រូបសំណាក «ព្រាបស» ស្ថិតនៅតំបន់ភ្នំវល្លិភូមិចម្ការ ៣ ឃុំពងទឹក ស្រុកដំណាក់ចង្អើរ ខេត្តកែប ត្រូវបានដាក់សម្ពោធជាផ្លូវការនៅព្រឹកថ្ងៃទី ៦ ខែមករា ឆ្នាំ ២០២៣នេះ បន្ទាប់ពីដំណើរការសាងសង់អស់រយៈពេលជាងកន្លះឆ្នាំ។

រូបសំណាកព្រាបសបានចាប់ផ្តើមបើកការដ្ឋានសាងសង់នៅថ្ងៃទី ២០ ខែមេសា ឆ្នាំ២០២២ និងបញ្ចប់ការងារសាងសង់ជាស្ថាពរនៅថ្ងៃទី ១៩ ខែធ្នូ ឆ្នាំ២០២២ ដោយចំណាយថវិកាសរុប ១៤ ៣០០ ដុល្លារ​។

ពិធីសម្ពោធប្រារព្ធធ្វើឡើងក្រោមការចូលរួមរបស់លោក សោម ពិសិដ្ឋ អភិបាល​ នៃគណៈអភិបាលខេត្តកែប និងមន្ត្រីថ្នាក់ដឹកនាំមួយចំនួនទៀត។

លោក សោម ពិសិដ្ឋ អភិបាលខេត្តកែបមានប្រសាសន៍ថា ការសាងសង់រូបសំណាក ​«ព្រាបស»​ នៅលើទីតាំងនេះ គឺចង់បញ្ជាក់អំពីតម្លៃ និងនិមិត្តរូបនៃសន្តិភាព ដែលបើកឱកាសឱ្យយើងទាំងអស់គ្នាអភិវឌ្ឍសហគមន៍​ និងប្រទេសជាតិឱ្យមានការរីកចម្រើន។​

លោកអភិបាលខេត្តរម្លឹកថា តំបន់ភ្នំវល្លិនេះធ្លាប់ជាទីតាំង សមរភូមិសង្គ្រាមដ៏ក្តៅគគុក និងជាកន្លែងលាក់ខ្លួនធ្វើសកម្មភាពរបស់កងទ័ពខ្មែរក្រហម ប៉ុន្តែក្រោមនយោបាយ ឈ្នះ ឈ្នះ របស់សម្តេចតេជោ ហ៊ុន សែន នៅឆ្នាំ១៩៩៤ កម្លាំងទ័ពខ្មែរក្រហមបានធ្វើសមាហរណកម្មចូលរួមជាមួយរដ្ឋាភិបាល ភ្លើងសង្គ្រាមនៅទីតាំងនេះក៏បានរលត់ ប្រជាជនរស់នៅបានសុខសន្តិភាព ហើយបច្ចុប្បន្នបានប្រែក្លាយជាតំបន់អភិវឌ្ឍកសិកម្មដ៏មានសក្តានុពលរបស់ខេត្តកែប។

​បើតាមលោក សោម ពិសិដ្ឋ រូបសំណាក​ «ព្រាបស» ត្រដាងស្លាប នឹងធ្វើឱ្យអ្នកដំណើរតាមផ្លូវជាតិលេខ ៣៣ ងាកមកចាប់អារម្មណ៍ទីតាំងនៃតំបន់អេកូទេសចរណ៍ និងកសិទេសចរណ៍ភ្នំវល្លិ ដែលពោរពេញដោយទេសភាពដ៏ស្រស់បំព្រង ដែលគ្របដណ្តប់ទៅដោយដំណាំកសិកម្ម ព្រៃភ្នំដ៏ខៀវស្រងាត់ និងខ្យល់អាកាសបរិសុទ្ធ ហើយទៅថ្ងៃអនាគត ទីតាំងនេះ ក៏នឹងក្លាយទៅជាតំបន់កសិឧស្សាហកម្មផងដែរ៕

អត្ថបទ៖ ឡេង ដេត