កន្លែង​លាង​រថយន្ត​មមាញឹក ក្រោយ​ថ្ងៃ​បញ្ចប់​បុណ្យ​ភ្ជុំ​បិណ្ឌ

នៅតាមទីកន្លែងលាងរថយន្តគ្រប់កន្លែងទាំងអស់សម្បូរទៅដោយរថយន្តដែលម្ចាស់យកមកលាងបន្ទាប់ពីបញ្ចប់បុណ្យភ្ជុំបិណ្ឌ។

លោក ឡេង ធាង ជាម្ចាស់ទីតាំងលាងរថយន្ត នៅភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញបានប្រាប់ថា ចាប់តាំងពីថ្ងៃទី ៨ ខែតុលា មកដល់ថ្ងៃទី ៩ ទីតាំងរបស់លោកបានលាងសំអាតរថយន្តរបស់ភ្ញៀវរកពេលសម្រាកហូបបាយសឹងពុំបានព្រោះភ្ញៀវយករថយន្តមកលាងតាំងពីព្រឹកព្រលឹមស្រាងៗរហូតដល់ព្រលប់។

ចំពោះតម្លៃលាងរថយន្តមួយគ្រឿងថ្លៃ ១៣០០០ រៀលប៉ុណ្ណោះ។ ម្ចាស់ទីតាំងដដែលបានបន្តថា រថយន្តដែលភ្ញៀវយកមកលាងសម្អាតភាគច្រើនមកពីដើរលេងតាមបណ្តាខេត្តដែលមានស្នាមប្រលាក់សុទ្ធតែដីក្រហម។ ទោះជាកម្មករសឹងដាច់បាយក៏ម្នាក់ៗខិតខំប្រឹងលាងព្រោះជាពេលប្រមូលថវិកា។

ម្យ៉ាងទៀតស្របពេលធ្លាក់ភ្លៀងសឹងរាល់ថ្ងៃជាហេតុធ្វើឲ្យរថយន្តប្រលាក់ដីដែលម្ចាស់មិនអាចលាងខ្លួនឯងបាន។សំខាន់បាតក្រោមដែលប្រលាក់ទៅដោយភក់ និងល្បាប់។

ចំពោះកំណើនរថយន្តដែលយកមកលាងបើថ្ងៃធម្មតាបានត្រឹមតែ៣០គ្រឿង។ ប៉ុន្តែនាប៉ុន្មានថ្ងៃនេះរថយន្តយកមក​លាងកើនឡើងដល់៧០គ្រឿងឯណោះព្រោះដោយសារទីតាំងលាងរថយន្តទាំងអស់ត្រូវសម្រាកទុកពេលឲ្យកម្មករទៅលេងស្រុកកំណើតតាមបណ្តាខេត្ត៕

អត្ថបទៈ នរា