វិមានក្រឹមឡាំង ប្រកាស​គាំទ្រ​ផែនការ​សន្តិភាព​ហ្គាហ្សា​របស់​លោក ត្រាំ

វិមានក្រឹមឡាំង បានសម្តែងក្តីសង្ឃឹមថា ផែនការសន្តិភាព​តំបន់​ហ្គាហ្សា​​ថ្មីដែលស្នើឡើងដោយ​ប្រធានាធិបតីអាមេរិក ដូណាល់ ត្រាំ នឹងត្រូវបានអនុវត្ត។ សេចក្តីថ្លែងការណ៍​កាល​ពី​ថ្ងៃ​ទី​៣០​ខែ​កញ្ញា​របស់អ្នកនាំពាក្យវិមានក្រឹមឡាំងលោក Dmitry Peskov ត្រូវបានធ្វើឡើងបន្ទាប់ពីលោក ត្រាំ បានបង្ហាញសំណើ​២០​ចំណុច​នៅទីក្រុងវ៉ាស៊ីនតោនជាមួយនាយករដ្ឋមន្រ្តីអ៊ីស្រាអែលលោក បេនចាមីន ណេតាន់យ៉ាហ៊ូ។

លោក Peskov បានបញ្ជាក់ថា រុស្ស៊ី «តែងតែគាំទ្រ និងស្វាគមន៍រាល់កិច្ចខិតខំប្រឹងប្រែងរបស់ ត្រាំ» ដើម្បីបញ្ឈប់ជម្លោះនៅតំបន់ហ្គាហ្សា។ ទីក្រុងមូស្គូសង្ឃឹមថា គំនិតផ្តួចផ្តើមថ្មីនេះនឹងនាំ​ឲ្យ​មានបទឈប់បាញ់ប្រកបដោយនិរន្តរភាព ការដោះលែងចំណាប់ខ្មាំង និងអ្នកជាប់ឃុំ និងបើក​ឲ្យ​មាន​ជំនួយមនុស្សធម៌។

បន្ថែម​ពី​នេះ រុស្ស៊ីបានបញ្ជាក់ថា ខ្លួននៅតែបន្តប្រកាន់ខ្ជាប់នូវដំណោះស្រាយរដ្ឋពីរដែលត្រូវបានទទួលស្គាល់ជាអន្តរជាតិ ដោយអំពាវនាវ​ឲ្យ​មានរដ្ឋប៉ាឡេស្ទីនឯករាជ្យមួយជាមួយអ៊ីស្រាអែល។ តំណាងអចិន្ត្រៃយ៍របស់អង្គការសហប្រជាជាតិរបស់រុស្ស៊ីលោក Vassily Nebenzia ក៏បានបញ្ជាក់ជំហរនេះឡើងវិញដោយហៅវាថាជា «ផ្លូវតែមួយគត់ដែលអាចធ្វើទៅបាន» ទៅកាន់ដំណោះស្រាយយូរអង្វែង។

ទីក្រុងមូស្គូបានកត់សម្គាល់ថា ខ្លួនមិនមែនជាអ្នកចូលរួមក្នុងការ​បង្កើត​ផែនការសន្តិភាពនោះទេ ហើយក៏​មិនបានទទួល​បាន​ការ​ជូន​ដំណឹង​ណាមួយពីទីក្រុងវ៉ាស៊ីនតោនអំពីវាដែរ។ យ៉ាង​ណា​មិញ​ រុស្ស៊ីបានសង្កត់ធ្ងន់ថា​នឹង​រក្សាទំនាក់ទំនងជាមួយគ្រប់ភាគីជម្លោះ ហើយត្រៀមខ្លួនជាស្រេចដើម្បីដើរតួជាអ្នកសម្របសម្រួលប្រសិនបើចាំបាច់។

