រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានចាត់ទុកការប្រកួតប្រជែងអំណាចរវាងសហរដ្ឋអាមេរិក និង ចិនបានផ្ដល់ផលលំបាកដល់បណ្ដាប្រទេសដទៃជាច្រើនក្នុងការកែប្រែយុទ្ធសាស្ត្រ និងការប្រកាន់ជំហររបស់ខ្លួន ដើម្បីឆ្លើយតបនឹងស្ថានភាពផង និងការពារផលប្រយោជន៍ជាតិរៀងៗខ្លួនផង។

ក្នុងពិធីបើកសន្និបាតប្រចាំឆ្នាំរបស់ក្រសួងការបរទេស និងសហប្រតិបត្តិការអន្តរជាតិ នៅព្រឹកថ្ងៃទី១ ខែមីនា លោក ប្រាក់ សុខុន បានថ្លែងថា ក្នុងរយៈពេល ៥ឆ្នាំចុងក្រោយនេះ ពិភពលោកបានបន្តវិវត្តន៍ទៅរកប្រព័ន្ធអន្តរជាតិមួយដែលមានលក្ខណៈសកល ពហុប៉ូល​ និងមានភាពស្មុគស្មាញ។ លោករដ្ឋមន្ត្រី បានកត់សម្គាល់ឃើញថា ការវិវត្តន៍នេះបាននាំមកការផ្លាស់ប្តូរនៃទំនាក់ទំនងអន្តរជាតិយ៉ាងឆាប់រហ័ស និងប្រកបដោយគ្រោះថ្នាក់ទាំងក្នុងតំបន់អាស៊ីប៉ាស៊ីហ្វិក និងពិភពលោកទាំងមូល។  

លោករដ្ឋមន្ត្រី ប្រាក់ សុខុន បានបញ្ជាក់ថា ការវិវត្តន៍ទាំងនេះបានស្តែងចេញតាមរយៈនៃការប្រកួតប្រជែងកាន់តែតានតឹង និងស្មុគស្មាញរវាងមហាអំណាចធំទាំង២ គឺអាមេរិក និងចិន។ ត្រង់ចំណុចនេះ ប្រមុខការទូតកម្ពុជា បានអះអាងថា ការប្រកួតប្រជែងរវាងមហាអំណាចនេះ បានបង្កើតឲ្យមានស្ថានភាពដ៏លំបាកដល់បណ្ដាប្រទេសដទៃទៀតក្នុងការកែសម្រួលយុទ្ធសាស្ត្រ និងការប្រកាន់ជំហររបស់ខ្លួន ដើម្បីឆ្លើយតបនឹងការប្រែប្រួលទាំងនោះ និងការពារផលប្រយោជន៍ជាតិរៀងៗខ្លួន៕

ដោយ៖ ធឿន វ៉ាន់សុង