មនុស្សរាប់ម៉ឺននាក់ចេញ​បាតុកម្ម​នៅហ្វីលីពីន ជុំវិញរឿងអាស្រូវពុករលួយកម្មវិធីគ្រប់គ្រងទឹកជំនន់

ប្រជាជនហ្វីលីពីនរាប់ម៉ឺននាក់ បានដើរដង្ហែក្នុងទីក្រុងម៉ានីល និងទីក្រុងផ្សេងទៀតកាលពីថ្ងៃអាទិត្យ​ទី​២១​ខែ​កញ្ញា​ឆ្នាំ​២០២៥ ដើម្បីទាមទារ​ឲ្យ​មានការទទួលខុសត្រូវចំពោះអ្វីដែលពួកគេនិយាយថាជារឿងអាស្រូវពុករលួយដ៏ធំបំផុតរបស់ប្រទេសក្នុងរយៈពេលជាច្រើនឆ្នាំ​មក​នេះ ពាក់ព័ន្ធនឹងគម្រោងគ្រប់គ្រងគ្រោះ​ទឹកជំនន់ក្លែងក្លាយ​ដែល​មាន​តម្លៃ​រាប់ពាន់លានដុល្លារ។

ក្រុមអ្នកតវ៉ារួមមានសិស្ស និស្សិត ក្រុមសាសនា តារាល្បីៗ និងប្រជាពលរដ្ឋមកពីគ្រប់មជ្ឈដ្ឋាននយោបាយ។ ពួកគេបានចោទប្រកាន់តំណាងរាស្រ្ត និងមន្ត្រីរដ្ឋាភិបាលថាបានកឹបកេង​ប្រាក់យ៉ាងច្រើនពីកិច្ចសន្យាសាងសង់ ខណៈដែលគម្រោងការពារទឹកជំនន់ដែលមានបំណងការពារសហគមន៍ត្រូវបានទុកចោលមិនទាន់បញ្ចប់។

រដ្ឋាភិបាលហ្វីលីពីន បានប៉ាន់ប្រមាណការខាតបង់យ៉ាងហោចណាស់ ១,៤៨​ពាន់​លាន​ផោន​ក្នុងរយៈពេលពីរឆ្នាំចុងក្រោយនេះ ខណៈដែលក្រុម​សកម្ម​ជនបរិស្ថាន Greenpeace បាននិយាយថា ច្រើនជាង ១៣​ពាន់លានផោនត្រូវបាន​លួច​បង្វែរចេញពីកម្មវិធីទាក់ទងនឹងអាកាសធាតុក្នុងឆ្នាំ​២០២៣​តែឯង។ ការលេចធ្លាយ​រឿង​អាស្រូវ​នេះ បានកើតឡើងនៅក្នុងខែកក្កដា ខណៈដែលភ្លៀងមូសុង និងខ្យល់ព្យុះបានវាយលុកប្រទេស​ហ្វីលីពីន។

លោក Cardinal Pablo Virgilio David ប្រធានសន្និសិទគណៈសង្ឃកាតូលិកនៃប្រទេសហ្វីលីពីន បានមានប្រសាសន៍ថា «គោលបំណងរបស់យើងគឺមិនមែនដើម្បីអស្ថិរភាពទេ ប៉ុន្តែដើម្បីពង្រឹងលទ្ធិប្រជាធិបតេយ្យរបស់យើង» ដោយ​​​ប្រជាជនហ្វីលីពីនទាមទារ​ឲ្យ​មានតម្លាភាព និងយុត្តិធម៌។

ប៉ូលិសបាន​ឲ្យ​ដឹង​ថា ការតវ៉ាភាគច្រើនមានលក្ខណៈ​សន្តិភាព ទោះបីជាមនុស្ស ៧២​នាក់​ក្នុង​នោះ​មាន​អនីតិជនចំនួន ២០​នាក់ត្រូវបានចាប់ខ្លួនក៏​ដោយ។ យ៉ាងហោចណាស់មន្ត្រី ៣៩​នាក់បានរងរបួស។

