ព័ត៌មានអន្ដរជាតិ

ក្នុងពេល២២ខែ មនុស្សជាង៦ម៉ឺននាក់ស្លាប់ និង ជាង១៥ម៉ឺននាក់របួសនៅហ្គាហ្សា

បានផុស

១១ ខែ មុន

នៅ

ថ្ងៃអាទិត្យ ១០ សីហា ២០២៥

ដោយ

រយៈពេល២២នៃការវាយប្រហាររបស់អ៊ីស្រាអែលចូលតំបន់ហ្គាហ្សា អ៊ីស្រាអែលបានសម្លាប់ប្រជាជនប៉ាឡេស្ទីនជាង៦០០០០ម៉ឺននាក់ ខណៈអ្នករបួសកើនដល់ជាង១៥ម៉ឺនាក់ និង បង្កើតឲ្យមានការអត់ឃ្លានដ៏ខ្លាំងបំផុតក្នុងតំបន់ ដោយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់ញ៉ាហ៊ូ មិនខ្វល់ពីការអំពាវនាវជាអន្តរជាតិ។

ប្រជាជនប៉ាឡេស្ទីនកាន់ទុក្ខអ្នកស្លាប់នៅហ្គាហ្សា។ REUTERS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយថា យ៉ាងហោចណាស់មនុស្ស ៣៩នាក់បានស្លាប់ និងជិត៥០០នាក់បានរងរបួសនៅក្នុងប្រតិបត្តិការយោធាអ៊ីស្រាអែលនៅតំបន់ហ្គាហ្សាស្ទ្រីបក្នុង១ថ្ងៃកន្លងទៅនេះ ដែលជាសោកនាដកម្មថ្មីទៀតលើប្រជាជននៅតំបន់ហ្គាហ្សា។

សេចក្តីថ្លែងការណ៍បានសរសេរថា៖‍«ក្នុងរយៈពេល ២៤ម៉ោងកន្លងមកនេះ សាកសពចំនួន ៣៩រួមទាំងសាកសពមួយត្រូវបានដកចេញពីគំនរបាក់បែក ក៏ដូចជាអ្នករបួសចំនួន ៤៩១នាក់ ត្រូវបាននាំយកទៅកាន់មន្ទីរពេទ្យនៅទូទាំងតំបន់ហ្គាហ្សា»។

ក្រសួងសុខាភិបាលប្រចាំតំបន់ហ្គាហ្សា បាននិយាយថា ចំនួនអ្នកស្លាប់នៅហ្គាហ្សាបានកើនឡើងដល់ ៦១៣៦៩នាក់ ចាប់តាំងពីខែតុលាឆ្នាំ ២០២៣ ហើយមនុស្សជាង ១៥២០០០នាក់ នាក់បានរងរបួស។ ប្រជាជននៅតំបន់ហ្គាហ្សាទាំងមូល ជាង២លាននាក់ បានរងការខ្វះខាតអាហារយ៉ាងខ្លាំង ហើយវាបានក្លាយជាតំបន់ដែលមានទុរក្ភិក្សបំផុតនាពេលបច្ចុប្បន្ននេះ

ក្រសួងសុខាភិបាលប៉ាឡេស្ទីន ក៏បាននិយាយផងដែរថា ក្នុងចំណោមអ្នកស្លាប់ទាំង៣៩នាក់នោះ មានការស្លាប់ដោយសារការអត់ឃ្លានចំនួន១១ នាក់ត្រូវបានកត់ត្រានៅហ្គាហ្សាក្នុងថ្ងៃកន្លងមកនេះ។

ការវាយប្រហារនៅរបស់យោធាអ៊ីស្រាអែលនៅតំបន់ហ្គាហ្សាកាលថ្ងៃទី២១ខែកក្កដា។ REUTERS

ភាពតានតឹងបានកើនឡើងនៅមជ្ឈិមបូព៌ានៅថ្ងៃទី ៧ខែតុលាឆ្នាំ ២០២៣ នៅពេលដែលពួកសកម្មប្រយុទ្ធមកពីចលនាហាម៉ាសប៉ាឡេស្ទីនដែលមានមូលដ្ឋាននៅហ្គាហ្សាស្ទ្រីប បានបើកការវាយប្រហារដ៏គួរឱ្យភ្ញាក់ផ្អើលមួយលើអ៊ីស្រាអែលដោយបានសម្លាប់អ្នករស់នៅតាមព្រំដែនប្រមាណ១២០០នាក់ និងចាប់ចំណាប់ខ្មាំង ជាង២៤០នាក់។

ជាការឆ្លើយតប អ៊ីស្រាអែលបានផ្តួចផ្តើមប្រតិបត្តិការយោធានៅក្នុងតំបន់ក្របខណ្ឌប៉ាឡេស្ទីន ដើម្បីរុះរើរចនាសម្ព័ន្ធយោធា និងនយោបាយរបស់ក្រុមហាម៉ាស និងរំដោះចំណាប់ខ្មាំងទាំងអស់។ នៅក្នុងខែមីនា យោធាអ៊ីស្រាអែលបានបន្តប្រតិបត្តិការយោធានៅតំបន់ហ្គាហ្សា ដោយបានធ្វើការវាយលុកយ៉ាងខ្លាំងទៅលើតំបន់ជុំវិញ ដែលជាការបញ្ចប់កិច្ចព្រមព្រៀងបទឈប់បាញ់ដែលបានឈានដល់ក្នុងខែមករា។

ចលនាប្រដាប់អាវុធហាម៉ាសប៉ាឡេស្ទីន និងអ៊ីស្រាអែលបានបរាជ័យក្នុងការធ្វើកិច្ចព្រមព្រៀងបទឈប់បាញ់ជាច្រើនលើកនៃកិច្ចចរចាដែលសម្របសម្រួលដោយប្រទេសកាតា អេហ្ស៊ីប និងសហរដ្ឋអាមេរិក៕

រ៉ាន់ រើយ