វីតាមីន ៨ ប្រភេទ ល្អសម្រាប់សុខភាពក្រចក

ដោយសារក្រចកលូតលាស់ត្រូវការសារធាតុចិញ្ចឹមពីក្នុងខ្លួនទើបលូតលាស់បានល្អ ដូច្នេះសុខភាពក្រចកបង្ហាញពីសុខភាពរាងកាយរបស់អ្នកដូចគ្នា ។ ខាងក្រោមនេះជា វីតាមីន ៨ ប្រភេទ ល្អបំផុតសម្រាប់សុខភាពក្រចករបស់លោកអ្នក ៖ 

១. ប្យ៊ូទីន

ប្យ៊ូទីនជួយទ្រទ្រង់ការលូតលាស់កោសិកាឲ្យមានសុខភាពល្អ និងជួយក្នុងការបំប្លែងសារជាតិអាស៊ីតអាមីណូដែលបង្កើតប្រូតេអ៊ីនសំខាន់សម្រាប់ការលូតលាស់របស់ក្រចក ។ អ្នកអាចរក ប្យ៊ូទីន បាននៅក្នុងសាច់សរីរាង្គដូចជា ថ្លើម ស៊ុតលឿង  ផលិតផលទឹកដោះគោ ដំបែ ត្រីសាម៉ុង ផ្លែបឺរ ដំឡូងជ្វា គ្រាប់ធញ្ញជាតិ និងផ្កាខាត់ណាខៀវ ។

២. វីតាមីន B 

វីតាមីន B12 ដើរតួនាទីយ៉ាងសំខាន់ក្នុងការស្រូបយកជាតិដែក ក៏ដូចជាការវិវត្តនៃកោសិកាឈាមក្រហមផងដែរ ។ ទាំងជាតិដែក និង B12 គឺចាំបាច់សម្រាប់រក្សាក្រចកឱ្យរឹងមាំ និងមានសុខភាពល្អ ។ ចំណែកឯកង្វះវីតាមីន B12 អាចបណ្តាលឱ្យក្រចកប្រែពណ៌ខៀវ ពណ៌ខ្មៅ ជាមួយនឹងស្នាមអុចៗតាមបណ្ដោយវែងៗ និងសារធាតុពណ៌ស្រអាប់ៗ ។

៣. ជាតិដែក 

ជាតិដែក​បង្កើត​ចំណុច​កណ្តាល​នៃ​កោសិកា​ឈាម​ក្រហម ដែល​ដឹក​អុកស៊ីហ្សែន​ទៅ​កាន់​សរីរាង្គ​ និង​គ្រប់​កោសិកា​ក្នុង​ខ្លួន​របស់​អ្នក ។ រាងកាយយើងស្រូបយកជាតិដែកពី សាច់គោ សាច់មាន់ ត្រី និងស៊ុតជាដើម ។

៤. ម៉ាញ៉េស្យូម

ម៉ាញ៉េស្យូមគឺជាសារធាតុរ៉ែដែលពាក់ព័ន្ធនឹងប្រតិកម្មគីមីជាង ៣០០ នៅក្នុងរាងកាយរបស់អ្នក រួមទាំងការសំយោគប្រូតេអ៊ីនចាំបាច់សម្រាប់ការលូតលាស់ក្រចក ។ ប្រភពដ៏សម្បូរបែបនៃម៉ាញ៉េស្យូមមានដូចជា គ្រាប់ធញ្ញជាតិ ស្រូវសាលី បន្លែស្លឹកបៃតងចាស់អាល់ម៉ុន គ្រាប់ស្វាយចន្ទី សណ្តែកដី និងសណ្តែកខ្មៅ ។

៥. ប្រូតេអ៉ីន

ក្រចក​បង្កើត​ឡើង​ពី​ប្រូតេអ៊ីន​​ដែល​ហៅ​ថា Keratin ហើយផ្តល់ឱ្យក្រចកនូវភាពរឹងមាំ ។ លើសពីនេះ Keratin អាចការពារក្រចកពីការខូចខាត និងភាពតានតឹងទៀតផង ។ ជាក់ស្ដែង Keratin ដែលអ្នកឃើញគឺស្លាប់ហើយព្រោះ ក្រចក​​បង្កើត​ឡើង​ដោយ​កោសិកា​ងាប់ ចេញពីរាង​កាយ​របស់​អ្នក​ខណៈ​កោសិកា​ថ្មី​រុញ​ឡើង​ពី​ក្រោមមកលើ ។ 

៦. អាស៉ីតខ្លាញ់អូមេហ្គាបី

អាស៉ីតខ្លាញ់អូមេហ្គាបីជួយឱ្យក្រចករបស់អ្នករលោង និងមានសំណើម ។ អ្នកអាចរកវាបាននៅក្នុងត្រីដែលមានជាតិខ្លាញ់ដូចជា ត្រីសាម៉ុង ត្រី mackerel ត្រីធូណា និងត្រីសាឌីន ។ សូមបញ្ជាក់ដែរថា គ្រាប់ធញ្ញជាតិ និងសណ្ដែកមួយចំនួនក៏មានអាស៉ីតខ្លាញ់អូមេហ្គាបីដែរ ។

៧. វីតាមីន C

វីតាមីន C ជម្រុងឲ្យមានការបង្កើតខូឡាជែនដែលសំខាន់សម្រាប់ស្បែក សក់ និងក្រចក ។ បន្លែផ្លែឈើដែលសម្បូរវីតាមីនមានច្រើនណាស់រួមមាន ក្រូច គីវី បន្លែបៃតង ប៉េងប៉ោះ និងបន្លែផ្លែឈើជាច្រើនទៀត ។ 

៨. ស័ង្កសី

ស័ង្កសីសំខាន់ណាស់សម្រាប់ប្រតិកម្មជាច្រើននៅក្នុងខ្លួនរបស់អ្នក រួមទាំងការលូតលាស់ និងការបែងចែកកោសិកា ។  ដូច្នេះហើយ ការផ្គត់ផ្គង់ស័ង្កសីចាំបាច់ដើម្បីលូតលាស់ក្រចកឲ្យមានសុខភាពល្អ ។ ប្រភពសម្បូរស័ង្កសីមាន សាច់គោ បសុបក្សី ត្រី ស៊ុត សណ្តែកសៀង សណ្តែកសៀង សណ្តែកខ្មៅ និងគ្រាប់ធញ្ញជាតិដទៃទៀត ៕

ប្រែសម្រួលដោយ ៖ វារី

ចុចអាន ៖ ក្រចកជើងឡើងលឿងក្រាស់ គួរដោះស្រាយ បែបណា?

ចុចអាន ៖ មានផ្កាក្រចក កុំគិតថាមិនបញ្ហា នេះជាសញ្ញាគ្រោះថ្នាក់ដល់សុខភាពធ្ងន់ធ្ងរវិញទេ