សូម​ជម្រាប​ថា ​លោក ត្រាំ បាន​ប្រកាស​​​ផ្តល់ពេលឲ្យក្រុមហាម៉ាស​ពី​៣​ទៅ​៤​ថ្ងៃ ដើម្បីឆ្លើយតបទៅនឹងផែនការ២០​ចំណុច​ស្ដី​ពី​សន្តិភាព​តំបន់ហ្គាហ្សា ដោយព្រមានពី «ការបញ្ចប់ដ៏សោកសៅ» បើក្រុមនេះបដិសេធ។

សំណើដែលបានលាតត្រដាងកាលពីថ្ងៃចន្ទ អំពាវនាវ​ឲ្យ​មានបទឈប់បាញ់ ការដោះលែងចំណាប់ខ្មាំងអ៊ីស្រាអែលក្នុងរយៈពេល​៧២​ម៉ោង ការរំសាយអាវុធរបស់ពួកហាម៉ាស និងការដកខ្លួនបន្តិចម្តងៗរបស់អ៊ីស្រាអែលចេញពីហ្គាហ្សា។

លោក ត្រាំ បាននិយាយនៅឯសេតវិមានថា «ប្រទេសអារ៉ាប់ទាំងអស់​បាន​យល់ព្រម។ ប្រទេសមូស្លីមបានយល់ព្រម​ទាំង​អស់។ អ៊ីស្រាអែល​បាន​យល់ស្រប​រួចរាល់ហើយ។ យើងគ្រាន់តែរង់ចាំក្រុមហាម៉ាសប៉ុណ្ណោះ»។

នាយករដ្ឋមន្ត្រីអ៊ីស្រាអែលលោក ណេតាន់យ៉ាហ៊ូ បានគាំទ្រផែនការនេះ ដោយហៅវាថា«សម្រេចបាននូវគោលដៅសង្រ្គាមរបស់យើង»។ លោក​បាន​ព្រមាន​ថា ប្រសិន​បើ​ក្រុម​ហាម៉ាស​បដិសេធ​វា «អ៊ីស្រាអែល​នឹង​បញ្ចប់​ការងារ​ដោយ​ខ្លួន​ឯង»។

ក្រុមហាម៉ាស ដែល​មិន​បាន​ចូល​រួម​ក្នុង​ការ​ចរចា ​បាន​និយាយ​ថា ​ខ្លួន​កំពុង​ពិនិត្យ​មើល​ផែនការ​នេះ។ យ៉ាង​ណា​មិញ យោង​តាម​ការ​ចុះផ្សាយ​របស់​ទីភ្នាក់ងារ​ព័ត៌មាន​ AFP ប្រភព​ពី​​មន្ត្រីប៉ាឡេស្ទីន​បានពណ៌នាសំណើនេះថា «មានភាពលម្អៀង​ទាំងស្រុង​លើ​អ៊ីស្រាអែល» ហើយបានចោទប្រកាន់​ថាបានដកហូតសិទ្ធិស្របច្បាប់របស់ប៉ាឡេស្ទីន។

ជម្លោះបានផ្ទុះឡើងនៅថ្ងៃទី​៧​​ខែតុលា​ឆ្នាំ​២០២៣ នៅពេលដែលក្រុមហាម៉ាសបានសម្លាប់មនុស្ស​ជាង ១ ២០០​​នាក់នៅក្នុងប្រទេសអ៊ីស្រាអែល និងបានចាប់ចំណាប់ខ្មាំង ២៥១​នាក់។ ការឆ្លើយតប អ៊ីស្រាអែលបានសម្លាប់ជនជាតិប៉ាឡេស្ទីនជាង ៦៦ ០០០​នាក់​​នៅ​តំបន់​ហ្គាហ្សា៕

ដោយ៖ ឈាង

ចុចអាន៖ ត្រាំ ដាក់ចេញផែនការសន្តិភាព២០ចំណុច បញ្ចប់សង្គ្រាម អ៊ីស្រាអែល នៅ​ហ្គាហ្សា