ក្រសួងប្រកាសឱ្យអាជ្ញាធរពោធិ៍សាត់ និងពលរដ្ឋរស់នៅតាមដឹងស្ទឹង ត្រៀមរកទីទួលសុវត្ថិភាព

ក្រសួងធនធានទឹក និងឧតុនិយម នៅថ្ងៃទី ១៦ ខែវិច្ឆិកា ឆ្នាំ ២០២១ នេះ បានប្រកាសឱ្យអាជ្ញាធរ និងប្រជាពលរដ្ឋរស់នៅតាមដងស្ទឹងពោធិ៍សាត់ និងស្ទឹងពាក់ព័ន្ធ ត្រៀមរកទីទួលសុវត្ថិភាពសម្រាប់ជម្លៀសប្រជាពលរដ្ឋ ដែលងាយរងគ្រោះ។

ក្រសួងឱ្យដឹងថា ស្ថានភាពទឹកស្ទឹងពោធិ៍សាត់មានកម្ពស់កើនឡើងដល់កម្រិតប្រកាសអាសន្ន ដោយសារមានភ្លៀងធ្លាក់ពីតំបន់ជួរភ្នំក្រវាញ ស្ទឹងអារ៉ៃ ស្ទឹងធំ និងស្ទឹងព្រៃខ្លុង។

ក្រសួងធនធានទឹកបញ្ជាក់ថា ឥទ្ធិពលនៃទឹកស្ទឹងខាងលើនេះ នឹងធ្វើឱ្យទឹកស្ទឹងពោធិ៍សាត់មានសន្ទុះកើនឡើងបន្តបន្ទាប់ នឹងអាចបង្កឱ្យមានទឹកជំនន់ក្នុងខេត្តពោធិ៍សាត់។

សេចក្ដីជូនដំណឹងបញ្ជាក់ថា “អាជ្ញាធរក្រុង ស្រុក ឃុំ សង្កាត់គ្រប់លំដាប់ថ្នាក់ និងប្រជាពលរដ្ឋទូទាំងខេត្តពោធិ៍សាត់ ពិសេសប្រជាពលរដ្ឋរស់នៅតាមដងស្ទឹងពោធិ៍សាត់ និងស្ទឹងពាក់ព័ន្ធ សូមបង្កើនការយកចិត្តទុកដាក់ ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ត្រៀមរកទីទួលសុវត្ថិភាពសម្រាប់ជម្លៀសប្រជាពលរដ្ឋ ដែលងាយរងគ្រោះ“៕