ព័ត៌មានជាតិ

ក្រសួងសុខាភិបាលកំពុងពិនិត្យករណីពេទ្យដកថ្នាំពីអ្នកជំងឺវិញព្រោះខ្វះលុយ៥០០រៀល

បានផុស

៧ ខែ មុន

នៅ

ថ្ងៃចន្ទ ១ ធ្នូ ២០២៥

ដោយ

អ្នកនាំពាក្យក្រសួងសុខាភិបាលលោកវេជ្ជបណ្ឌិត លី សូវ៉ាន់ បានឱ្យដឹងថាក្រសួងកំពុងពិនិត្យលើករណីដែលដែលពេទ្យដកថ្នាំពីអ្នកជំងឺវិញព្រោះតែលុយ៥០០រៀលនិងយកវីដេអូមកមកផ្សព្វផ្សាយលើបណ្ដាញសង្គមដែលកំពុងធ្វើឱ្យមហាជនមានប្រតិកម្មហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយទៅនឹងសំណួររបស់កម្ពុជាថ្មីនៅថ្ងៃទី១ ខែធ្នូ ឆ្នាំ២០២៥នេះ លោកវេជ្ជបណ្ឌិត លី សូវ៉ាន់ មិនទាន់មានយោបល់យ៉ាងណាចំពោះករណីដែលពេទ្យដកថ្នាំពីអ្នកជំងឺវិញព្រោះខ្វះលុយ៥០០រៀលទេ តែថាករណីនេះលោកបានបញ្ជូនទៅថ្នាក់លើដើម្បីពិនិត្យហើយ។

កាលពីចុងសប្ដាហ៍មុនមហាជនជាបន្តបន្ទាប់បានប្រតិកម្មចំពោះវីដេអូមួយដែលត្រូវបានបង្ហោះដោយគ្រូពេទ្យស្រីម្នាក់ដែលបានស្ដីបន្ទោសលើអ្នកជំងឺដែលសុខចិត្តដើរចេញវិញបន្ទាប់ពីសុំឱ្យពេទ្យចុះថ្លៃថ្នាំ៥០០រៀលតែពេទ្យមិនចុះ។

និយាយក្នុងវីដេអូនោះ ស្ដ្រីម្នាក់ដែលទំនងជាគ្រូពេទ្យដែលលក់ថ្នាំបានបរិយាយថា បុរសម្នាក់បានពិគ្រោះជំងឺរមាស់ក្បាលរបស់គាត់ដែលពេទ្យតម្រូវឱ្យយកសាប៊ូទៅកក់ ឬផ្សំថ្នាំ។ ពេលនោះអ្នកជំងឺបានលើកឡើងថាលោកសុំផ្សំថ្នាំលេប ខណៈថ្នាំផ្សំនោះអស់ ១៣៥០០រៀល តែអ្នកជំងឺបានសុំត្រឹម ១ ៣០០០រៀល តែពេទ្យមិនព្រម។

ក្នុងវីដេអូនោះពេទ្យបាននិយាយថា៖ «ហើយប្រភេទបែបពូហ្នឹងមានប៉ុន្មាននាក់ទៀតដែលទិញគេឱ្យគេផ្សំថ្នាំច្រកថង់ឱ្យហើយកាត់ឱ្យហើយគាត់អត់យក? អ៊ីចឹងបងៗដែលមានបើក Pharmacy មើលមុខគាត់លេងៗទុកទៅ ក្រែងល៎គាត់ទៅដល់ Pharmacy បងៗផ្សំថ្នាំហើយអត់យកអ៊ីចឹង សួរយើងឡើងច្រើន ឱ្យគេឈរចាំគ្រប់គ្នាអីអ៊ីចឹងណា! ហើយសម្រាប់អ្នកទិញថ្នាំទៅតាម Pharmacy គេផ្សេងៗ កុំតថ្លៃគេអី។ គេអ្នកលក់ថ្នាំគេមានក្រមសីលធម៌វិជ្ជាជីវៈគេណាស់! គេមានសុជីវធម៌ណាស់កុំតថ្លៃដូចផ្សារត្រី»។

ប្រធានសមាគមគ្រូពេទ្យគុណធម៌កម្ពុជាលោកវេជ្ជបណ្ឌិត អ៊ូច វុទ្ធី មានប្រសាសន៍ថាជារឿងដែលសោកស្ដាយដែលគ្រាន់តែលុយ៥០០រៀលបែរជាមិនលើកលែងហើយគ្រូពេទ្យយកវីដេអូទៅបង្ហោះបង្កើតឱ្យមានការរើសអើងលើអ្នកជំងឺដូច្នេះ។ លោកថាវាជារឿងដែលខុសក្រមសីលធម៌គ្រូពេទ្យធ្ងន់ធ្ងរ។

លោកថា៖ «ខុសក្រមសីលធម៌ធ្ងន់ បើគ្រូពេទ្យគេអាចដកសញ្ញាប័ត្រព្យូរចោលតែម្ដង! តែបើស្ត្រីនោះជាអ្នកលក់ថ្នាំ ភាគច្រើនជាឧសថស្ថានមធ្យមដែលឈរលក់ថ្នាំឱ្យគេ។ គឺគេអាចហៅទៅព្រមាន និងសួរនាំ»។

យោងតាមអនុក្រឹត្យស្ដីពីក្រមសីលធម៌គ្រូពេទ្យឆ្នាំ២០០៣ មាត្រា២បានចែងថា ក្នុងការប្រកបវិជ្ជាជីវៈវេជ្ជសាស្ត្រ ទោះក្នុងលក្ខណៈឯកជនក្ដី ជាសាធារណៈក្ដី គ្រូពេទ្យត្រូវតែគោរពជីវិត រាងកាយ និងសេចក្ដីថ្លៃថ្នូររបស់មនុស្ស។ បន្ថែមលើនេះមាត្រា៧ វក្យខណ្ឌទី២ ក៏បានចែងដែរថាទោះស្ថិតក្នុងកាលៈទេសៈណាក៏ដោយ គ្រូពេទ្យមិនត្រូវបោះបង់ អាកប្បកិរិយា សុភាពរាបសា ត្រឹមត្រូវ និងត្រូវយកចិត្តទុកដាក់ជួយទំនុកបម្រុងចំពោះមនុស្សដែលខ្លួនពិនិត្យ៕