ព័ត៌មានជាតិ

កម្ពុជានឹងក្លាយជាប្រទេសផលិត និងផ្គត់ផ្គង់ផលិតផលស្វាយចន្ទីដ៏សំខាន់មួយនៅក្នុងតំបន់នាពេលខាងមុខ

បានផុស

៥ years មុន

នៅ

ថ្ងៃសុក្រ ២៣ កក្កដា ២០២១

ដោយ

មន្ត្រីជាន់ខ្ពស់ក្រសួងពាណិជ្ជកម្មបានឱ្យដឹងថា នៅពេលគោលនយោបាយជាតិស្តីពីស្វាយចន្ទីដាក់ឱ្យប្រើប្រាស់ជាផ្លូវការនោះ នឹងជួយប្រែក្លាយកម្ពុជាទៅជាប្រទេសផលិត និងផ្គត់ផ្គង់ផលិតផលស្វាយចន្ទីដ៏សំខាន់មួយនៅក្នុងតំបន់នាពេលខាងមុខនេះ ។

ថ្លែងនៅក្នុងកិច្ចប្រជុំតាមប្រព័ន្ធវីដេអូ ដើម្បីបន្តពិនិត្យនិងផ្តល់យោបល់លើសេចក្តីព្រាងគោលនយោបាយជាតិ ស្តីពីស្វាយចន្ទី លោក រាជ រ៉ា រដ្ឋលេខាធិការក្រសួងពាណិជ្ជកម្មបានមានប្រសាសន៍ថា គោលនយោបាយជាតិនេះនឹងផ្តល់អត្ថប្រយោជន៍យ៉ាងច្រើនដល់វិស័យស្វាយចន្ទីរបស់កម្ពុជា នាពេលខាងមុខ ដូចជាប្រែក្លាយកម្ពុជាទៅជាប្រទេសផលិតនិងផ្គត់ផ្គង់ផលិតផលស្វាយចន្ទីដ៏សំខាន់មួយនៅក្នុងតំបន់សម្រាប់បម្រើទីផ្សារក្នុងស្រុកតំបន់ និងពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តទៀតថា បន្ថែមពីនេះជួយធ្វើឱ្យផលិតកម្ម និងផលិតភាពមានសមត្ថភាពប្រកួតប្រជែង ទាំងទិន្នផល និងគុណភាពនិងជួយឱ្យកម្ពុជា នឹងទទួលបាននូវតម្លៃបន្ថែមពេញលេញពីស្វាយចន្ទី ចំពោះអ្នកដាំដុះ និងអ្នកកែច្នៃលើការអនុវត្តខ្សែច្រវ៉ាក់តម្លៃ និងខ្សែច្រវ៉ាក់ផលិតកម្មស្វាយចន្ទីព្រមទាំងពិសេសបង្កើតឧត្តមភាពប្រកួតប្រជែង និងការធ្វើពិសោធកម្មទីផ្សារផងដែរ។

បើតាមលោក រាជ រ៉ា បានបញ្ជាក់ថា កិច្ចប្រជុំបានបន្តពិនិត្យយ៉ាងលម្អិតស្របតាមមាតិកា និងផ្នែកនីមួយៗព្រមទាំងបានផ្តល់ធាតុចូលកែលម្អខ្លឹមសារនៃសេចក្តីព្រាងគោលនយោបាយឱ្យមានភាពល្អប្រសើរ មុនដាក់ជូនកិច្ចប្រជុំក្រុមការងារចម្រុះអន្តរក្រសួងបន្តនាពេលខាងមុខ។ជាមួយគ្នានេះដែរ បានព្រមព្រៀងគ្នាលើចំណុចផែនការសកម្មភាពដំណើរការអនុវត្តគម្រោង ការតាមដានត្រួតពិនិត្យនិងការវាយតម្លៃ ។ល។ សម្រាប់ម៉ាទ្រីសនៃវិធានការគោលនយោបាយនឹងបន្តទៅកិច្ចប្រជុំបន្ទាប់ពេលក្រោយ៕

អត្ថបទ ៖ សំអឿន