អាជីវករផ្សារបឹងឈូកតវ៉ា សុំ​លក់​ដូរ​នៅទីតាំង​ចាស់​វិញ

ខេត្តបាត់ដំបង÷ ក្រុមអាជីវករចំនួន ៥៣៧នាក់ តំណាងឲ្យអាជីវករ​ផ្សារ​បឹងឈូក​ជាច្រើននាក់​ទៀត បាន​ធ្វើ​ការ​តវ៉ា​ក្រោយ​ពេល​​អាជ្ញាធរ​បាន​ផ្លាស់ប្តូរទីតាំង​ចាស់ ក្រោមហេតុផលរៀបចំសណ្តាប់ធ្នាប់។

បើ​តាម​អាជីវករ​ដែល​ចេញ​តវ៉ាកាល​ពី​ម្សិលមិញបានឲ្យកម្ពុជាថ្មីដឹងថា ដោយសាតែទីតាំងលក់ដូរថ្មីលក់ដូរមិនសូវដាច់ធ្វើឲ្យប៉ះពាល់សេដ្ឋកិច្ចគ្រួសារធ្ងន់ធ្ងរ ទើបពួកគាត់ធ្វើការតវ៉ារហូតដល់មានដំណោះស្រាយ។

អាជីវករម្នាក់ឈ្មោះ “ចែម៉ាប់”តំណាងឲ្យអាជីវករទាំង៥៣៧នាក់បានបញ្ជាក់ថា ក្រោយការសុំឲ្យលោកអភិបាលខេត្តដែល​ទើបទទួលតួនាទីថ្មីជួយសម្រួលឲ្យ​ពួកគាត់​លក់ដូរកន្លែងចាស់តែគ្មានដំណោះស្រាយ ទើបនៅថ្ងៃទី ២០ ខែធ្នូម្សិលមិញពួកគាត់បន្តការតវ៉ាសុំកិច្ចអន្តរាគមន៍បន្តទៀត ពីសំណាក់តំណាងរាស្ត្រមណ្ឌល់បាត់ដំបង។

ក្រុមអាជីវករបន្តថា ការតវ៉ាកាលពីម្សិលមិញ ពួកគាត់បានប្រមូលផ្តុំគ្នា​នៅមុខការិយាល័យនៃមន្ទីររដ្ឋសភា និងព្រឹទ្ធសភាខេត្តនៅវេលាម៉ោង០៨និង០០នាទីព្រឹក ក្នុងគោលបំណងសុំឲ្យលោកចាន់ សុផល តំណាងរាស្ត្រជួយអន្តរាគមន៍ តែត្រូវអវត្តមានលោកតំណាងរាស្ត្រ ដោយជាប់រវល់បំពេញការងារនៅឆ្ងាយ ទើបក្រុមអាជីវករសម្រេចបន្តប្រមូលផ្តុំគ្នាម្តងទៀតក្នុង​ថ្ងៃដដែលនៅវេលាម៉ោង០៣និង៣០នាទីរសៀល នៅសួនច្បារទល់មុខគេហដ្ឋានរបស់សម្តេចក្រឡាហោមស ខេង ដើម្បីសុំកិច្ចអន្តរាគមន៍។

រហូតដល់ល្ងាចថ្ងៃដដែល មន្ត្រីរដ្ឋបាលខេត្តរួមលោកផេង សិទ្ធី អភិបាលក្រុង បាន​មកធ្វើការសម្របសម្រួលឲ្យក្រុមអាជីវករ​ត្រឡប់ទៅគេហដ្ឋានរៀងៗខ្លួនវិញ ខណះដែលពួកគាត់បានឆ្លើយតបលោកអភិបាលក្រុងថានឹងបន្តការតវ៉ាបន្តទៀត រហូតដល់មានដំណោះស្រាយសមស្របណាមួយដល់ពួកគាត់៕

អត្ថបទ៖ សៅ សារិទ្ធ