មន្ត្រីក្រុងម៉ានីល បានប្រាប់​ថា មនុស្សប្រហែល ៥០ ០០០​នាក់បានចូលរួមការជួបជុំ​នា​ពេលព្រឹកនៅក្នុងឧទ្យានក្រុង ខណៈដែលមនុស្សរាប់ពាន់នាក់ទៀតបានប្រមូលផ្តុំគ្នានៅពេលក្រោយនៅឯផ្លូវ​ EDSA ដែលធ្លាប់​ជាកន្លែងតវ៉ាជាប្រវត្តិសាស្ត្រនៃការផ្គួល​រំលំ​​របប​ផ្ដាច់ការ។

លោក Manuel Dela Cerna អាយុ ៥៨​ឆ្នាំ ជាបាតុករម្នាក់ បាននិយាយថា «ពួកគេកំពុងខ្ជះខ្ជាយ​ប្រាក់របស់ប្រជាជន ខណៈពេលដែលប្រជាពលរដ្ឋរងគ្រោះដោយទឹកជំនន់ ផ្ទះរបស់ពួកគេត្រូវបានទឹកបំផ្លិចបំផ្លាញ​ ខណៈដែលក្រុមមន្ត្រីជិះយន្តហោះឯកជន រស់នៅក្នុងវិមាន»។

រឿង​អាស្រូវ​នេះ​ បាន​ធ្វើ​ឲ្យ​​មាន​ការ​ធ្លាក់​ចុះ​ផ្នែក​នយោបាយ​កាន់​តែ​ខ្លាំង​នៅ​ក្នុង​ប្រទេស​ហ្វីលីពីន។ នៅក្នុងសវនាការតាមទូរទស្សន៍របស់ព្រឹទ្ធសភា ម្ចាស់ក្រុមហ៊ុនសំណង់មួយបានចោទប្រកាន់តំណាងរាស្រ្ត និងមន្ត្រីជិត ៣០​នាក់ពីបទទទួលសំណូក។ លោក​ប្រធានាធិបតី Ferdinand Marcos Jr. បានទទួលស្គាល់ពី​បញ្ហានេះ ដោយបានហៅអំពើពុករលួយ​​ថា «គួរ​ឲ្យ​រន្ធត់» និងបង្កើតស្ថាប័នឯករាជ្យមួយដើម្បីស៊ើបអង្កេត។

លោក Marcos បានជំរុញ​ឲ្យក្រុមបាតុកររក្សាសន្តិភាព ប៉ុន្តែបាននិយាយថា លោកមិនបានបន្ទោសពួកគេ«សម្បី​តែ​បន្តិច» ចំពោះកំហឹងរបស់ពួកគេនោះទេ។ លោក​ថែម​​​ទាំង​និយាយ​ថា «ប្រសិនបើខ្ញុំមិនមែនជាប្រធានាធិបតីទេ ខ្ញុំប្រហែលជានៅតាមផ្លូវជាមួយពួកគេ។ ពិតណាស់ ពួកគេខឹង។ ពួកគេខឹង ខ្ញុំ​ក៏​ខឹង។ យើងទាំងអស់គ្នាគួរតែខឹង ព្រោះអ្វីដែលកំពុងកើតឡើងគឺមិនត្រឹមត្រូវ»។

សូម​ជម្រាប​ថា បាតុករភាគច្រើនមិន​បាន​ទាមទារ​ឲ្យ​លោក Marcos ​លាលែងពីតំណែងនោះ​ទេ ដោយ​ពួកគេបានអំពាវនាវ​ឲ្យ​មានការទទួលខុសត្រូវពេញលេញ និងកំណែទម្រង់យូរអង្វែង ដើម្បីទប់ស្កាត់អំពើពុករលួយនៅគ្រប់កម្រិតនៃរដ្ឋាភិបាល៕

ដោយ៖ ឈាង