បើកភ្នែកឡើង ឃើញតែអាជ្ញាធរកាន់អំបោស និងប៉ែលកើបដីខ្សាច់កំពប់លើផ្លូវ

ភ្នំពេញ៖ កម្លាំងអាជ្ញាធរតែងនាំគ្នាកាន់អំបោស និង ចប ប៉ែល កើបដីខ្សាច់ដែលជ្រុះលើផ្លូវជាតិលេខ១ ដែលបង្កដោយរថយន្តដឹកដីធ្វើឱ្យជ្រុះលើផ្លូវ។

ជាក់ស្តែងនៅព្រឹកថ្ងៃទី០៥ ខែមីនានេះ គេឃើញអាជ្ញាធរសង្កាត់វាលស្បូវ និងកម្លាំងប្រជាការពារសាលាខណ្ឌច្បារអំពៅ បាននាំគ្នាចុះបោសសំអាតផ្លូវជាតិលេខ១ តាំងពីព្រលឹមអុរ ព្រោះបើពុំកើប និងប្រមូលទេ នោះច្បាស់ជាហុយលើអ្នកធ្វើដំណើជាក់ជាពុំខាន។

យោងតាមប្រភពពីលោកស្រី យន់ សុផល ចៅសង្កាត់វាលស្បូវបានឱ្យដឹងថា សកម្មភាពធ្វើពលកម្មបោសសំអាតផ្លូវនេះគឺអាជ្ញាអរសង្កាត់វាលស្បូវតែងធ្វើឡើងសឹងរាល់ថ្ងៃ ឱ្យតែផុតម៉ោងរដ្ឋបាល។ លោកស្រីចៅសង្កាត់ បានសំណូមពរដល់ម្ចាស់រថយន្តដឹកដី ត្រូវដាក់គម្របទ្រុងកុំឱ្យដីហុយជ្រុះលើផ្លូវ ដែលជាផលលំបាកដល់អ្នកធ្វើដំណើរ ក៏ដូចជាអាជ្ញាធរដែលត្រូវបោសសំអាត។

បើតាមការបញ្ជាក់ពី លោក គុយ គឹមហ៊ាង ប្រធានការិយាល័យសាធារណៈការ សាលាខណ្ឌច្បារអំពៅ បានឱ្យដឹងថា ចំពោះវិធានការណ៍ទប់ស្កាត់ក៏ដូចជាចាប់ឃាត់រថយន្តដឹកដីធ្វើឱ្យកំពប់លើផ្លូវនេះ លោកបានទទួលស្គាល់ថា មកដល់ថ្ងៃនេះនៅតែមានរថយន្តដឹកដីបង្កឱ្យជ្រុះលើផ្លូវ ជាពិសេសពួកគេដឹកពេលយប់ជ្រៅ ក្នុងពេលដែលសមត្ថកិច្ចក៏ដូចជាអាជ្ញាធរសម្រាក។ ប៉ុន្តែទោះជាយ៉ាងណា អាជ្ញាធរនឹងមានវិធានការណ៍តឹងរឹងចំពោះម្ចាស់អាជីវកម្ម និងម្ចាស់រថយន្តដឹកដីឱ្យចូលរួមថែរក្សាបរិស្ថាន កុំជិះសេះលែងដៃបន្តទៀត៕

អត្ថបទ៖ នរា