អ្នកជំងឺកូវីដព្យាបាលតាមផ្ទះ ​មានស្លាកសញ្ញាបិទសំគាល់

អាជ្ញាធរតាមបណ្តាសង្កាត់ទាំង៨ ក្នុងមូលដ្ឋានខណ្ឌច្បារអំពៅ រាជធានីភ្នំពេញ នៅថ្ងៃទី ៣០ ខែកក្កដានេះបានចុះបំពាក់ស្លាកទីតាំងលំនៅដ្ឋានណាដែលមានអ្នកជំងឺកូវីដ១៩ កំពុងសម្រាកព្យាបាលនៅតាមផ្ទះដើម្បីងាយស្រួលដល់គ្រូពេទ្យក៏ដូចជាក្រុមការងារបានដឹងពីគោលដៅច្បាស់លាស់។

យោងតាមប្រភពពីលោក ជូ ចាន់នី ជំនួយការសាលាសង្កាត់ច្បារអំពៅទី២ ប្រាប់កម្ពុជាថ្មី នៅរសៀលថ្ងៃទី ៣០ ខែកក្កដានេះថា អាជ្ញាធរសង្កាត់បានទទួលការណែនាំពីសាលាខណ្ឌច្បារអំពៅ ឱ្យយកស្លាកសញ្ញា សំគាល់ទីតាំងអ្នកជំងឺកូវីដ១៩ ដែលកំពុងសុំសម្រាកព្យាបាលនៅតាមផ្ទះក្នុងបំណងងាយស្រួលឱ្យក្រុមគ្រូពេទ្យក៏ដូចជាសប្បុរសជនបានដឹងនិងជួយទៅដល់អ្នកជំងឺ។

ម្យ៉ាងទៀតការបិទស្លាកសញ្ញាសំគាល់នេះ បានដឹងដល់អ្នកចង់ទៅទំនាក់ទំនងការងារផ្សេងៗជាមួយម្ចាស់ផ្ទះ និងបានដឹងពីព័ត៌មានថាម្ចាស់ទីតាំងកំពុងសម្រាកព្យាបាលជំងឺនៅផ្ទះនឹងបានដឹងហើយកុំទៅទំនាក់ទំនងការងារដែលស្និតបំផុត។

លោក ជូ ចាន់នី បញ្ជាក់ដែរថា ការអនុញ្ញាតឱ្យអ្នកជំងឺជាលក្ខណៈគ្រួសារព្យាបាលជំងឺកូវីដ១៩នៅតាមលំ​នៅដ្ឋានបែបនេះគឺបងប្អូនប្រជាពលរដ្ឋលោកគាំទ្រខ្លាំងណាស់ ព្រោះពួកគេចង់រស់នៅ និងរក្សារថែទាំគ្នារហូតដល់ឆាប់ជាសះស្បើយថែមទៀតផង៕ អត្ថបទ៖ នរា