ព័ត៌មានជាតិ

ក្រសួងការងារស្នើក្រុមហ៊ុនទទួលពលករខ្មែរ ត្រឡប់មកពីថៃឱ្យចូលធ្វើការ មានការយោគយល់និងការអត់ធ្មត់ខ្ពស់

បានផុស

១១ ខែ មុន

នៅ

ថ្ងៃព្រហស្បតិ៍ ១០ កក្កដា ២០២៥

ដោយ

លោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានស្នើដល់ក្រុមហ៊ុនសហគ្រាសរោងចក្រដែលទទួលបងប្អូនពលករខ្មែរទើបត្រឡប់មកពីប្រទេសថៃឱ្យចូលធ្វើការ សូមមេត្តាយោគយល់ និង មានការអត់ធ្មត់ឱ្យបានខ្ពស់ជាអតិបរមា ព្រោះថា ពលករខ្មែរយើងនៅមិនទាន់បានដឹងពីរបៀបរបបធ្វើការងារនៅឡើយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំនេះ បានធ្វើឡើងជាបន្តបន្ទាប់ក្នុងឱកាសដែលលោករដ្ឋមន្ត្រីបាននាំតំណាងក្រុមហ៊ុននិងរោងចក្រនានាចុះជួបផ្ទាល់ជាមួយបងប្អូនពលករខ្មែរត្រឡប់មកពីប្រទេសថៃនៅតាមមូលដ្ឋានដើម្បីផ្សព្វផ្សាយឱកាសការងាររាប់ម៉ឺនកន្លែងជូនពួកគាត់បានដឹងនិងចុះឈ្មោះធ្វើការទៅតាមជំនាញរៀងៗខ្លួន។

លោករដ្ឋមន្ត្រី ហេង សួរ សង្ឃឹមថា ក្រុមហ៊ុននឹងផ្តល់លក្ខខណ្ឌអំណោយផលជូនដល់បងប្អូនពលករមកពីប្រទេសថៃដោយរៀបចំឱ្យមានវគ្គពិសេសមួយ៣ថ្ងៃទៅមួយអាទិត្យ ដើម្បីពន្យល់ពួកគាត់ពីបែបបទការងារ និងសូមមានការអត់ធ្មត់ អធ្យាស្រ័យគ្នាទៅវិញទៅមក។

ព្រោះពួកគាត់អត់ទាន់បានដឹងពីរបៀបរបបនិងវប្បធម៌នៃការធ្វើការជាក្រុមនៅឡើយទេ។ដូចនេះសូមមានការយោគយល់សូមអធ្យាស្រ័យនិងយកចិត្តទុកដាក់និងព្យាយាមអត់ធ្មត់ដើម្បីធ្វើយ៉ាងណាឱ្យបងប្អូនយើងដែលត្រឡប់មកពីថៃ ឬមួយបងប្អូនយើងដែលមិនទាន់បានធ្វើការនៅកន្លែងណាមួយយល់ពីរបៀបធ្វើការហើយអត់ធ្មត់ជាមួយគ្នា។

លោករដ្ឋមន្ត្រីបានណែនាំទៀតថា « ដូចគ្នាដែរបងប្អូនពលករយើង ក្នុងករណីដែលបានជាប់នៅកន្លែងធ្វើការណាមួយក៏ដោយ សូមមានការអត់ធ្មតនិងអធ្យាស្រ័យគ្នាទៅវិញទៅមក ព្រោះពេលយើងជួបគ្នាដំបូងធ្វើការដំបូងមិនទាន់យល់ចិត្តគ្នានៅឡើយទេ។អីចឹងបើខុសត្រូវអីគឺថា ព្យាយាមសួរនាំគ្នាឱ្យបានច្រើនកុំអាលមានការអាក់អន់ស្រពន់ចិត្ត»។

លោករដ្ឋមន្ត្រីបានបន្ថែមថា នៅពេលដែលពលករខ្មែរកំពុងធ្វើការនៅប្រទេសថៃបានឃើញបងប្អូនពលករយើងត្រឡប់មកស្រុកកំណើតវិញមានការយកចិត្តទុកដាក់និងទទួលបានឱកាសការងារល្អនោះពួកគាត់នៅទៅនោះដែលទទួលរងនូវការរើសអើង ទទួលការគំរាមកំហែងនិងមានការព្រួយបារម្ភពីសុខសុវត្ថិភាព របស់ខ្លួនអាចនឹងសម្រេចចិត្តវិលត្រឡប់មកប្រទេសវិញដែរ។

គួរបញ្ជាក់ថា គិតចាប់ពីថ្ងៃទី៨ខែមិថុនាឆ្នាំ២០២៥ រហូតមកដល់ពេលនេះមានបងប្អូនពលករខ្មែរប្រមាណជាង៤ម៉ឺននាក់ បានវិលត្រឡប់មកពីប្រទេសថៃ ដោយសារកម្ពុជានិងថៃមានភាពតានតឹងបញ្ហាព្រំដែន។

ក្នុងចំណោមពលករខ្មែរជាង៤ម៉ឺននាក់ ក្នុងនោះមានប្រមាណជាង១ម៉ឺននាក់ បានចុះឈ្មោះស្វែងរកការងារធ្វើភ្លាមៗនៅនឹងច្រកព្រំដែនកម្ពុជាថៃខណៈថ្នាក់ដឹកនាំក្រសួងការងារនិងបណ្តុះបណ្តាលវិជ្ជាជីវៈរួមជាមួយតំណាងក្រុមហ៊ុន រោងចក្រនានាបានចុះតាមបណ្តាខេត្តមួយចំនួនដើម្បីផ្តល់ឱកាសការងាររាប់ម៉ឺនកន្លែងដល់មូលដ្ឋានដែលបងប្អូនពលករខ្មែរដែលទើបវិលត្រឡប់មកពីប្រទេសថៃរស់នៅផងដែរ៕

អត្ថបទ ៖ សំអឿន

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា