ព័ត៌មានជាតិ

កម្ពុជា គ្រោងបង្កើនថវិកាការពារជាតិជាង ១១% នៅឆ្នាំ ២០២៧

បានផុស

១ ខែ មុន

នៅ

ថ្ងៃអង្គារ ២៦ ឧសភា ២០២៦

ដោយ

អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានឱ្យដឹងថា រដ្ឋាភិបាលកម្ពុជា គ្រោងដំឡើងការចំណាយលើវិស័យការពារជាតិក្នុងអត្រា ១១,៤% នៅក្នុងឆ្នាំ ២០២៧ ដែលថវិកានេះនឹងផ្ដោតលើការពង្រឹងជីវភាពកងកម្លាំងប្រដាប់អាវុធ ការពង្រឹងសមត្ថភាព និងការធ្វើទំនើបកម្មយោធាផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារាចរស្ដីពីការរៀបចំផែនការយុទ្ធសាស្ត្រថវិកាឆ្នាំ ២០២៧-២០២៩ និងការរៀបចំសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៧ បង្ហាញថា រដ្ឋាភិបាលគ្រោងចំណាយថវិកាប្រមាណ ៣៥៩០ ប៊ីលានរៀល (ប្រមាណ ៩០០ លានដុល្លារ) លើវិស័យការពារជាតិ។

លោក មាស សុខសេនសាន បញ្ជាក់ថា ចំណាយវិស័យសង្គមកិច្ចត្រូវបានគ្រោងកើនក្នុងអត្រា ៣,៤% សម្រាប់ឆ្នាំ ២០២៧ ស្របពេលដែលវិស័យការពារជាតិ ត្រូវបានគ្រោងកើនក្នុងអត្រា ១១,៤% ខណៈការដំឡើងថវិកាលើវិស័យការពារជាតិ មិនធ្វើឱ្យមានការថមថយដល់វិស័យអប់រំ និងសុខាភិបាលនោះឡើយ។

លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកកម្ពុជា យល់ឃើញថា កំណើននៃកញ្ចប់ថវិកាលើវិស័យការពារជាតិ គឺស្របតាមស្ថានការ រដ្ឋាភិបាលកម្ពុជាបានចាក់បញ្ចូលកញ្ចប់ថវិកាជាតិទៅលើវិស័យអប់រំ សុខាភិបាលឱ្យអាទិភាពជាដរាបរៀងមក និងវិស័យផ្សេងៗទៀត ដើម្បីគាំពាអភិវឌ្ឍសង្គម ដែលទទួលបានការអភិវឌ្ឍគួសមដូចពេលនេះ។

លោកបណ្ឌិត យង់ ពៅ បន្ថែមថា ដំណាក់កាលនេះ ដល់ពេលវេលាដែលត្រូវកែទម្រង់ជាចាំបាច់នៅក្នុងវិស័យការពារជាតិ ទាំងកែទម្រង់ ការធ្វើទំនើបកម្ម និងការអនុវត្តកាតព្វកិច្ចយោធា ដែលទាំងអស់នេះ ត្រូវការថវិកាបន្ថែម។

លោកបណ្ឌិត យង់ ពៅ យល់ឃើញថា មហាជនសាធារណជនបានដឹងហើយថា ប្រទេសថៃចូលឈ្លានពានទឹកដីកម្ពុជា ដែលយើងចាំបាច់ត្រូវការធ្វើទំនើបកម្មជាបន្ទាន់ បើយើងមិនមានថវិកាយើងមិនអាចធ្វើបានទេ បើទោះជាផលិតគ្រាប់ដោយខ្លួនឯងក៏ត្រូវតែបង្កើនកញ្ចប់ថវិកាដែរ តែនេះយើងបញ្ជាទិញតែម្ដង យើងត្រូវបញ្ជាទិញសព្វាវុធ និងសម្ភារយុទ្ធោបករណ៍ផ្សេងៗទៀត ដើម្បីគាំពារ។

លោកបណ្ឌិត យង់ ពៅ បញ្ជាក់ថា៖ «តើយើងសុខចិត្តអត់មានអ្វីការពារជាតិ ខ្វះខាត ឬយ៉ាងដូចម្ដេច យើងត្រូវតែការពារជាតិ វិស័យគាំពារសង្គមផ្សេងៗទៀត រដ្ឋាភិបាលបានគិតគូជាច្រើឆ្នាំមកហើយ ហើយក៏មានស្ថិរភាពក្នុងការគាំពារសង្គមទៅហើយ រចនាសម្ព័ន្ធសេដ្ឋកិច្ចក៏រដ្ឋាភិបាលបានគិតគួររួចទៅហើយ ឥឡូវនេះ ដល់ពេលដែលយើងត្រូវគិតគូវិស័យការពារជាតិម្ដង ដើម្បីទប់ទល់មហិច្ឆិតាឈ្លានពានរបស់បរទេស ជាពិសេសគឺថៃ»៕