គម្រោង ILO-CHINA ជំរុញការអនុវត្តឌីជីថលក្នុងវិស័យ TVET និងការអភិវឌ្ឍក្រសួងស្ថាប័ន

មន្ត្រីជាន់ខ្ពស់ ក្រសួងការងារ និងបណ្តុះបណ្តាលវិជ្ជាជីវៈ លើកឡើងថា គម្រោងភាពជាដៃគូអង្គការអន្តរជាតិខាងការងារ ប្រទេសចិន ស្តីពី ការពង្រឹងការអភិវឌ្ឍជំនាញក្នុងប្រទេសកម្ពុជា ឡាវ និងមីយ៉ាន់ម៉ា តាមរយៈកិច្ចសហប្រតិបត្តិការត្បូង ត្បូង និងត្រីកោណ (ILO-CHINA) នឹងជំរុញដល់ការអនុវត្តឌីជីថលក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) និងគាំទ្រដល់ការអភិវឌ្ឍជំនាញតាមក្រសួង ស្ថាប័ន វិស័យឯកជន និងអ្នកពាក់ព័ន្ធនានា។

ថ្លែងក្នុងកិច្ចប្រជុំលើកទី២ របស់គណៈកម្មការប្រឹក្សាគម្រោង នៃគម្រោងភាពជាដៃគូអង្គការអន្តរជាតិខាងការងារ ប្រទេសចិន ស្តីពី ការពង្រឹងការអភិវឌ្ឍជំនាញក្នុងប្រទេសកម្ពុជា ឡាវ និងមីយ៉ាន់ម៉ា តាមរយៈកិច្ចសហប្រតិបត្តិការត្បូង ត្បូង និងត្រីកោណ (ILO-CHINA) នៅថ្ងៃទី២៥ ខែមេសានេះ លោក ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំបណ្តុះបណ្តាលបច្ចេកទេសនិងវិជ្ជាជីវៈ និងជាប្រធានគណៈកម្មការប្រឹក្សាគម្រោងជាដៃគូអង្គការអន្តរជាតិខាងការងារ-ប្រទេសចិន ស្តីពី ការពង្រឹងការអភិវឌ្ឍជំនាញក្នុងប្រទេសកម្ពុជា ឡាវ និងមីយ៉ាន់ម៉ា តាមរយៈកិច្ចសហប្រតិបត្តិការ ត្បូង និងត្រីកោណ បានមានប្រសាសន៍ថា តាមរយៈគម្រោងនេះនឹងមានសកម្មភាពសំខាន់ៗមួយចំនួន ដូចជាការ រៀបចំអភិវឌ្ឍកម្មវិធីសិក្សាបែបចម្រុះចំនួន ៤មុខរបរ ដោយមាន ៣មុខរបរក្នុងវិស័យសំណង់ និង១មុខរបរក្នុងវិស័យទេសចរណ៍ ក្នុងការចូលរួមការអនុវត្តកម្មវិធីហ្វឹកហ្វឺនកូនជាង, គាំទ្រក្នុងការពង្រីកការអនុវត្តគោលនយោបាយជាតិស្តីពីមុខរបរ និងការងារ និងបានកសាងសមត្ថភាពរបស់ភាគីសហជីព និងការចូលរួមផ្តល់ធាតុចូលចំពោះពង្រាងច្បាប់ស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈជាដើម។

លោកបានបន្តទៀតថា គម្រោងនេះ មានសារៈសំខាន់ណាស់ក្នុងការចូលរួមពង្រឹងធនធានមនុស្ស និងការភ្ជាប់ទំនាក់ទំនងជាមួយគ្រឹះស្ថានអប់រំ បណ្តុះបណ្តាលបច្ចេកទេស និងវិជ្ជាជីវៈ នៅក្នុងតំបន់សម្រាប់ដោះស្រាយបញ្ហានានា និងការអភិវឌ្ឍជំនាញដើម្បីលើកកម្ពស់ភាពមានការងារធ្វើរបស់និយោជិក និងបង្កើនផលិតភាពរបស់សហគ្រាសតាមរយៈការធ្វើឱ្យប្រសើរឡើងលើសេវាមុខរបរ ការអភិវឌ្ឍជំនាញ និងការកសាងសមត្ថភាពស្ថាប័ន។

លោក លីវ យ៊ូតុង នាយកគម្រោងភាពជាដៃគូអង្គការអន្តរជាតិខាងការងារ-ប្រទេសចិន បានឱ្យដឹងថា គម្រោងខាងលើនេះ ដើម្បីចូលរួមចំណែកឱ្យយុវជនគ្រប់រូបមានមុខរបរ ឬជំនាញមួយសមរម្យ និងច្បាស់លាស់ដែលឆ្លើយតបទៅនឹងតម្រូវការទីផ្សារការងារ ហើយនឹងរួមចំណែកក្នុងការកាត់បន្ថយភាពក្រីក្រក្នុងប្រទេសកម្ពុជា។ លោកបន្ថែមថា ផែនការសកម្មភាពឆ្នាំ២០២៣ របស់គម្រោងនេះ ផ្តោតលើ ៣ផ្នែកសំខាន់ៗ រួមមាន៖ ការពង្រឹងទៅលើការអភិវឌ្ឍជំនាញនៅកម្ពុជា, ការពង្រឹង និងពង្រីកផ្នែកសេវាកម្មការងារសាធារណៈ និងការពង្រីកបណ្តាញសាលាបណ្តុះបណ្តាលវិជ្ជាជីវៈជាមួយសាលាក្នុងប្រទេសចិន និងបណ្តាប្រទេសក្នុងអាស៊ាន៕

អត្ថបទ៖ សំអឿន