ប្រើម៉ូទ័រ​បូមទឹក​តាមច្បាប់​មិន​អនុញ្ញាត​ ប៉ុន្តែ​សម្ពាធទឹកខ្សោយ ​ពលរដ្ឋ​ត្រូវ​បង្ខំចិត្ត​បូមទើប​មាន​ទឹក​ប្រើ

អគ្គនាយករដ្ឋាករទឹកស្វយ័តក្រុងភ្នំពេញ លោក ឡុង ណារ៉ូ មានប្រសាសន៍ថា តាមបច្ចេកទេសច្បាប់ គឺមិនអនុញ្ញាតឱ្យបងប្អូនប្រជាពលរដ្ឋប្រើម៉ូទ័របូមទឹកនោះទេ ប៉ុន្តែដោយសាររាជធានីភ្នំពេញ នៅខ្វះទឹកប្រើប្រាស់ និងសម្ពាធទឹកខ្សោយ ប្រជាពលរដ្ឋត្រូវធ្វើតាមរយៈការបូបនេះ ទើបមានទឹកប្រើ។

លោក ឡុង ណារ៉ូមានប្រសាសន៍ថា “អ្វីដែលខ្ញុំបាននិយាយ តាមច្បាប់គឺមិនឱ្យបូមទេ ប៉ុន្តែដោយសារយើងចែកទឹកគ្នាប្រើ វាដាច់ខាតប្រជាជនមានបណ្ដាញយើងហើយ ហើយគាត់អត់​មានទឹកប្រើ ដាច់ខាតត្រូវតែធ្វើតាមរយៈនេះ បានអាចមានទឹកប្រើប្រាស់ ជាពិសេសពេលយប់”។

អគ្គនាយករដ្ឋាករទឹករូបនេះ បញ្ជាក់ថា ពេលខ្លះសម្ពាទទឹកមិនឡើងដល់ជាន់លើទេ ការអភិវឌ្ឍនៃវិស័យទឹកស្អាត កើនរហូតដល់ឆ្នាំ ២០២៣ និង២០២៤ គឺម៉ូទ័របូមទឹកលែងមានហើយ ដូចកាលពីឆ្នាំ ២០១០ មិនមានផ្ទះណាមានម៉ូទ័រទេ។

កង្វះទឹកស្អាតនៅរាជធានីភ្នំពេញ សម្រាប់ប្រជាពលរដ្ឋប្រមាណជាង ២ សែន ម៉ែត្រគូប ជាពិសេសអ្នករស់នៅតំបន់ជាយក្រុងដូចជាខណ្ឌពោធិ៍សែនជ័យ ខណ្ឌ​ដង្កោ និងខណ្ឌកំបូល។

រដ្ឋាករទឹក​ស្វយ័តក្រុងភ្នំពេញបញ្ជាក់ថា តម្រូវការទឹកស្អាត​ប្រើប្រាស់សម្រាប់ប្រជាជន​ទាំងអស់ក្នុង​រាជ​ធានី​ភ្នំពេញ​​ក្នុងមួយ ថ្ងៃមានរហូតដល់ទៅ ៨ សែន ម៉ែត្រគូប ​ខណៈ​សមត្ថភាព​រោង​ចក្រ​ផលិត​ទឹក​ស្អាតបានតែ ៦ សែនម៉ែត្រគូបក្នុងមួយថ្ងៃ ហើយនៅឆ្នាំ ២០២៣ ខាងមុខនេះ ប្រជាពលរដ្ឋនឹងលែងដាច់ទឹកទៀតហើយដោយសារសមត្ថភាពផលិតនឹងកើនដល់ ១ លានម៉ែត្រគូប៕

អត្ថបទ៖ ឡេង ដេត