ព័ត៌មានជាតិ

ជនជាតិដើមភាគតិច រស់នៅខេត្តមណ្ឌលគិរីមានចំនួនជាង ៥ម៉ឺននាក់ មាន ៨ជនជាតិ

បានផុស

១២ ខែ មុន

នៅ

ថ្ងៃព្រហស្បតិ៍ ៦ មេសា ២០២៣

ដោយ

ពលរដ្ឋជនជាតិដើមភាគតិចរស់នៅខេត្តមណ្ឌលគិរី បច្ចុប្បន្នមានចំនួនជាង ៥ម៉ឺន ៣ពាន់នាក់ ស្មើនឹង ៥៥ភាគរយ នៃប្រជាពលរដ្ឋសរុបក្នុងខេត្ត។ នេះបើតាមការបញ្ជាក់របស់លោក ស៊ន សារុន អភិបាលរងខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ស៊ន សារុន ពលរដ្ឋជនជាតិដើមភាគតិច ដែលកំពុងរស់នៅក្នុងខេត្តមណ្ឌលគិរី មានចំនួន ៨ជនជាតិ រួមមាន ជនជាតិព្នង ក្រោល ក្រឹង ស្ទៀង ទំពួន ចារ៉ាយ ថ្មូន និងគួយ។

ប្រធានមន្ទីរអប់រំ ខេត្តមណ្ឌលគិរី លោក ទឹម សង្វាត បានលើកឡើងថា ជនជាតិដើមភាគតិច បានចូលរៀន នៅថ្នាក់បឋមសិក្សាមានប្រមាណ ៨៤ភាគរយ ក្នុងចំណោមជនជាតិភាគតិចសរុបជាង ៥ម៉ឺននាក់។

សូមបញ្ជាក់ថា នៅក្នុងប្រទេសកម្ពុជា មានជនជាតិដើមភាគតិចចំនួន ២៤ អំបូរ ដោយពីមុនពួកគេរស់នៅប្រកបរបរធ្វើស្រែវិលជុំបែបបុរាណ តែឥឡូវបានប្រែក្លាយធ្វើកសិកម្មមួយកន្លែង រួមទាំងការរស់នៅ ស្លៀកពាក់ដូចជាអ្នកស្រុកកណ្តាលដែរ និងធ្វើការដោះដូរទំនិញ ដោយប្រើប្រាស់ការចាយវាយប្រាក់រៀល។

បើយោងតាមសៀវភៅគោលនយោបាយអភិវឌ្ឍន៍ជនជាតិដើមភាគតិច ដោយក្រសួងអភិវឌ្ឍន៍ជនបទ ជនជាតិភាគតិចបច្ចុប្បន្ន នៅលើពិភពលោកមានចំនួនប្រមាណជាង៣៧០លាននាក់ ដែលរស់នៅជាង៧០ប្រទេស។ ចំណែកក្នុងប្រទេសកម្ពុជា មានជនជាតិដើមភាគតិចរស់នៅ ១៥ខេត្តក្រុង មានដូចជា ខេត្តរតនគិរី មណ្ឌលគិរី ព្រះវិហារ កំពង់ធំ ក្រចេះ ស្ទឹងត្រែង ពោធិ៍សាត់ បាត់ដំបង កំពង់ស្ពឺ ព្រះសីហនុ កោះកុង កំពង់ចាម សៀមរាប បន្ទាយមានជ័យ និងឧត្តរមានជ័យ ដោយមានអំបូរជនជាតិភាគតិចផ្សេងៗគ្នា ដូចជា គួយ ព្នង ទំពួន ច្រាយ កាចក់ គ្រឹង ព្រៅ កាវែត លុន ស្នៀង ក្រោល មិល សួយ ព័រ ខោញ ជង ស្អូច ថ្មូន ខិ រអង ស្ពុង ល្អឺន រដែ និងសំរែ ជាដើម៕