ត្រាំ ពន្លះ UN ខ្លាំងៗថា គ្មានជួយបញ្ចប់សង្គ្រាមណាមួយបានសោះ រួមទាំងជម្លោះ កម្ពុជា-ថៃ

ក្នុងសុន្ទរកថានៅឯមហាសន្និបាតអង្គការសហប្រជាជាតិលើកទី៨០នាទីក្រុងញូវយ៉ក ប្រធានាធិបតីអាមេរិក ដូណាល់ ត្រាំ បានពន្លះស្ថាប័នពិភពលោកមួយនេះថា គ្មានជួយដោះស្រាយសង្គ្រាមអ្វីបានទេ ក្នុងនោះក៏មានជម្លោះកម្ពុជា-ថៃដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងកាលពីថ្ងៃអង្គារទី២៣ខែកញ្ញាឆ្នាំ២០២៥ ប្រមុខសេតវិមាននិយាយថា លោកទេដែលបានបញ្ចប់សង្គ្រាមដល់ទៅ៧។ វាអាក្រក់មើលណាស់ដែលលោកត្រូវធ្វើរឿងទាំងនេះ ជំនួស UN។

តាមការផ្សាយរបស់ New York Times, លោកត្រាំរិះគន់ UN ថា មិនបានព្យាយាមជួយបញ្ចប់សង្គ្រាមណាមួយឡើយ ហើយលោកចោទជាសំណួរថា៖ «តើអង្គការសហប្រជាជាតិមានគោលបំណងអ្វី? ស្ថាប័ន​ទាំង​អស់ចេញ​លិខិត​ប្រើ​ពាក្យ​ខ្លាំង​ៗ ប៉ុន្តែ​មិន​ដែល​ធ្វើ​តាម​លិខិត​នោះ​ឡើយ»។

ក្នុងជម្លោះទាំង៧ដែលលោកត្រាំអះអាងថាបានបញ្ចប់ មានដូចជា៖ កម្ពុជា-ថៃ, អាមេនី-អាស៊ែរបៃហ្សង់, សាធារណរដ្ឋប្រជាធិបតេយ្យកុងហ្គោ-រវ៉ាន់ដា, ឥណ្ឌា-ប៉ាគីស្ថាន, អ៊ីស្រាអែល-អ៊ីរ៉ង់, អេហ្ស៊ីប-អេត្យូពី និង កូសូវ៉ូ-ស៊ែប៊ី។

ចំពោះជម្លោះកម្ពុជា-ថៃ, រដ្ឋបាលលោកត្រាំ បានប្រាប់មេដឹកនាំប្រទេសទាំងពីរថា លោកនឹងបញ្ឈប់កិច្ចចរចាពាណិជ្ជកម្ម លុះត្រាតែពួកគេយល់ព្រមបទឈប់បាញ់។

ទីបំផុត ក្រុមមន្ត្រីនៃប្រទេសទាំងពីរ បានជួបប្រជុំគ្នានៅប្រទេសម៉ាឡេស៊ី សម្រាប់កិច្ចពិភាក្សាដែលរៀបចំដោយមន្ត្រីម៉ាឡេស៊ីនិងអាមេរិក ហើយឈានដល់កិច្ចព្រមព្រៀងមួយដើម្បីផ្អាកអរិភាព។

យ៉ាងណាក្តី មកទល់ពេលនេះ ភាគីថៃនៅតែរំលោភបទឈប់បាញ់ ហើយបន្តរករឿងនិងឈ្លានពានកម្ពុជាម្តងហើយម្តងទៀត មិនឈប់៕

អត្ថបទ៖ សុខ សុវណ្ណ

ចុចអាន៖ ត្រាំ ថា លោកជួយបញ្ចប់សង្រ្គាម «កម្ពុជា-អាមេនី»