ប្រឡងឌីប្លូម បេក្ខជន​​ម្នាក់ ដាក់​ប្រឡង​បន្ទប់​ដាច់​ដោយ​​ឡែក

ភ្នំពេញ៖ លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡាបានបញ្ជាក់ថា ថ្ងៃទី១នៃការប្រឡងឌីប្លូម មិនមិនមាន​បេក្ខជនដែលមានកម្តៅ​លើស​៣៧,៥​អង្សាទេ។ ប៉ុន្តែមានករណីបេក្ខជនប្រឡងម្នាក់ ដែលទើបតែជាសះស្បើយពីជំងឺ​កូវីដ​១៩ ដោយបានអនុញ្ញាតឱ្យប្រឡងនៅបន្ទប់ដាច់ដោយឡែកដែលសាលាបានរៀបចំត្រៀមទុក។

លោក ហែម ស៊ីណារ៉េត បានមានប្រសាសន៍ថា ក្រៅពីនេះគ្រប់មណ្ឌលប្រឡងដំណើរការធម្មតា ពុំមានបញ្ហាអ្វីគួរឲ្យ​កត់​សម្គាល់ទេ។ ដោយនៅតាមតាមមណ្ឌលនីមួយៗ បានអនុវត្តតាមការណែនាំបានល្អប្រសើរ ហើយគ្រប់ច្រកចូលក្នុងមណ្ឌលមានឧបករណ៍បាញ់អាល់កុល និងវាស់កំដៅ និងមានការរៀបចំបន្ទប់បំរុងសម្រាប់ដាក់បេក្ខជនប្រឡង ដែលបានវាស់ហើយកំដៅលើសពី៣៧.៥អង្សាសេឡើងទៅហើយទាំងលោកគ្រូ អ្នកគ្រូនិងសិស្សានុសិស្សសុទ្ធតែពាក់ម៉ាស់ទាំងអស់គ្នា ដើម្បីការពារការឆ្លរាលដាលជំងឺកូវីដ១៩។

បើ​ប្រធានមន្ទីរអប់រំយុវជននិងកីឡាមានប្រសាសន៍ថា ការប្រឡងសញ្ញាបត្រមធ្យមសិក្សាបឋមភូមិឬឌីប្លូមនៅថ្ងៃទី១ នៅមណ្ឌលប្រឡងរាជធានីភ្នំពេញ មានបេក្ខជនអវត្តមានចំនួន ៦៦២នាក់ ក្នុងចំណោមបេក្ខជនដែលបានដាក់ពាក្យប្រឡងជិត ១៦០០០នាក់។

លោកប្រធានមន្ទីរបានបញ្ជាក់​ថា ការអវត្តមានបេក្ខជនប្រឡងនេះមិនមែនទើបតែមាននៅឆ្នាំនេះទេ គឺជារៀងរាល់ឆ្នាំក៏មានបេក្ខជនអវត្តមានដូចគ្នា គ្រាន់តែមានចំនួនតិចឬច្រើនប៉ុណ្ណោះ។ ចំពោះបេក្ខជនអវត្តមានប្រឡងនេះដែរមិនមែនមានតែនៅមណ្ឌលប្រឡងរាជធានីភ្នំពេញនោះទេ នៅទូទាំងប្រទេសក៏មានដែរ។

លោក រស់ សុវាចា អ្នកនាំពាក្យក្រសួងអប់រំយុវជននិងកីឡាមានប្រសាសន៍ថា ដូចឆ្នាំកន្លងមកដែរ បេក្ខជនប្រឡង​ឌីប្លូម​មួយចំនួនតូចអវត្តមាននៅថ្ងៃទី១នៃការប្រឡងឌីប្លូម ដោយសារមូលហេតុបុគ្គលក្នុងចំណោមបេក្ខជនដាក់ពាក្យប្រឡងចំនួន១៦២ ៥៨៩ នាក់។

យ៉ាងណាក៏ដោយ លោក រស់សុវាចា បានអះអាងថា ជាទូទៅដំណើការប្រឡងឌីប្លូមនាថ្ងៃ១៥ វិច្ឆិកា ២០២១ កំពុងប្រព្រឹត្តិទៅ ដោយមានលទ្ធផលអាចទទួលយកបានហើយការប្រឡងឌីប្លូមត្រូវបន្តអនុវត្តន៍គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានស្របនឹងវិធានការសុវត្ថិភាពសុខភាព»។

គួរបញ្ជាក់ថា ការប្រឡងសញ្ញាបត្រមធ្យមសិក្សាបឋមភូមិនៅឆ្នាំនេះនឹងប្រព្រឹត្តិទៅនៅថ្ងៃទី១៥និង១៦ខែ វិច្ឆិកា ២០២១​និងប្រកាសលទ្ធផលប្រឡងនៅ ថ្ងៃទី២២ ខែវិច្ឆិកាឆ្នាំ២០២១ខាងមុខនេះ៕

អត្ថបទ៖ សំអឿន