ព័ត៌មានអន្ដរជាតិ

អ៊ីស្រាអែលព្រមានថា មីស៊ីលអ៊ីរ៉ង់អាចផ្លោងដល់អឺរ៉ុប និងឆ្នេរខាងកើតរបស់អាមេរិក

បានផុស

១ year មុន

នៅ

ថ្ងៃសុក្រ ៤ កក្កដា ២០២៥

ដោយ

Chheang

សារព័ត៌មាន The Media Line ដែលបានដកស្រង់ប្រភពពីមន្ត្រីយោធាអ៊ីស្រាអែល បានចុះផ្សាយកាលពីថ្ងៃទី៣ខែកក្កដាថា ការពង្រីកឃ្លាំងមីស៊ីលបាលិស្ទិករបស់អ៊ីរ៉ង់ឥឡូវនេះកំពុងបង្កការគំរាមកំហែងមិនត្រឹមតែចំពោះអ៊ីស្រាអែលប៉ុណ្ណោះទេ ប៉ុន្តែចំពោះរដ្ឋធានីនានារបស់អឺរ៉ុប និងឆ្នេរសមុទ្រភាគខាងកើតរបស់សហរដ្ឋអាមេរិកផងដែរ។

មីស៊ីលដែលដាក់តាំងបង្ហាញនៅទីក្រុងតេហេរ៉ង់កាលពីឆ្នាំ២០២៣ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីយោធាអ៊ីស្រាអែល បានបញ្ជាក់ថា បច្ចុប្បន្នឃ្លាំងអាវុធអ៊ីរ៉ង់ មានមីស៊ីលលើសពី ២ ០០០គ្រាប់ និងប្រព័ន្ធផ្លោងគ្រាប់ប្រហែល ៤០០គ្រឿង។ ប្រភពដដែល បន្តថា អ៊ីស្រាអែលបានកម្ទេចប្រព័ន្ធផ្លោងមីស៊ីលអស់ជាងពាក់កណ្ដាលហើយ តែទោះជាយ៉ាងនេះក្តី សព្វាវុធដែលនៅសេសសល់ត្រូវបានចាត់ទុកថាជាការគំរាមកំហែងយ៉ាងធ្ងន់ធ្ងរដដែល ខណៈអ៊ីរ៉ង់កំពុងមានគម្រោងផលិតមីស៊ីលថែមទៀតឲ្យបានដល់ចន្លោះពី ៨ ០០០គ្រាប់ ទៅដល់ ២០ ០០០គ្រាប់ក្នុងរយៈពេល២-៣ឆ្នាំខាងមុខ។

មន្ត្រីអ៊ីស្រាអែល បានរៀបរាប់ថា «មីស៊ីលដែលអ៊ីរ៉ង់កំពុងអភិវឌ្ឍអាចបាញ់ដល់អឺរ៉ុប ហើយពួកគេមានផែនការសម្រាប់ការអភិវឌ្ឍបន្ថែមទៀតដែលអាចឲ្យពួកគេអាចវាយប្រហារដល់ទឹកដីសហរដ្ឋអាមេរិក»។

ការព្រមាននេះ កើតមានតែប៉ុន្មានថ្ងៃបន្ទាប់ពីបទឈប់បាញ់គ្នារវាងអ៊ីស្រាអែល និងអ៊ីរ៉ង់ចូលជាធរមានកាលពីថ្ងៃទី២៤មិថុនា ក្រោយការវាយប្រហារឆ្លងព្រំដែនយ៉ាងខ្លាំងក្លាអស់រយៈពេល១២ថ្ងៃ។ អ៊ីស្រាអែល និយាយថា កម្មវិធីមីស៊ីល មហិច្ឆតានុយក្លេអ៊ែរ និងការគាំទ្ររបស់អ៊ីរ៉ង់សម្រាប់ក្រុមសកម្មប្រយុទ្ធក្នុងតំបន់ គឺជាការគំរាមកំហែងដ៏ធំចំពោះសន្តិសុខជាតិ និងពិភពលោក៕

ដោយ៖ ឈាង

ចុចអាន៖ អ៊ីរ៉ង់បើកដែនអាកាសឡើងវិញ បន្ទាប់ពីសង្គ្រាម១២ថ្ងៃជាមួយអ៊ីស្រាអែល