ប្រធានាធិបតីកូរ៉េខាងត្បូង ដឹកនាំគណៈប្រតិភូជាន់ខ្ពស់ អញ្ជើញមកដល់ប្រទេសកម្ពុជាហើយ

លោកប្រធានាធិបតីកូរ៉េខាងត្បូង Yoon Suk-yeol បានដឹកនាំគណៈប្រតិភូជាន់ខ្ពស់ អញ្ជើញមកដល់ព្រះរាជាណា ចក្រកម្ពុជា តាមជើងយន្តហោះពិសេស KG 001 នៅវេលាម៉ោង ១២ និង ៤៧នាទី នៅរសៀលថ្ងៃទី ១១ ខែ វិច្ឆិកា ឆ្នាំ ២០២២នេះ។ ជាការកត់សម្គាល់ ភរិយារបស់លោកប្រធានាធិបតីកូរ៉េខាងត្បូង ក៏បានអមដំណើរមកប្រទេសកម្ពុជា ផងដែរ។

លោក សាយ សំអាល់ រដ្ឋមន្រ្តីក្រសួងបរិស្ថាន និងលោកស្រី ជ្រឹង បុទុមរង្សី ឯកអគ្គរាជទូត​កម្ពុ​ជាប្រចាំ​ប្រទេស​កូរ៉េខាងត្បូង ជាអ្នកទទួលបដិ​សណ្ឋាកិច្ចស្វាគមន៍ លោកប្រធានាធិបតីកូរ៉េខាងត្បូង និងភរិយា ព្រមទាំងគណៈប្រតិភូ។

សូមជម្រាបថា លោក Yoon Suk-yeol ប្រធានាធិបតីកូរ៉េខាងត្បូង ដឹកនាំគណៈប្រតិភូជាន់ខ្ពស់ អញ្ជើ​ញមកប្រទេស កម្ពុជា ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ដែលកម្ពុជាទទួលរៀបចំធ្វើជាម្ចាស់ផ្ទះ ចាប់ពីថ្ងៃទី ១០ ដល់ថ្ងៃទី ១៣ ខែវិច្ឆិកា ឆ្នាំ ២០២២៕