ព័ត៌មានអន្ដរជាតិ

ថាក់ស៊ីន ប្រឈមនឹងការជាប់ពន្ធនាគារ ១៥ឆ្នាំក្នុងសំណុំរឿងបរិហារកេរ្តិ៍ព្រះមហាក្សត្រ

បានផុស

១១ ខែ មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ (Thaksin Shinawatra) កំពុងត្រូវបានកាត់ទោសពីបទបរិហារកេរ្តិ៍ព្រះមហាក្សត្រ ដោយប្រឈមនឹងការជាប់ពន្ធនាគាររហូតដល់ ១៥ឆ្នាំ ចំពោះការអត្ថាធិប្បាយរិះគន់របបរាជាទៅកាន់ប្រព័ន្ធផ្សព្វផ្សាយកូរ៉េខាងត្បូងកាលពីមួយទសវត្សរ៍មុន។ នេះបើយោងតាមការចេញផ្សាយរបស់សារព័ត៌មានAl Jazeera កាលពីថ្ងៃទី១៦ខែកក្កដា។

លោក ថាក់ស៊ីន ស៊ីណាវ៉ាត្រ (រូបភាព៖ Bloomberg)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណុំរឿងនេះបានធ្វើឡើងនៅក្នុងបន្ទប់សវនាការឯកជនមួយក្នុងទីក្រុងបាងកក តែប៉ុន្មានសប្តាហ៍ប៉ុណ្ណោះ បន្ទាប់ពីកូនស្រីរបស់លោក គឺលោកស្រី ផែថងថាន ស៊ីណាវ៉ាត្រ (Paetongtarn Shinawatra) ត្រូវបានព្យួរតំណែងពីនាយករដ្ឋមន្ត្រីដោយតុលាការកំពូលរបស់ប្រទេសថៃ។

តំណាងអយ្យការបានចោទប្រកាន់ ថាក់ស៊ីន ថាបានបំពានច្បាប់ដ៏តឹងរឹងរបស់ប្រទេសថៃ ដែលហាមមិនឲ្យប្រមាថរាជវង្ស។ លោក ថាក់ស៊ីន បានផ្តល់សក្ខីកម្មនៅតុលាការជាច្រើនថ្ងៃ ខណៈមេធាវីរបស់លោកបាននិយាយថាថាក់ស៊ីននៅតែរក្សាភាពស្ងប់ស្ងាត់បើទោះបីជាត្រូវបានចោទប្រកាន់ក៏ដោយ។

គួររម្លឹកថាលោក ថាក់ស៊ីន បានត្រឡប់មកប្រទេសថៃវិញក្នុងខែសីហា ឆ្នាំ២០២៣ បន្ទាប់ពីរស់នៅបរទេសអស់រយៈពេល ១៥ឆ្នាំ។ ក្រោយពីត្រឡប់មកវិញ លោកត្រូវបានគេចាប់ដាក់គុកប្រាំបីឆ្នាំពីបទពុករលួយ ប៉ុន្តែក្រោយមកព្រះមហាក្សត្រ បានកាត់បន្ថយទោសមកត្រឹមមួយឆ្នាំ។ ការវិលត្រឡប់របស់លោកបានកើតឡើងក្នុងពេលដំណាលគ្នាដែលគណបក្សរបស់លោកភឿថៃឡើងកាន់អំណាចម្តងទៀតដែលធ្វើឱ្យមនុស្សសង្ស័យថាមានកិច្ចព្រមព្រៀងនយោបាយសម្ងាត់នៅពីក្រោយ។ អ្នកជំនាញជឿថាស្របពេលមានបញ្ហារង្គោះរង្គើនយោបាយថៃ គ្រួសារស៊ីណាវ៉ាត្រកំពុងបាត់បង់អំណាចក្នុងនយោបាយថៃហើយនៅពេលនេះ៕