អ្នកនេសាទខ្នាតតូចចុះនេសាទវិញ ក្រោយ​អាជ្ញាធរ​ស្តារកំប្លោក​ចេញអស់

អ្នកនេសាទខ្នាតតូច ដែលប្រកបអាជីពលើផ្ទៃទឹកទន្លេបាសាក់ម្តុំច្បារអំពៅបានចុះទូកនេសាទវិញ បន្ទាប់ពីដើមកំប្លោកត្រូវបានស្តារចេញ។

លោក លី ហួត ជំនួយការសាលាសង្កាត់ច្បារអំពៅទី១បានប្រាប់កម្ពុជាថ្មីនៅថ្ងៃទី២៦ខែឧសភានេះថា ចាប់តាំងពីដើមកំប្លោកត្រូវបានស្តាចេញ​អស់នាថ្ងៃទី២៤ខែឧសភាមក គឺបងប្អូនអ្នកនេសាទខ្នាតតូចបាននាំគ្នាចុះទូកនេសាទក្នុងទន្លេបាសាក់ឡើងវិញ បន្ទាប់ពីខកខានដោយដើមកំប្លោក ដែលអណ្តែតមកពេញលើផ្ទៃទន្លេសឹងរកចន្លោះបើកទូកមិនបាន។

លោក លី ហួត បានបញ្ជាក់ថា ដើមកំប្លោកត្រូវអាជ្ញាធរនឹងអ្មកនេសាទនាំគ្នាស្តាចេញឡើងគោកព្រោះបើមិនស្តាគឺនៅពេញផ្ទៃទឹកដដែល។

តាមការអះអាងពី អ្នកនេសាទឈ្មោះ ឯល អុីសា បានប្រាប់ថា ពួកគាត់ត្រូវបានផ្អាកការនេសាទអស់រយះពេលជិតកន្លះខែ ដោយសារតែដើមកំប្លោកអណ្តែតមកលើផ្ទៃទន្លេយ៉ាងណែនតាន់តាប់រកផ្លូវចែវទូកមិនបាន បើទោះជាប្រើប្រាស់ទូកម៉ាសុីនក្តី។ ទោះជាយ៉ាងណាក៏ដើមកំប្លោកនៅបន្តអណ្តែតពីទន្លេសាបជាបន្តបន្ទាប់តាមរដូវកាលជារៀងរាល់ឆ្នាំមក៕

អត្ថបទ៖​ នរា