ព័ត៌មានជាតិ

លោកហុក គឹមចេង បញ្ជាក់ពីមូលហេតុក្រសួងចេញរបាយការណ៍ស្តីពីករណីជំងឺកូវីដជាទម្រង់ថ្មី

បានផុស

៥ years មុន

នៅ

ថ្ងៃពុធ ៥ ឧសភា ២០២១

ដោយ

ភ្នំពេញ ៖ លោកវេជ្ជបណ្ឌិត ហុកគឹមចេង អគ្គនាយកបច្ចេកទេសសុខាភិបាលអះអាងថា ការដែលក្រសួងសុខាភិបាលចេញរបាយការណ៍ស្តីពីករណីជំងឺកូវីដជាលក្ខណៈទម្រង់ថ្មីនេះគឺចង់ឲ្យបងប្អូនប្រជាពលរដ្ឋយកចិត្តទុកដាក់ទៅលើព័ត៌មានលំអិតដែលចេញដោយរាជធានីខេត្តនីមួយៗវិញ។

ការលើកឡើងរបស់លោកហុក គឹមចេង នេះធ្វើឡើងបន្ទាប់ពីមានអ្នកសារព័ត៌មាននិងប្រជាពលរដ្ឋជាច្រើននៅថ្ងៃទី០៥ខែឧសភានេះមានប្រតិកម្មទៅនឹងការចេញរបាយការណ៍ស្តីពីករណីរកឃើញថ្មីនិងអ្នកស្លាប់ដោយសារជំងឺកូវីដ១៩ជាទម្រង់ថ្មី របស់ក្រសួងដែលចេញតែចំនួនករណីឆ្លងសរុប ករណីឆ្លងថ្មី ករណីជាសះស្បើយសរុប ករណីស្លាប់សរុបនិងករណីនាំចូលពីក្រៅប្រទេសសរុបខណៈរបាយការណ៍ចាស់មានបញ្ជាក់លំអិតករណីឆ្លង ជាសះស្បើយនិងស្លាប់តាមរាជធានីខេត្តនីមួយៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានអ្នកសារព័ត៌មានខ្លះបានលើកឡើងថា ទម្រង់របាយការណ៍ថ្មីនេះខ្លីជ្រុលពេកពិបាកយល់ដោយសារពុំបានលម្អិតករណីឆ្លងតាមខេត្តធ្វើឲ្យសាធារណជនពិបាកបែងចែក រាជធានីឆ្លងប៉ុន្មានខេត្តឆ្លងប៉ុន្មាន។

អ្នកសារព័ត៌មានក៏បានស្នើទៅលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលរក្សារបាយការណ៍ទម្រង់ចាស់ដដែល ព្រោះវាល្អ និងមានព័ត៌មានករណីឆ្លងកូវីដ១៩នៅតាមខេត្តនីមួយៗនិងមានភាពច្បាស់លាស់ហើយងាយស្រួលពលរដ្ឋមើលយល់។

ជាការឆ្លើយតបទៅនឹងការលើកឡើងខាងលើ លោក វេជ្ជបណ្ឌិត ហុក គឹមចេងបានបញ្ជាក់ថា «ការចេញរបាយការណ៍ទម្រង់ថ្មីនេះទៀតនឹងក៏ដើម្បីឲ្យវាមានលក្ខណៈមួយសាមញ្ញហើយក៏វាងាយក្នុងការទម្លាប់ឲ្យបងប្អូនប្រជាជនយើងតាមដានទៅលើនឹងហើយស្តាប់ទៅលើព័ត៌មានរដ្ឋបាលរាជធានីខេត្តនីមួយៗដែលមានព័ត៌មានលំអិតចេញជួនដល់ប្រជាពលរដ្ឋ»។

លោកបានបន្តថា ក្រសួងមិនចង់លំអិតឲ្យទូលំទូលាយពេកទេដោយទុកឲ្យរាជធានីខេត្តនីមួយៗបញ្ចេញលំអិតព័ត៌មានបន្ថែមផ្សេងទៀត។

គួរបញ្ជាក់ថា គិតត្រឹមថ្ងៃទី៥ឧសភាឆ្នាំ២០២១នេះកម្ពុជាមាន អ្នកឆ្លងជំងឺកូវីដ ១៩សរុបចំនួន១៦៩៧១នាក់និងជាសះស្បើយចំនួន៦០១៩នាក់និងអ្នកស្លាប់បាត់បង់ជីវិតចំនួន១១០នាក់៕

ដោយ ៖ សំអឿន