បាក់ទំនប់ស្តុកទឹករបស់ក្រុមហ៊ុនចម្ការចេក ហ័ងអញ់ វៀតណាម លិចផ្ទះពលរដ្ឋជាង១០០ខ្នង (មានវីដេអូ)

ក្រុមហ៊ុនចម្ការចេកហ័ងអញ់ វៀតណាម បានស្តុកទឹកទុកមិនប្រយ័ត្នបណ្ដាលឲ្យបាក់ទំនប់ជន់លិចផ្ទះប្រជាពលរដ្ឋជាង១០០ខ្នង កាលពីវេលាម៉ោង៤ល្ងាច ថ្ងៃទី១៨ ខែឧសភា ឆ្នាំ២០២២ ស្ថិតនៅក្នុងឃុំស្រែអង្គ្រង ស្រុកកូនមុំ ខេត្តរតនគិរី។

បើយោងតាមប្រភពព័ត៌មានពីប្រជាពលរដ្ឋដែលជាអ្នកលេងបណ្ដាញសង្គមហ្វេសប៊ុកបានឲ្យដឹងថា នៅវេលាម៉ោង៤ល្ងាច ថ្ងៃទី១៨ ខែឧសភា ឆ្នាំ២០២២ នៅក្នុងទីតាំងក្រុមហ៊ុនហ័ងអញ់ វៀតណាម ស្ថិតក្នុងឃុំស្រែអង្គ្រង ស្រុកកូនមុំ ខេត្តរតនគិរី ពិតជាមានហេតុការណ៍ទឹកជន់លិចជម្រករស់នៅរបស់ប្រជាពលរដ្ឋយ៉ាងពិតប្រាកដ។

លោក សេក ហៃ អភិបាលស្រុកកូនមុំ បានឲ្យកម្ពុជាថ្មី ដឹងនៅព្រឹកថ្ងៃទី២០ ខែឧសភាថា ពិតជាមានករណីទឹកជន់លិចផ្ទះបងប្អូនប្រជាពលរដ្ឋប្រាកដមែន ប៉ុន្តែទឹកជំនន់ដែលធ្វើឲ្យលិចផ្ទះរបស់បងប្អូនប្រជាពលរដ្ឋ មិនមែនដូចទឹកជំនន់ជន់លិចរៀងរាល់ឆ្នាំនោះទេ វាគ្រាន់តែជាការបាក់ទំនប់របស់ក្រុមហ៊ុនចម្ការចេក ដោយសារក្រុមហ៊ុនបានស្តុកទឹកទុក។ ប៉ុន្តែដោយសារមេឃមានភ្លៀងធ្លាក់ខ្លាំងប៉ុន្មានថ្ងៃនេះ ទើបទឹកបុកបាក់ទំនប់ ជាហេតុធ្វើឲ្យទឹកហូរគ្របមកលិចផ្ទះសម្បែងរបស់ប្រជាពលរដ្ឋ។

លោកអភិបាលស្រុកបន្តថា ត្រឹមតែ២ម៉ោងប៉ុណ្ណោះ ទឹកក៏ស្រកទៅវិញអស់ ហើយប្រជាពលរដ្ឋអត់មានប៉ះពាល់អ្វីនោះទេ ព្រោះអាជ្ញាធរស្រុក-ឃុំ​ជាមួយកម្លាំងប្រដាប់អាវុធបានចុះអន្តរាគមន៍ជួយបងប្អូន​ប្រជាពលរដ្ឋ​ទាន់ពេល មិនឲ្យប៉ះពាល់ដល់អាយុជីវិតរបស់ពួកគាត់នោះទេ គ្រាន់តែខូចខាតផ្ទះសម្បែងជាង១០០ខ្នង និងសម្ភារៈមួយចំនួនប៉ុណ្ណោះ។

លោក សេក ហៃ បានបន្ថែមទៀតថា ជុំវិញករណីនេះ លោកនឹងឲ្យជំនាញធ្វើការស្រង់ស្ថិតិឲ្យបានជាក់លាក់ និងស្នើសុំទៅខាងកាកបាទក្រហមជួយជាជំនួយដល់ពួកគាត់ និងពិភាក្សាជាមួយក្រុមហ៊ុនដើម្បី​ឲ្យក្រុមហ៊ុនជួយពួកគាត់រកទីទួលមានសុវត្ថិភាពដើម្បីសាងសង់លំនៅដ្ឋានជូនពួកគាត់រស់នៅបណ្ដោះអាសន្នសិន៕

អត្ថបទ៖ វុទ្ធឦសាន