អ្នកនាំពាក្យការងារបន្តអំពាវនាវពលករខ្មែរធ្វើការនៅថៃ ឲ្យវិលត្រឡប់មកស្រុកវិញ​​

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់ពលករខ្មែរដែលកំពុងធ្វើការនៅប្រទេសថៃ ឲ្យវិលត្រឡប់មកស្រុកកំណើតវិញ ដើម្បីចៀសវាងការប្រឈមមុខនឹងផ្លូវច្បាប់។

ការអំពាវនាវនេះបានធ្វើឡើងបន្ទាប់ពីនាយករដ្ឋមន្ត្រីថៃ លោក Anutin Charnvirakul បានប្រកាសថា មិនបន្តសុពលភាពប័ណ្ណការងារឱ្យពលករខ្មែរជិត១សែននាក់ ដែលកំពុងធ្វើការងារនៅប្រទេសថៃ ព្រោះបារម្ភពីការបង្កអសន្តិសុខ និងឧក្រិដ្ឋកម្មឆ្លងដែន បន្ទាប់ពីកងទ័ពថៃ២នាក់បានជាន់មីនបណ្តាលឱ្យដាច់ជើង និងរងរបួស កាលពីថ្ងៃទី១០វិច្ឆិកា ម្សិលមិញមក។

លោក Anutin បានបញ្ជាឱ្យពន្យារពេលការចុះហត្ថលេខាលើសេចក្តីព្រាងរបស់ក្រសួងមហាផ្ទៃ ដែលអនុញ្ញាតឱ្យពលករខ្មែរស្នាក់នៅថៃក្នុងករណីពិសេសតាមសេចក្តីសម្រេចរបស់គណៈរដ្ឋមន្ត្រីកាលពីថ្ងៃទី១៩ ខែសីហា ឆ្នាំ២០២៥ ។ ខណៈបច្ចុប្បន្ន មានពលករខ្មែរធ្វើការនៅថៃជិត១សែននាក់ ដែលមានប័ណ្ណការងារផុតសុពលភាពតាំងពីខែកុម្ភៈ ឆ្នាំ២០២៥ ហើយត្រូវបានរដ្ឋាភិបាលថៃរបស់លោកស្រី ផេថងថាន ស៊ីណាវ៉ាត់ អនុញ្ញាតឱ្យធ្វើការនៅថៃបន្តក្នុងករណីពិសេស ដោយសារថៃបិទព្រំដែនជាឯកតោភាគី។

លោក ស៊ុន មេសា បានមានប្រសាសន៍នៅព្រឹកថ្ងៃទី១១វិច្ឆិកានេះថា ក្រសួងការងារបន្តគាំពារដល់ពលករខ្មែរកំពុងធ្វើការនៅប្រទេសថៃ និងសូមអំពាវនាវដល់ពលករខ្មែរវិលត្រឡប់មកស្រុកកំណើតវិញ ព្រោះនៅក្នុងស្រុកមានការងារធ្វើគ្រប់គ្រាន់ និងទទួលបានអត្ថប្រយោជន៍ជាច្រើន ពិសេសគាំពារសង្គមពី ប.ស.ស.។

ជាមួយគ្នានេះដែរ លោក ស៊ុន មេសា បានណែនាំដល់ពលករដែលកំពុងធ្វើការនៅប្រទេសថៃបើមានបញ្ហាអ្វីមួយសូមធ្វើការទំនាក់ទំនងជាមួយអនុព័ន្ធការងារប្រចាំប្រទេសថៃដើម្បីជួយសម្រួលអន្តរាគមន៍ និងដោះស្រាយឱ្យបានទាន់ពេលវេលា។

គួរបញ្ជាក់ថា កាលពីថ្ងៃទី១៩ ខែសីហា ឆ្នាំ២០២៥ គណៈរដ្ឋមន្ត្រីថៃបានសម្រេចឱ្យពលករបរទេសសញ្ជាតិខ្មែរ ឡាវ មីយ៉ាន់ម៉ា និងវៀតណាម ដែលមានប័ណ្ណការងារផុតសុពលភាពអាចស្នាក់នៅ និងធ្វើការនៅថៃបន្តរយៈពេល១ឆ្នាំ ដើម្បីកាត់បន្ថយផលប៉ះពាល់ដោយសារខ្វះខាតកម្លាំងពលកម្ម ប៉ុន្តែសេចក្តីសម្រេចរបស់គណៈរដ្ឋមន្ត្រីត្រូវចុះហត្ថលេខាដោយរដ្ឋមន្ត្រីក្រសួងមហាផ្ទៃមុនពេលចូលជាធរមាន៕

អត្ថបទ៖ សំអឿន