយមកត្រូវបានប្តូរឈ្មោះទៅជា ក្រសួងការពារជាតិ នៅឆ្នាំ១៩៤៩៕

អត្ថបទ៖ សុខ សុវណ្ណ

ចុចអាន៖ វាយអ៊ីរ៉ង់រួច ត្រាំប្រកាសថា អាមេរិកនិងអ៊ីរ៉ង់ នឹងពិភាក្សាគ្នារឿងនុយក្លេអ៊ែរ សប្តាហ៍ក្រោយ