ទីប្រឹក្សារាជរដ្ឋាភិបាល៖ ការរៀបចំកិច្ចប្រជុំកំពូលអាស៊ាននៅកម្ពុជា ទទួលបានជោគជ័យយ៉ាងត្រចះត្រចង់

លោក យឿន យឿត ទីប្រឹក្សារាជរដ្ឋាភិបាលកម្ពុជា បានលើកឡើងថា ក្នុងនាមប្រជាពលរដ្ឋមួយរូប សូមអបអរសាទរ នូវលទ្ធផលជាផ្លែផ្កាយ៉ាងត្រចះត្រចង់របស់កម្ពុជា ក្នុងការរៀបចំកិច្ចប្រជុំកំពូលអាស៊ានលើកទី៤០-៤១ ព្រមទាំងកិច្ចប្រជុំពាក់ព័ន្ធនានា ខណៈកិច្ចប្រជុំនេះមានថ្នាក់ដឹកនាំបណ្តាប្រទេសនៅលើពិភពលោកចូលរួមជាច្រើននោះ។

ប្រទេសកម្ពុជា បានរៀបចំកិច្ចប្រជុំកំពូលអាស៊ាន លើកទី៤០-៤១ ព្រមទាំងកិច្ចប្រជុំពាក់ព័ន្ធនានា ចាប់ពីថ្ងៃទី១០ រហូតដល់ថ្ងៃទី១២ខែវិច្ឆិកា ឆ្នាំ២០២២ក្នុងទីក្រុងភ្នំពេញ នៃព្រះរាជាណាចក្រកម្ពុជា ដែលមានមេដឹកនាំ មកពីបណ្ដាប្រទេសជាសមាជិក និងដៃគូសហការជាច្រើន បានអញ្ជើញចូលរួម។ លោក យឿន យឿត បានលើកឡើងថា វត្តមាននៃបណ្ដាមេដឹកនាំទាំងអស់នៅក្នុងប្រទេសកម្ពុជានាពេលនេះ បានឆ្លុះបញ្ជាំង អំពីសុខសន្តិភាព សុវត្ថិភាព ពេញលេញ របស់កម្ពុជា ក្រោមការដឹកនាំដ៏ត្រឹមត្រូវបំផុតពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ។

តាមរយៈនៃកិច្ចប្រជុំនានា ក្នុងឱកាសនេះ កម្ពុជាទទួលបាននូវលទ្ធផលជាផ្លែផ្កា ជាច្រើនពីដៃគូសហការ រួមមានទាំង ចិន អាមេរិក ជប៉ុន កូរ៉េខាងត្បូង អូស្រ្តាលី ឥណ្ឌា ណូវ៉េសាឡង់  និងបណ្ដាប្រទេសជាសមាជិកអាស៊ានដ៏ទៃទៀត។ផលប្រយោជន៍នៃកិច្ចប្រជុំដែលកម្ពុជាទទួលបាន គឺកិត្យានុភាពសម្រាប់ទុកឲ្យកូនខ្មែរជំនាន់ក្រោយចង់ចាំ ដូចអ្វីដែលសម្តេចតេជោ ហ៊ុន សែន មគ្គុទេសឯករបស់កម្ពុជា និងជាប្រធានអាស៊ានលោកបានមានប្រសាសន៍យ៉ាងដូច្នេះដែរ។

ជាមួយគ្នានេះ លោក យឿន យឿត ក៏សូមបួងសួងដល់គុណបុណ្យព្រះរតនត្រ័យ ទេវតាថែរក្សាទឹកដីនៃព្រះរាជាណាចក្រកម្ពុជា ព្រមទាំងវត្ថុស័ក្តិសិទ្ធិទាំងអស់ក្នុងលោក សូមព្រះអង្គតាមជួយបីបាច់ថែរក្សាការពារប្រោះព្រំនូវសព្ទ សាធុការពរជ័យគ្រប់ប្រការជូន សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រី សូមសមប្រកបដោយព្រះពុទ្ធពរដ៏ប្រពៃថ្លៃថ្លាបួនប្រការ គឺអាយុ វណ្ណៈ សុខៈ ពលៈ និងសូមសម្តេចបានប្រកបដោយសុវត្ថិភាពក្នុងការធ្វើដំណើរទៅចូលរួមកិច្ចប្រជុំ G20 នៅប្រទេសឥណ្ឌូនេស៊ី និងកិច្ចប្រជុំ APEC នៅទីក្រុងបាងកកប្រទេសថៃ៕