សម្តេចតេជោ៖ ការផ្តល់ថវិកា និងវ៉ាក់សាំងដល់ឡាវ ជាការដឹងគុណមិត្តភ័ក្ដិ​នៅពេលជួបការលំបាក

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍ថា ការផ្តល់ថវិកា និងការផ្តល់វ៉ាក់សាំង ដល់បណ្តាប្រទេសផ្សេងៗ ដូចជា ឡាវ និងវៀតណាមជាដើម គឺជាការដឹងគុណមិត្តភ័ក្ដិ​ ក្នុងពេលដែលមិត្តជួបការលំបាក ខណៈដែលកម្ពុជាមានលទ្ធភាព។

សម្តេចតេជោ ហ៊ុន សែន បានបញ្ជាក់យ៉ាងដូច្នេះថា៖ «ផ្ដល់ជំនួយទៅក្រៅគេបន្ទោសយើង ប៉ុន្តែខ្ញុំសូមជម្រាបថា កម្ពុជាដឹងគុណគេ ពេលដែលលំបាកបំផុតនៅឆ្នាំ១៩៧៩ ឡាវនៅពេលនោះ ក៏លំបាក វៀតណាម នៅពេលនោះក៏លំបាក…សុទ្ធតែថា ប្រជាពលរដ្ឋឯងស៊ីមិនគ្រប់ឲ្យតែគេ។ ពេលហ្នឹង ប្រជាជនឡាវ និងប្រជាជនវៀតណាម មិនទាន់មានអីស៊ីគ្រប់ទេ តែគេជួយយើង ហេតុអីយើងមិនជួយមិត្តភ័ក្ដិ​វិញនៅពេលមិត្តជួបការលំបាក»។

បើតាមសម្ដេចតេជោ ហ៊ុន សែន កម្ពុជា បានជួយឡាវច្រើនជាងវៀតណាម ដោយសារតែប្រទេសឡាវលំបាកខ្លាំង។ កម្ពុជា ជួយឡាវសរុបប្រមាណ១៣លានដុល្លារ រួមទាំងវ៉ាក់សាំង៥០ ម៉ឺនដូស និងមានរថយន្តថែមទៀត។ ដូច្នេះ ទោះបីជា នរណាតិះទៀន ក៏តិះទៀនទៅ ហើយកម្ពុជា មិនធ្វើតែត្រឹមប៉ុណ្ណេះទេ គឺជួយរហូតទៅដល់ប្រទេសនៅអាហ្វ្រិកថែមទៀត ដែលមានស៊ូដង់ខាងត្បូង ម៉ាលី អាហ្វ្រិកកណ្ដាល ឆាដ សាយប្រឹះ និងសិរីផងដែរ។ នេះគឺជាការបង្ហាញនូវទឹកចិត្តរបស់កម្ពុជា។

សម្តេចតេជោ ហ៊ុន សែន បានបញ្ជាក់ថា ប្រទេសជប៉ុន ក៏ដូចជាប្រទេសផ្សេងៗទៀត គេក៏លំបាកដែរ ប៉ុន្តែគេជួយកម្ពុជាបាន។ ហេតុដូច្នេះហើយ កម្ពុជាត្រូវតែជួយគេវិញនៅពេលដែលកម្ពុជាមានលទ្ធភាព។ សម្តេចតេជោ ហ៊ុន សែន  បានលើកឡើងទាំងនេះ នៅក្នុងពិធីសម្ពោធដាក់ឲ្យប្រើប្រាស់ជាផ្លូវការផ្លូវចំនួន៣៧ខ្សែ និងអាងប្រព្រឹត្តកម្មទឹកខ្វក់ចំនួន៣ និងសមិទ្ធផលនានា ក្នុងក្រុងព្រះសីហនុ នាព្រឹកថ្ងៃទី០២ ខែធ្នូ ឆ្នាំ២០២១នេះ៕

អត្ថបទ៖ កោះកែវ