ព័ត៌មានជាតិ

រូបភាពដ៏កម្រនៃសត្វផ្សោតឃ្លាចនៅខេត្តកំពតកំពុងទាក់ទាញការចាប់អារម្មណ៍ពីអ្នកប្រើប្រាស់បណ្ដាញសង្គម

បានផុស

១ ខែ មុន

នៅ

ថ្ងៃអាទិត្យ ១០ ឧសភា ២០២៦

ដោយ

វីដេអូខ្លីមួយដែលថតដោយដ្រូន បានផ្ដិតយកទិដ្ឋភាពដ៏កម្រមួយនៃគ្រួសារផ្សោតឃ្លាច (Indo-Pacific Humpback Dolphins) នៅក្នុងសហគមន៍នេសាទព្រែកត្នោតខេត្តកំពតបានទាក់ទាញការចាប់អារម្មណ៍ជាច្រើនពីអ្នកប្រើប្រាស់បណ្ដាញសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពនៃកូនផ្សោតជំទង់មួយក្បាលដែលកំពុងហែលក្រឡឹងឪពុកម្ដាយដោយភាពសប្បាយរីករាយ រួមជាមួយការយកចំពុះមកប៉ះគ្នាថ្នមៗបង្ហាញក្ដីស្រឡាញ់ និងភាពស្និតស្នាលបានទាក់ទាញបេះដូងអ្នកទស្សនាវីដេអូនេះជាច្រើននាក់ជាមួយនឹងការផ្ដល់ជាយោបល់ល្អចំពោះការអភិរក្សនៅកម្ពុជា។

រដ្ឋមន្ត្រីក្រសួងកសិកម្មលោក ឌិត ទីណា បានបង្ហោះលើហ្វេសបុករបស់លោកថា៖ «ទិដ្ឋភាពនេះសបញ្ជាក់ឱ្យឃើញពីចំណងដ៏ស្អិតរមួត និងការរស់នៅដោយសុខសាន្តរបស់ពួកវានៅក្នុងតំបន់អភិរក្សដែលត្រូវបានការពារយ៉ាងដិតដល់»។

លោកបានបន្ថែមថា អគ្គនាយកដ្ឋានជលផលនៃក្រសួងកសិកម្ម សហការជាមួយអង្គការអភិរក្សសមុទ្រកម្ពុជា (MCC) និងរដ្ឋបាលថ្នាក់ក្រោមជាតិ បានទម្លាក់ប្រអប់ថ្ម នៅតាមបណ្ដាតំបន់អភិរក្សនានា ដើម្បីបង្កើតជម្រកសិប្បនិម្មិតសម្រាប់ជីវៈចម្រុះនៅដែនសមុទ្ររបស់យើង។

ចាប់តាំងពីការចាប់ផ្ដើមនៅឆ្នាំ២០២៣មក ការបង្កើតជម្រកសិប្បនិម្មិត បានជួយឱ្យធនធានជីវៈចម្រុះនៅតំបន់ទាំងនេះកើនឡើង និងជួយលើកស្ទួយនិរន្តរភាពនៃផលជលផលរបស់ប្រជានេសាទក្នុងតំបន់ផងដែរ៕

អត្ថបទដោយ ហ៊ុន សិរីវឌ្ឍន៍