ព័ត៌មានអន្ដរជាតិ

ស្លាប់កុមារ៦នាក់ដែលចាំយកទឹកនៅហ្គាហ្សា ព្រោះមីស៊ីលរបស់អ៊ីស្រាអែល

បានផុស

៣៥ នាទីutes មុន

នៅ

ថ្ងៃចន្ទ ១៤ កក្កដា ២០២៥

ដោយ

Chheang

កាលពីថ្ងៃទី១៣ខែកក្កដា ការវាយប្រហារដោយមីស៊ីលរបស់អ៊ីស្រាអែលនៅក្នុងជុំរុំជនភៀសខ្លួន Nuseirat នៃតំបន់ហ្គាហ្សា បានសម្លាប់កុមារយ៉ាងតិច ៦នាក់ ក្នុងចំណោមជនស៊ីវិល ៨នាក់ និងរបួស ១៧នាក់ទៀត ខណៈដែលពួកគេតម្រង់ជួរចាំយកទឹកស្អាតប្រើប្រាស់។

ក្មេងៗកំពុងកាន់ធុងទឹកនៅហ្គាហ្សា (រូបថត៖ UNICEF)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងការពារអ៊ីស្រាអែល (IDF) បាននិយាយថា មីស៊ីលនេះគឺសំដៅទៅលើក្រុមសកម្មប្រយុទ្ធជីហាតអ៊ីស្លាមប៉ាឡេស្ទីន ប៉ុន្តែដោយសារតែ«ដំណើរការខុសបច្ចេកទេស» វាបានធ្លាក់ខុសគោលដៅរាប់សិបម៉ែត្រ ទៅចំកន្លែងចែកចាយទឹកទៅវិញ។ IDF បានសម្តែងការសោកស្តាយចំពោះការបាត់បង់ជីវិតជនស៊ីវិល និងប្រាប់ថា ខ្លួននឹងត្រួតពិនិត្យផ្ទៃក្នុងអំពីឧប្បត្តិហេតុនេះ។

បញ្ហាទឹកស្អាតនៅហ្គាហ្សា កំពុងក្លាយជាក្ដីកង្វល់យ៉ាងធ្ងន់ធ្ងរក្នុងរយៈពេលប៉ុន្មានសប្ដាហ៍ថ្មីៗនេះ ដោយសារតែកង្វះខាតប្រេងឥន្ធនៈបានធ្វើឲ្យកន្លែងផលិតទឹកស្អាតជាច្រើនត្រូវបានបិទ ដែលជាហេតុប្រជាជនត្រូវតម្រង់ជួរគ្នារង់ចាំយកទឹកប្រើពីមជ្ឈមណ្ឌលតូចៗមួយចំនួន។

នៅថ្ងៃដដែល ការវាយប្រហាររបស់អ៊ីស្រាអែលមួយផ្សេងទៀត បានកំណត់គោលដៅលើផ្សារមួយកន្លែងក្នុងតំបន់ហ្គាហ្សា ដោយបានសម្លាប់មនុស្ស ១២នាក់។ យោងតាមក្រសួងសុខាភិបាលរបស់ហ្គាហ្សា ចំនួនអ្នកស្លាប់សរុបឥឡូវនេះលើសពី ៥៨ ០០០នាក់ ចាប់តាំងពីសង្រ្គាមបានចាប់ផ្តើមនៅក្នុងខែតុលាឆ្នាំ២០២៣ ដោយជាងពាក់កណ្តាលគឺជាស្ត្រី និងកុមារ។

ចំពេលស្ថានភាពកាន់តែយ៉ាប់យ៉ឺន ការចរចាបទឈប់បាញ់នៅកាតាបានជាប់គាំង។ អ៊ីស្រាអែលនៅតែប្រកាន់ខ្ជាប់ចំពោះការទាមទារស្នូលរបស់ខ្លួន ដូចជា ការដោះលែងចំណាប់ខ្មាំង និងការរុះរើសមត្ថភាពយោធារបស់ក្រុមហាម៉ាស៕

ដោយ៖ ឈាង