សម្ដេចតេជោ ហ៊ុន សែន ៖ កម្ពុជា ក៏ទទួលរងផលប៉ះពាល់ពីនយោបាយ «សូន្យកូវីដ» របស់ចិនដែរ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ប្រទេសកម្ពុជា ក៏ទទួលរងផលប៉ះពាល់ពីនយោបាយ «សូន្យកូវីដ» របស់ប្រទេសចិនដែរ តែកម្ពុជាក៏យោគយល់ចំពោះកិច្ចការពារខ្លួន របស់ប្រជាជនចិនផងដែរ។

ការលើកឡើង របស់សម្ដេចតេជោ ហ៊ុន សែន បានធ្វើឡើងក្នុងពិធីបិទសន្និបាតបូកសរុបការងារទេសចរណ៍ ការបូកសរុបផែនការស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិជំងឺកូវីដ-១៩ ដំណាក់កាលទី ១ (២០២០-២០២១) និងឆមាសទី ១ ឆ្នាំ ២០២២ និងលើកទិសដៅផែនការស្តារឡើងវិញ នូវវិស័យទេសចរណ៍ក្នុងដំណាក់កាលទី ២ (ឆមាសទី២ ឆ្នាំ២០២២-២០២៣) នាព្រឹកថ្ងៃទី ១៤ ខែកក្កដា ឆ្នាំ ២០២២នេះ។

សម្ដេចតេជោនាយករដ្ឋមន្ត្រី បានថ្លែងដោយលើកឡើង អំពីបញ្ហាទាក់ទងនឹងការការពារខ្លួនរបស់ប្រទេសចិន ទៅលើនយោបាយសូន្យកូវីដ ដោយប្រទេសជាច្រើន មិនថាតែតំបន់អាស៊ីទេ សូម្បីតែតំបន់អឺរ៉ុប ក៏ត្រូវការទេសចរណ៍ចិនផងដែរ ដែលមានអ្នកទេសចរណ៍ច្រើនជាងគេ។

សម្ដេចតេជោ ហ៊ុន សែន បានថ្លែបន្តថា «ប៉ុន្តែនៅពេលដែលចិនអនុវត្ត នូវវិធានការសូន្យកូវីដនេះ បានធ្វើឲ្យមានការប៉ះពាល់ទៅលើបញ្ហាការដឹកជញ្ជូន ប៉ុន្តែធំជាងគេគឺបញ្ហាទាក់ទិននឹងពលរដ្ឋរបស់ចិន ដែលត្រូវធ្វើដំណើរមកកាន់បណ្ដាប្រទេសនានា»។

សម្ដេចតេជោ ហ៊ុន សែន បានបញ្ជាក់ដែរថា ប្រទេសកម្ពុជា ក៏រងផលប៉ះពាល់ពីនយោបាយសូន្យកូវីដរបស់ប្រទេសចិននេះដែរ ក៏ប៉ុន្តែកម្ពុជាក៏យោគយល់ចំពោះកិច្ចការពារខ្លួន របស់ប្រជាជនចិន ដើម្បីអនុវត្តនូវការការពារខ្លួន កុំឲ្យមានមនុស្សស្លាប់នៅក្នុងប្រទេសចិន៕

អត្ថបទ៖ ឃួន សុភ័ក្រ