អាជ្ញាធរខេត្តមណ្ឌលគិរី សង់ផ្ទះគំរូជនជាតិដើមភាគតិចចំកណ្តាលក្រុងដើម្បីស្វាគមន៍ភ្ញៀវទេសចរមកលេងចូលឆ្នាំខ្មែរ

ដើម្បីអបអរសាទរក្នុងឱកាស ពិធីបុណ្យចូលឆ្នាំប្រពៃណីជាតិខ្មែរ ដែលនឹងមកដល់នាពេលខាងមុខ អាជ្ញាធរបានចាប់ផ្តើមសាងសង់ផ្ទះគំរូវប្បធម៌ជនជាតិភាគតិចព្នង ដើម្បីបង្ហាញជូនភ្ញៀវទេសចរដែលមកកម្សាន្តក្នុងខេត្តមណ្ឌលគិរី។

លោក ហៀក សុផាន អភិបាល ក្រុងសែនមនោរម្យ បានប្រាប់ «កម្ពុជាថ្មី» នៅថ្ងៃទី២៣ ខែមីនា ឆ្នាំ២០២៦ ថា ដើម្បីឲ្យភ្ញៀវទេសចរយល់ដឹងកាន់តែច្បាស់អំពីលំនៅឋាន វប្បធម៌ និងជីវភាពរស់នៅប្រចាំថ្ងៃរបស់បងប្អូនជនជាតិដើមភាគតិចព្នង នៅតំបន់ភូមិភាគឦសាន ជាពិសេសក្នុងឱកាសបុណ្យចូលឆ្នាំខ្មែរ ក្រុមការងារបានចាប់ផ្តើមសាងសង់ផ្ទះឬស្សីប្រក់ស្បូវ ដែលមានអត្តសញ្ញាណជនជាតិដើម។ ផ្ទះនេះស្ថិតនៅលើសួនក្បែរង្វង់មូលគោព្រៃ ក្នុងក្រុងសែនមនោរម្យ ខេត្តមណ្ឌលគិរី។

លោកបានបន្តថា ការសាងសង់ផ្ទះជនជាតិដើមនេះ ជាគំនិតផ្តួចផ្តើមរបស់លោក ថង សាវុន អភិបាលខេត្តមណ្ឌលគិរី ក្នុងគោលបំណងបង្ហាញជូនភ្ញៀវទេសចរជាតិ និងអន្តរជាតិ ដែលមកកម្សាន្តនៅខេត្តមណ្ឌលគិរី ឲ្យបានស្គាល់កាន់តែច្បាស់អំពីវប្បធម៌ ប្រពៃណី និងទំនៀមទំលាប់នៃការរស់នៅពីបុរាណរហូតដល់បច្ចុប្បន្នរបស់ជនជាតិដើមភាគតិចព្នង។ ព្រមទាំងអាចថតរូបទិដ្ឋភាពជាក់ស្តែង និងសិក្សាស្វែងយល់អំពីអត្តសញ្ញាណវប្បធម៌ដែលមានវត្តមាននៅតំបន់ភូមិភាគឦសាននេះជាយូរលង់មកហើយ។

បន្ថែមពីនេះ ការសាងសង់នៅចំកណ្ដាលក្រុងមានគោលបំណងផ្ដល់ភាពងាយស្រួលដល់ភ្ញៀវទេសចរ ក្នុងការស្វែងរក និងទស្សនាផ្ទះវប្បធម៌ជនជាតិដើម ដោយមិនចាំបាច់ចំណាយពេលធ្វើដំណើរទៅដល់សហគមន៍ដើមរបស់ពួកគេ។

បើតាមអភិបាលក្រុងរូបនេះ នៅពេលខាងមុខក្រុមការងារខេត្តគ្រោងនឹងសាងសង់ផ្ទះវប្បធម៌ជនជាតិដើមភាគតិចព្នងរហូតដល់ ៥ ខ្នង ដើម្បីបង្ហាញជូនភ្ញៀវទេសចរឲ្យយល់ដឹង និងស្គាល់អំពីវប្បធម៌ជនជាតិដើមភាគតិច។ ទោះយ៉ាងណា ក្នុងដំណាក់កាលដំបូងនេះ គ្រោងសាងសង់តែ ១ ខ្នងជាមុនសិន ហើយនឹងបន្តសាងសង់បន្ថែមជាបន្តបន្ទាប់នៅពេលក្រោយ។

អ្វីដែលសំខាន់ គឺនៅពេលដែលមហាជន និងភ្ញៀវទេសចរមានការគាំទ្រកាន់តែច្រើន តំបន់នេះនឹងត្រូវអភិវឌ្ឍឲ្យក្លាយជាភូមិវប្បធម៌ជនជាតិដើមភាគតិចមួយ ដើម្បីផ្តល់ឱកាសឲ្យប្រជាពលរដ្ឋជាជនជាតិដើមតាមសហគមន៍ អាចផលិត និងកែច្នៃផលិតផលប្រចាំតំបន់ ដាក់តាំងបង្ហាញ និងលក់ជូនភ្ញៀវទេសចរ។

លោក ហៀក សុផាន បញ្ជាក់ថា៖«នេះជាចក្ខុវិស័យរបស់រដ្ឋបាលខេត្តមណ្ឌលគិរី ក្នុងការបង្ហាញសក្ដានុពលវិស័យទេសចរណ៍ នឹងបន្តអភិវឌ្ឍសមិទ្ធផលពាក់ព័ន្ធនឹងវប្បធម៌ប្រពៃណីជនជាតិដើមភាគតិច ដើម្បីទាក់ទាញភ្ញៀវទេសចរជាតិ និងអន្តរជាតិ មកទស្សនាកម្សាន្ត និងយល់ដឹងអំពីខេត្តនេះឲ្យកាន់តែច្បាស់ផងដែរ»៕

ដោយ៖ រៀម សុខហេង