ព័ត៌មានជាតិ

ឃុំខ្លួនបុរសសញ្ជាតិអាមេរិកម្នាក់ ករណីលួចទូរស័ព្ទសន្តិសុខផ្ទះសំណាក់

បានផុស

៤ years មុន

នៅ

ថ្ងៃពុធ ១០ វិច្ឆិកា ២០២១

ដោយ

ប្រភពព័ត៌មានពីសាលាដំបូងបានឲ្យដឹងកាលពីថ្ងៃទី១០ ខែវិច្ឆិកា ឆ្នាំ២០២១នេះថា លោក សេង លាង ចៅក្រមស៊ើបសួរបានសម្រចឃុំខ្លួនបុរសសញ្ជាតិអាមេរិកស្បែកខ្មៅម្នាក់ ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទលួច។

ជនសង្ស័យឈ្មោះ MOR GAN SAYDEE ភេទប្រុស អាយុ៤០ ឆ្នាំ ជនជាតិLIBERIAN សញ្ជាតិអាមេរិក មុខរបរមិនពិតប្រាកដ មុនចាប់ខ្លួនចូលមកស្នាក់នៅរាជធានីភ្នំពេញ។ អង្គហេតុនៃការឃុំខ្លួនជនសង្ស័យខាងលើនេះ ត្រូវបានសមត្ថកិច្ចឲ្យដឹងថា កាលពីថ្ងៃទី២ ខែវិច្ឆិកា ឆ្នាំ២០២១ ជនសង្ស័យបានប្រព្រឹត្តអំពើលួច ទូរស័ព្ទដៃម៉ាកសាំងសុង១គ្រឿង របស់សន្តិសុខឯកជនយាមនៅផ្ទះសំណាក់យីហោ សេណានីហ្គេន ដែលមានទីតាំងស្ថិតនៅផ្លូវលេខ១៣ ភូមិ១០ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបន្តថា នៅថ្ងៃខាងលើជនរងគ្រោះបានចូលបន្ទប់ទឹក ហើយក៏ទុកទូរស័ព្ទដៃម៉ាកសាំសុង១គ្រឿងនៅលើតុ បន្តិចក្រោយមកក៏ចេញពីបន្ទប់ទឹកវិញ ស្រាប់តែក្រឡេកទៅបាត់ទូរស័ព្ទដៃនោះ។ ក្រោយពេលដឹងថាបាត់ទូរស័ព្ទដៃភ្លាម ជនរងគ្រោះបានរៀបរាប់ប្រាប់អ្នកទទួលខុសត្រូវផ្ទះសំណាក់ ទើបនាំគ្នាឆោឡោហើយក៏ឆែកកាមេរ៉ាសុវត្តិភាពមើល ក៏ឃើញជនសង្ស័យជនជាតិស្បែកខ្មៅខាងលើនេះ ធ្វើសកម្មភាពលួចយកទូរស័ព្ទដៃនោះ។ បន្ទាប់មកជនរងគ្រោះបានដាក់ពាក្យបណ្តឹងទៅសមត្ថកិច្ច បានជាសមត្ថកិច្ចស្រាវជ្រាវ នឹងឈានទៅដល់ការឃាត់ខ្លួនជនសង្ស័យ រួចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមនីតិវិធី។

នៅចំពោះមុខសមត្ថកិច្ចជនសង្ស័យមានភាពរឹងរូសច្រងេងច្រងាង ដោយបានប្រើពាក្យសំដីដាក់សមត្ថកិច្ចមិនសូវសមរម្យ ដូចជា(ស្អីលួចទូរស័ព្ទដៃមួយគ្រឿងជាប់គុកដែរ) នឹងមិនចង់ឲ្យសមត្ថកិច្ចដាក់ខ្នោះទៀតផង តែទោះជាយ៉ាងណាសមត្ថកិច្ចបានអនុវត្តតាមបទបញ្ជា និងបញ្ជូនទៅពន្ធនាគារបន្ទាប់ពីតុលាការចេញដីកាឃុំខ្លួន៕

អត្ថបទ៖ មករា