ព័ត៌មានអន្ដរជាតិ

ថៃ នៅតែអះអាងថា ទាហានជាន់មីនលើដីខ្លួនឯង ចុះហេតុអ្វីមកចោទកម្ពុជា?

បានផុស

១ year មុន

នៅ

ថ្ងៃសុក្រ ១៨ កក្កដា ២០២៥

ដោយ

កាលពីថ្ងៃពុធទី១៦ខែកក្កដាឆ្នាំ២០២៥ ទាហានថៃ៣នាក់បានដើរជាន់មីនពេលកំពុងល្បាតនៅតំបន់មុំបី បណ្តាលឲ្យរងរបួសក្នុងនោះមានម្នាក់ដាច់ជើង។

ថៃអះអាងតែឯងថា ទាហានទាំងនោះកំពុងល្បាតនៅលើទឹកដីរបស់ខ្លួនក្នុងខេត្ត Ubon Ratchathani ហើយឥឡូវ បានបើកការស៊ើបអង្កេតហើយ ដោយបង្វែរមកចោទប្រកាន់លើកម្ពុជាទៅវិញ។

ជុំវិញហេតុការណ៍នេះ ភូមិភាគ២ថៃ បានស្នើឲ្យអង្គភាពដោះគ្រាប់មីន ឆែកមើលតំបន់នោះដើម្បីបញ្ជាក់ច្បាស់ថាតើមីននេះជាមីនចាស់ឬមីនថ្មី ហើយលទ្ធផលនៃការស៊ើបអង្កេតនឹងដឹង ក្នុងរយៈពេលយ៉ាងយូរ៣ថ្ងៃ។

ថៃនៅតែអះអាងតែម្ខាងថា ហេតុការណ៍ផ្ទុះមីនគឺកើតឡើងនៅក្នុងដីរបស់ខ្លួន។ យ៉ាងណា ឆ្លើយតបទៅលើរឿងនេះ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានចោទជាសំណួរថា តើការផ្ទុះគ្រាប់មីននោះ ក្នុងទឹកដីរបស់អ្នកណា ? បើសិនជាក្នុងទឹកដីសៀម គ្រាប់មីនចាស់ ឬថ្មី មានតែខាងសៀមខ្លួនឯងទេ ទើបដឹងច្បាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់ពីអង្គភាពកម្ចាត់មីននៃប្រទេសថៃ, កន្លែងដែលទាហានខ្លួនជាន់មីនដាច់ជើង គឺជាតំបន់ដែលបោសសម្អាតមីនរួចហើយ ហើយពួកគេបានដាក់ព័ស្តុងតាងនៅក្នុងរបាយការណ៍ វាជាមីនទើបបង្កប់ថ្មីៗប្រភេទ PMN-2។

របាយការណ៍នេះបានបង្ហាញពីភាពត្រឡប់ត្រឡិនផ្ទុយគ្នាទៅនឹងការបញ្ជាក់ពីមេភូមិភាគ២ថៃ Boonsin Phadklang ដែលនិយាយថា គ្រាប់មីនដែលទាហានខ្លួនជាន់នៅតំបន់មុំ៣ គឺជាគ្រាប់ដែលសល់ពីសម័យសង្គ្រាម។

យ៉ាងណា នៅថ្ងៃព្រហស្បតិ៍ទី១៧ខែកក្កដាឆ្នាំ២០២៥ អង្គភាពបានចេញរបាយការណ៍ថា គ្រាប់មីននេះជាមីនប្រឆាំងមនុស្សប្រភេទថ្មី ដែលផលិតដោយរុស្ស៊ី ហើយពិបាករាវរកណាស់៕

អត្ថបទ៖ សុខ សុវណ្ណ

ចុចអាន៖ មកស្គាល់គ្រាប់មីន PMN-2 ដែលថៃអះអាងថា ទាហានខ្លួនជាន់ដាច់ជើង