កម្ពុជា-ឡាវ កំពុងពិនិត្យលទ្ធភាពលើ MOU ពង្រីកកូតាអាហារូបករណ៍ និងផ្លាស់ប្តូរកម្មវិធីយុវជន

តាមការផ្សាយរបស់ទំព័រហ្វេសប៊ុកក្រសួងអប់រំ នាថ្ងៃទី០៨ ខែកក្កដា ឆ្នាំ២០២៦ កម្ពុជា-ឡាវ បានបង្ហាញពីការបន្តពង្រីក និងពង្រឹងកិច្ចសហប្រតិបត្តិការទ្វេភាគីលើវិស័យអប់រំ ដោយនឹងមានការពិនិត្យលទ្ធភាពលើ MOU ពង្រីកកូតាអាហារូបករណ៍ និងផ្លាស់ប្តូរកម្មវិធីយុវជនទាំងពីរ។

កាលពីរសៀលថ្ងៃទី៧ ខែកក្កដា ឆ្នាំ២០២៦ នៅទីស្ដីការក្រសួង បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្ដែងការគួរសម និងពិភាក្សាការងារជាមួយ លោក Sonexay Vannaxay ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យប្រជាមានិតឡាវប្រចាំ កម្ពុជា។

បើតាមក្រសួងអប់រំ ក្នុងជំនួបទាំងនោះ រដ្ឋមន្ត្រីក្រសួងអប់រំ បានបង្ហាញពីការប្ដេជ្ញាចិត្ត ក្នុងការបន្តពង្រឹង និងពង្រីកកិច្ចសហប្រតិបត្តិការទ្វេភាគីលើវិស័យអប់រំ យុវជន និងកីឡាឱ្យកាន់តែស៊ីជម្រៅ ដោយនឹងមានការពិនិត្យ និងរៀបចំឡើងនូវអនុស្សរណៈនៃការយោគយល់គ្នា (MoU) ដើម្បីពង្រីកកូតាអាហារូបករណ៍ កម្មវិធីផ្លាស់ប្ដូរវប្បធម៌យុវជន និងការអភិវឌ្ឍវិស័យកីឡា។ ក្រសួងបញ្ជាក់ថា ក្នុងន័យនេះ ឧបនាយករដ្ឋមន្ត្រី ជឿជាក់ថា ការរួមគ្នាបណ្ដុះបណ្ដាល និងគាំទ្រយុវជនជំនាន់ក្រោយនេះ នឹងក្លាយជាគ្រឹះដ៏រឹងមាំក្នុងការបន្តថែរក្សាចំណងមិត្តភាពជាប្រពៃណី និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ឡាវ ឱ្យកាន់តែរឹងមាំ។  

ជាមួយគ្នានេះ ក្នុងឱកាសជួបជាមួយក្រសួងអប់រំកម្ពុជា ឯកអគ្គរដ្ឋទូតឡាវប្រចាំកម្ពុជា បានវាយតម្លៃខ្ពស់ចំពោះភាពរីកចម្រើនលើគ្រប់វិស័យរបស់កម្ពុជា ជាពិសេសវឌ្ឍនភាពនៃកំណែទម្រង់វិស័យអប់រំរបស់កម្ពុជា។ លោកក៏បានបញ្ជាក់ដែរថា ផ្អែកលើចំណងមិត្តភាព វប្បធម៌ និងប្រពៃណីដ៏រឹងមាំដែលមានស្រាប់ ប្រទេសឡាវក៏កំពុងមានទិសដៅស្រដៀងគ្នានេះក្នុងការបង្កើនគុណភាពអប់រំ ដើម្បីកសាងមូលធនមនុស្សប្រកបដោយសក្ដានុពលឆ្លើយតបនឹងតម្រូវការទីផ្សារការងារជាតិ ក្នុងតំបន់ និងអន្តរជាតិ ផងដែរ។

ឯកអគ្គរដ្ឋទូតឡាវ ក៏បានថ្លែងអំណរគុណយ៉ាងជ្រាលជ្រៅដល់ក្រសួងអប់រំ ដែលបានយកចិត្តទុកដាក់ចំពោះនិស្សិតឡាវដែលកំពុងសិក្សានៅភ្នំពេញ ទាំងលើការផ្ដល់អាហារូបករណ៍ និងកិច្ចសម្រួលការស្នាក់នៅនានា៕