យោធាឈុតខ្មៅថៃ ឃាត់ខ្លួនពលករខ្មែរ៣៦នាក់ ដោយចោទថា លួចឆ្លងដែនខុសច្បាប់

ពលករខ្មែរពីរក្រុមសរុប៣៦នាក់ ដែលបាននាំគ្នាវិលត្រឡប់ចូលមកកម្ពុជាវិញតាមច្រករបៀង ត្រូវបានទាហានឈុតខ្មៅថៃ តាមស្ទាក់ និងឃាត់ខ្លួនយកទៅអនុវត្តតាមផ្លូវច្បាប់ ដោយចោទថា លបលួចឆ្លងដែនខុសច្បាប់។

ការឃាត់ខ្លួននេះបានធ្វើឡើងកាលពីព្រលប់ថ្ងៃទី៩ ខែកក្កដា ឆ្នាំ២០២៥ នៅពីរចំណុច ដោយចំណុចទី១ ក្នុងភូមិណងព្រឺ ឃុំផានសឹក ស្រុកអារញ្ញប្រាថេត ខេត្តស្រះកែវ និងចំណុចទី២ ក្នុងភូមិខៅឌីន ឃុំក្លងខាត ស្រុកក្លងហាត ខេត្តស្រះកែវ ដែលពលករទាំងពីរក្រុមនេះសរុបមានចំនួន ៣៦នាក់។

តាមការសាកសួរពីទាហានថៃ ពលករក្រុមទី១ បានបញ្ជាក់ថា ពួកខ្លួនបានចូលទៅធ្វើការនៅខេត្តឈុនបុរី ជាកម្មករកសាង និងបានរយៈពេល២ឆ្នាំ ហើយក៏នាំគ្នាវិលត្រឡប់ទៅប្រទេសកម្ពុជាវិញដោយសារតែអស់ការងារធ្វើ លុះមកដល់ព្រំដែនដែលបម្រុងនឹងឆ្លងក៏ត្រូវឃាត់ខ្លួន។ ដោយឡែកសម្រាប់ក្រុមទី២ គឺបានចូលមកធ្វើការជាការងារកសិកម្ម នៅក្នុងស្រុកខៅកាន់ ខេត្តស្រះកែវ ហើយនៅក្នុងពេលនេះគឺការងារត្រូវបានបញ្ចប់ ទើបពួកគេនាំគ្នាវិលត្រឡប់ទៅប្រទេសកម្ពុជាវិញ តាមច្រករបៀង តែក៏ត្រូវក្រុមទាហានឈុតខ្មៅថៃឃាត់ខ្លួនតែម្ដង។

បច្ចុប្បន្នពលករខ្មែរទាំង៣៦នាក់ ត្រូវបានយោធាឈុតខ្មៅថៃបញ្ជូនត្រឡប់ក្រោយដើម្បីអនុវត្តតាមផ្លូវច្បាប់ ដែលពេលនេះគេមិនដឹងថា តើពួកគាត់ស្ថិតនៅទីណានោះឡើយ គឺមានតែអគ្គស្ថានទូតប៉ុណ្ណោះ ដែលអាចចេញមុខរកដំណោះស្រាយជូនពួកគាត់បាន៕

អត្ថបទ៖ សោ និយមរ័ត្ន