UN៖ កូរ៉េខាងជើង​ប្រហារជីវិត​មនុស្ស​ដែល​ចែកចាយ​ភាពយន្ត​បរទេស

របាយការណ៍ថ្មីរបស់អង្គការសហប្រជាជាតិនិយាយថា ប្រទេសកូរ៉េខាងជើងបានបង្កើនការរឹតបន្តឹងរបស់ខ្លួនក្នុងរយៈពេលមួយទសវត្សរ៍កន្លងមកនេះ ដោយបានប្រហារជីវិតមនុស្សចំពោះការចែកចាយកម្មវិធីទូរទស្សន៍បរទេស រួមទាំងរឿងភាគរបស់កូរ៉េខាងត្បូងផងដែរ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៣ខែកញ្ញា។

ផ្អែកលើការសម្ភាសន៍ជាមួយអ្នករត់គេចខ្លួនពីកូរ៉េខាងជើងជាង ៣០០នាក់ របាយការណ៍នេះបានលើកឡើងពីការបង្កើនការឃ្លាំមើល ការបង្រ្កាបយ៉ាងតឹងរ៉ឹង និងការប្រើប្រាស់ច្បាប់ដែលកំណត់ទោសប្រហារជីវិតសម្រាប់បទល្មើសវប្បធម៌។

អង្គការសហប្រជាជាតិបាននិយាយថា ប្រទេសកូរ៉េខាងជើងនៅតែប្រើប្រាស់ពលកម្មដោយបង្ខំ ហើយសូម្បីតែកុមារក៏ត្រូវធ្វើការងារដ៏គ្រោះថ្នាក់ក្នុងអណ្តូងរ៉ែ និងសំណង់។ គ្រួសារ​ក្រីក្រ​ទទួល​រង​ផល​ប៉ះពាល់​ខ្លាំង​បំផុត ដោយសារ​ពួកគេ​មិន​អាច​ទទួល​សំណូក​ដើម្បី​គេច​ពី​ការងារ​នេះ។ អង្គការសហប្រជាជាតិបានព្រមានថាទង្វើទាំងនេះអាចចាត់ទុកថាជាឧក្រិដ្ឋកម្មប្រឆាំងមនុស្សជាតិ។

គួរបញ្ជាក់ថារបាយការណ៍នេះបានធ្វើឡើងបន្ទាប់ពីការស៊ើបអង្កេតរបស់អង្គការសហប្រជាជាតិឆ្នាំ ២០១៤ដែលបានកត់ត្រាអំពីការប្រហារជីវិត ការធ្វើទារុណកម្ម និងការឃុំខ្លួនយ៉ាងច្រើន។ ប្រធានសិទ្ធិមនុស្សរបស់អង្គការសហប្រជាជាតិ លោក Volker Turk បានព្រមានថា លុះត្រាតែកូរ៉េខាងជើងផ្លាស់ប្តូរច្បាប់ថ្មី បើពុំដូច្នេះទេប្រជាជនរបស់ខ្លួននឹងប្រឈមមុខនឹងការឈឺចាប់ និងការភ័យខ្លាចកាន់តែខ្លាំង៕

អត្ថបទ៖ ប៊ុន សុភាព