ព័ត៌មានជាតិ

ព្រលានយន្តហោះតេជោក្រុងតាខ្មៅ សម្រេចការសាងសង់បានជាង ៤០ ភាគរយ

បានផុស

៣ years មុន

នៅ

ថ្ងៃព្រហស្បតិ៍ ៣០ មីនា ២០២៣

ដោយ

គម្រោងព្រលានយន្តហោះថ្មីនៅក្នុងស្រុកកណ្តាលស្ទឹងខេត្តកណ្តាល សម្រេចការសាងសង់បានជាង ៤០ ភាគរយ។

ឆ្លើយទៅសំនួររបស់កម្ពុជាថ្មីនៅក្នុងសន្និសីទជោគជ័យរយៈពេល ៥ ឆ្នាំនៅព្រឹកមិញនេះ លោក នូវប៉េង ច័ន្ទតារា អភិបាលរងខេត្តកណ្តាលបានបញ្ជាក់ថា គម្រោងសាងសង់ព្រលានយន្តហោះតេជោនៅស្រុកកណ្ដាលស្ទឹង វឌ្ឍនភាពគិតមកដល់ពេលនេះសម្រេចបាន ៤៤,៣ ភាគរយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកជុំវិញការដោះស្រាយទំនាស់ដីពាក់ព័ន្ធគម្រោងអភិវឌ្ឍព្រលាន លោក នូវប៉េង ច័ន្ទតារា បានបញ្ជាក់ថា លើផ្ទៃដីសរុប ២៦០០ ហិកតា សម្រេចបាន ៦៣,១ ភាគរយ ស្មើ ១៦៤០ ហិកតា។ ក្នុងនោះដីដែលត្រូវដោះស្រាយបន្តជាមួយប្រជាពលរដ្ឋមានជាង ៣០២ ហិតា ត្រូវ ១១%។

លោកលើកឡើងថា ទិដ្ឋភាពដីនៅគម្រោងអភិវឌ្ឍព្រលានថ្មីនេះបែងចែកជាពីរ មួយដីទិញដោយក្រុមហ៊ុននិងមួយទៀតជាដីរូបវន្តបុគ្គលដែលពលរដ្ឋគ្រប់គ្រង។ ដីដែលគ្រប់គ្រងដោយក្រុមហ៊ុនមិនពិបាកដោះស្រាយទេដែលសរុបមានជាង ៦៥៧ ហិកតា ត្រូវ ២៥,២៦%។ អ្វីត្រូវដោះស្រាយបន្តជាមួយប្រជាពលរដ្ឋលើទំហំដីជាង ៣០២ ហិកតា ដោយអាជ្ញាធរកំពុងព្យាយាមរកដំណោះស្រាយ ដោយមានការដឹកនាំសម្របសម្រួលពីក្រសួងដែនដីនគរោបនីយកម្មនិងសំណង់។

ជាមួយគ្នានេះទាក់ទងគម្រោងអភិវឌ្ឍព្រលានយន្តហោះតេជោក្រុងតាខ្មៅ លោក នូវប៉េង ច័ន្ទតារា បានបញ្ជាក់បន្ថែមថា ក៏ត្រូវមានការសាងសង់ផ្លូវតភ្ជាប់ផងដែរ។ បើតាមអភិបាលរងនិងក៏ជាអ្នកនាំពាក្យសាលាខេត្តកណ្តាលផងនោះ ផ្លូវចូលព្រលានដែលតភ្ជាប់ផ្លូវជាតិលេខ ២ និងពីមហាវិថីសម្តេចតេជោដែលមានប្រវែង ១៣,៥ គីឡូម៉ែត្របច្ចុប្បន្នសម្រេចបានជាង ៣៥ ភាគរយ។

«អាកាសយានដ្ឋានអន្តរជាតិតេជោក្រុងតាខ្មៅ» បានដំណើរការសាងសង់ជាង ២ ឆ្នាំ ដែលចាយទុនវិនិយោគជិត ២ ពាន់លានដុល្លារ។ ព្រលានយន្តហោះតេជោក្រុងតាខ្មៅគ្រោងបញ្ចប់ដំណាក់កាលទី ១ នៅឆ្នាំ២០២៤ និងដាក់ឲ្យដំណើរការនៅឆ្នាំ២០២៥។

ព្រលានយន្តហោះកម្រិត 4F នឹងប្រើប្រាស់ជំនួសព្រលានយន្តហោះអន្តរជាតិភ្នំពេញ ខណៈវិសាលភាពព្រលានថ្មីមានភាពធំទូលាយអាចកម្រិតយន្តហោះធំៗចុះចតបាន។

អាកាសយានដ្ឋានអន្តរជាតិតេជោនៅខេត្តកណ្តាល សាងសង់នៅលើទំហំ ២៦០០ហិកតា ដែលមានភូមិសាស្ត្រនៅក្នុងខេត្តកណ្តាលជាប់ខេត្តតាកែវ និងមានចម្ងាយប្រមាណ ២០ គីឡូពីរាជធានីភ្នំពេញ៕