រាជរដ្ឋាភិបាល​កំពុងសាងសង់ស្ដូបអនុស្សាវរីយ៍នយោបាយឈ្នះ-ឈ្នះ ​ស្ថិតនៅក្នុង​ភូមិសាស្ត្រក្បាល​ព្រលាន សង្កាត់អូរតាវ៉ៅ នៅក្រុងប៉ៃលិន ខេត្តប៉ៃលិន ដែលដឹកនាំកសាងដោយសម្ដេច ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន​គណៈកម្មការ​សាង​សង់​វិមានឈ្នះ-ឈ្នះ។

​លោកស្រី បាន ស្រីមុំ អភិបាល នៃគណៈអភិបាលខេត្តប៉ៃលិន បានឱ្យដឹងថា ការកសាងស្ដូបនេះ បង្ហាញពីវប្បធម៌កតញ្ញូ ការដឹងគុណ និងការចងចាំរំលឹកដល់វិរៈភាព និងភាពឈ្លាស​វៃរបស់ថ្នាក់​ដឹកនាំ។ ការស្វែងរកសន្តិភាពដែលបានបូជាសាច់ស្រស់ ឈាមស្រស់ បុព្វហេតុសន្តិភាព។

​ស្ដូបអនុស្សាវរីយ៍នយោបាយឈ្នះ-ឈ្នះ នៅខេត្តប៉ៃលិន នឹងក្លាយជា​ កន្លែងទេសចរប្រវត្តិសាស្ត្រ និងជាកន្លែងផ្ដល់ចំណេះដឹងដល់ប្រជាពលរដ្ឋឱ្យយល់ដឹង​នៅពេលអនាគត។

ការសាងសង់ស្តូបឈ្នះ-ឈ្នះ នៅក្រុងប៉ៃលិន ខេត្តប៉ៃលិននេះនឹងសាងសង់ឡើង ក្រោមការចូលរួមពីគ្រប់មជ្ឈដ្ឋានទាំងធនធានថវិកា គំនិត ប្រាជ្ញារបស់មន្រ្តីរាជការ កងកម្លាំងប្រដាប់អាវុធ ព្រះសង្ឃ ប្រជាជន បញ្ញវន្ត និស្សិត សិស្ស ដោយមិនគិតនិន្នាការនយោបាយឡើយ ហើយសំណង់និងតំបន់អភិវឌ្ឍនេះនឹងក្លាយទៅជាសំណង់ប្រវត្តិសាស្រ្តរាប់រយឆ្នាំ ជាកេរមរតកក្នុងសម័យតេជោសែនសម្រាប់មនុស្សជាតិគ្រប់ជំនាន់នៅលើទឹកដីកម្ពុជា៕