ក្រសួងសុខាភិបាល ពិនិត្យការលើកទិសដៅបន្តរបស់ការិយាល័យប្រយុទ្ធនឹងជំងឺមិនឆ្លង

វេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល បានដឹកនាំកិច្ចប្រជុំដោយ ស្តីពី វឌ្ឍនភាព និងការលើកទិសដៅបន្តរបស់ការិយាល័យប្រយុទ្ធនឹងជំងឺមិនឆ្លង នៃនាយកដ្ឋានការពារសុខភាព ដើម្បីលើកកម្ពស់ការផ្តល់សេវាសុខាភិបាលលើការការពារ និងថែទាំជំងឺមិនឆ្លង ឱ្យកាន់តែមានប្រសិទ្ធភាពបន្ថែមទៀត។

កិច្ចប្រជុំ នៅទីស្តីការក្រសួងសុខាភិបាល នាថ្ងៃទី២ ខែកក្កដា ឆ្នាំ២០២៤ នេះ រៀបចំឡើងដោយទទួលបានការណែនាំពី សាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងមានគោលបំណងសំខាន់ៗរួមមាន៖ ១. ការពិនិត្យលើវឌ្ឍនភាព និងលើកទិសដៅបន្តសកម្មភាពការងារ ២. បញ្ហាប្រឈម និងសំណូមពរនានា និង ៣. ពិភាក្សារកដំណោះស្រាយ ដើម្បីជម្រុញដល់ដំណើរការអនុវត្តការងារ។

ក្នុងឱកាសនោះដែរ រដ្ឋលេខាធិការបាន ផ្តល់អនុសាសន៍ជំរុញលើកទឹកចិត្ត បន្តការងារអនុវត្តរួមមាន៖ ១. យកចិត្តទុកដាក់លើការងារ ពង្រឹងបច្ចេកទេសការងារទទួលខុសត្រូវរបស់អង្គភាព ២. ពិនិត្យមើលការបែងចែកតួនាទីភារកិច្ច ៣. ពង្រឹងវិន័យក្នុងអង្គភាព រក្សាសាមគ្គីភាពផ្ទៃក្នុង និងរក្សាឱ្យបាននូវសេចក្តីថ្លៃថ្នូរ ៤. យកចិត្តទុកដាក់លើការធ្វើផែនការថវិកាជាតិប្រចាំឆ្នាំ និងធ្វើសហប្រតិបត្តិការឱ្យបានល្អជាមួយដៃគូរអភិវឌ្ឍ គិតទៅលើតម្រូវការថវិកាលើសកម្មភាពជាក់ស្តែង ត្រូវធ្វើជារៀងរាល់ដើមឆ្នាំ និង ៥. ត្រូវរៀបចំការងារចុះអប់រំតាមសហគមន៍ និង តាមដានលទ្ធផលការងារ ក្រោយពីបានបណ្តុះបណ្តាល ការងារការពារ និងថែទាំ ជំងឺទឹកនោមផ្អែម លើសសម្ពាធឈាម មហារីកមាត់ស្បូន និងសុដន់។

គូរបញ្ជាក់ថា កិច្ចប្រជុំនេះមានការអញ្ជើញចូលរួមពី វេជ្ជបណ្ឌិត ហូយ សេរីវឌ្ឍនៈ អគ្គនាយរងបច្ចេកទេស នៃក្រសួងសុខាភិបាល វេជ្ជបណ្ឌិត កុល ហេរ៉ូ ប្រធាននាយកដ្ឋាន អនុប្រធាននាយកដ្ឋាន និង ថ្នាក់ដឹកនាំការិយាល័យ និងមន្ត្រី នៃការិយាល័យប្រយុទ្ធនឹងជំងឺមិនឆ្លង៕