ព័ត៌មានជាតិ

ផ្ទុះសង្រ្គាមពីរដង សាលាបឋមសិក្សាតាមន្តសែនជ័យរងការវាយប្រហារបំផ្លាញម្តងហើយម្តងទៀតពីយោធាថៃ

បានផុស

៥ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

សាលាបឋមសិក្សាតាមន្តសែនជ័យក្នុងស្រុកបន្ទាយអំំពិលខេត្តឧត្តរមានជ័យ បានរងការវាយប្រហារម្តងហើយម្តងទៀតពីសំណាក់យោធាថៃ ក្នុងសង្រ្គាមឈ្លានពានចូលកាន់កាប់ទឹកដីប្រទេសកម្ពុជានៅតំបន់ប្រាសាទតាមាន់។

លោក ឡៃ ផល្លា នាយកសាលាបឋមសិក្សាតាមន្តសែនជ័យក្នុងស្រុកបន្ទាយអំពិលប្រាប់ថា សាលាបឋមសិក្សាតាមន្តសែនជ័យបានរងការវាយប្រហារជាបន្តបន្ទាប់ពីយោធាថៃ ក្នុងសង្រ្គាមឈ្លានពានចំនួនពីរដងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ទុះអាវុធលើកទី១ កើតឡើងនៅចន្លោះថ្ងៃទី ២០ ដល់ថ្ងៃទី ២៤ ខែកក្កដា ឆ្នាំ ២០២៥ ដែលបង្កឱ្យមានការខូចខាតបន្ទប់រៀនមួយបន្ទប់និងសមិទ្ធផលមួយចំនួន។

ដោយឡែកការផ្ទុះសង្រ្គាមជាលើកទី២ ដែលមានរយៈពេល ២១ ថ្ងៃ ក្នុងអំឡុងខែធ្នូ ឆ្នាំ ២០២៥ បានបង្កឱ្យមានការខូចខាតយ៉ាងធ្ងន់ធ្ងរស្ទើរតែទាំងស្រុង។ ហេដ្ឋារចនាសម្ព័ន្ធនៅក្នុងសាលាត្រូវបានយោធាថៃបាញ់ប្លោងចំបណ្តាលឱ្យខូចខាតបន្ទប់រៀនទាំងអស់ចំនួន ៦ បន្ទប់។ បន្ថែមពីនេះ អគារថ្មីរបស់អង្គការមួយដែលទើបសាងសង់បាន ៨០% ក៏ត្រូវបានគ្រាប់កាំភ្លើងបាញ់ចំចំនួន ២ គ្រាប់ និងមានគ្រាប់ជាច្រើនទៀតធ្លាក់រាយប៉ាយនៅជុំវិញបរិវេណសាលា។

ក្រៅពីនេះសមិទ្ធផលផ្សេងៗទៀតក៏រងការបំផ្លាញរួមមាន ផ្ទះបាយ, បន្ទប់ទឹក រួមទាំងអាងចម្រោះទឹកស្អាតជាដើម។

«កងទ័ពសៀមបើកការវាយប្រហារលើកនេះ មានគោលបំណងកម្ទេចទីតាំងសាលារៀនតែម្តង»។ នេះបើតាមការយល់ឃើញរបស់លោក ឡៃ ផល្លា។

លោក ឡៃ ផល្លា បានរំលឹកថា នៅថ្ងៃកើតហេតុមានសិស្សតែ ៦ នាក់ប៉ុណ្ណោះដែលមកសាលា ហើយត្រូវបានលោកគ្រូអនុញ្ញាតឱ្យត្រឡប់ទៅផ្ទះវិញដើម្បីសុវត្ថិភាព។

សាលាបឋមសិក្សាតាមន្តសែនជ័យ មុនផ្ទុះសង្រ្គាមមានសិស្សសរុបប្រហែល ២០០ នាក់ (ស្រី ៩៩ នាក់) និងមានគ្រូបង្រៀន ៨ នាក់ រួមទាំងគ្រូកិច្ចសន្យាម្នាក់។

ដោយសារសាលារៀនត្រូវបានបំផ្លាញ សិស្សានុសិស្សគ្មានកន្លែងសិក្សានិងត្រូវផ្លាស់ទីកន្លែងពីមួយទៅមួយ និងដើម្បីកុំឱ្យសិស្សខកខានការរៀនសូត្រ សាលាបានព្យាយាមប្រមូលសិស្សនៅតាមតំបន់ដែលភៀសខ្លួនទៅដើម្បីបង្រៀនជាបណ្តុំ។

ទោះជាយ៉ាងណា នាយកសាលាតាមន្តសែនជ័យបានគូសបញ្ជាក់ថា ការបង្រៀនតាមរោងក្នុងស្ថានភាពភៀសខ្លួនមិនអាចទទួលបានលទ្ធផលល្អដូចមុនទេ ដោយគុណភាពសិក្សាធ្លាក់ចុះប្រហែល ៥០% ដោយសារខ្វះខាតគ្រូនិងសម្ភារៈ។

លោកក៏សម្ដែងការព្រួយបារម្ភចំពោះអនាគតរបស់កុមារដែលអាចនឹងមិនចេះអក្សរ ប្រសិនបើសង្គ្រាមនៅតែអូសបន្លាយពេលយូរ៕