គណៈកម្មការផ្សារធំថ្មី ចែកបណ្ណសមធម៌ ដល់អាជីវករលក់តាមកញ្ច្រែងល្អី ជាង ១៥០ នាក់

លោក ឃួង ស្រេង អភិបាល នៃគណៈអភិបាលរាជធានីភ្នំពេញ តែងបានណែនាំ គណៈកម្មការផ្សាររដ្ឋទាំង២៥ នៅរាជធានីភ្នំពេញ ពិនិត្យ និងអនុវត្តការងារអោយបានល្អប្រសើរជុំវិញ ការមិនយកលុយពីបងប្អូនអាជីវករលក់តាមកញ្ច្រែងល្អី និងការផ្តល់បណ្ណមូលនិធិសមធម៌សុខាភិបាលជូនពួកគាត់ ទៅតាមអនុសាសន៍របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ជាក់ស្តែងមកដល់ពេលនេះ គណៈកម្មការផ្សាររដ្ឋទាំង២៥ នៅរាជធានីភ្នំពេញ អនុវត្តការងារខាងលើបានល្អ ទាំងការមិនយកលុយពីបងប្អូនអាជីវករលក់តាមកញ្ច្រែងល្អី និងការផ្តល់បណ្ណមូលនិធិសមធម៌សុខាភិបាល។

លោក ស្រី ប៉ុន ដានី អភិបាលរដ្ឋាករស្វយ័តផ្សារធំថ្មី មានប្រសាសន៍ឱ្យដឹងនៅរសៀល ថ្ងៃទី២៧ ខែឧសភានេះថា អនុវត្តតាមការណែនាំរបស់អភិបាល នៃគណៈអភិបាលរាជធានីភ្នំពេញ គណៈកម្មការផ្សារធំថ្មី បានស្នេីសុំបណ្ណសមធម៌សុខាភិបាល ដើម្បីចែកជូនបងប្អូនអាជីវករលក់តាមកញ្ច្រែងល្អី សរុប ២២៦ នាក់ ដោយក្នុងនោះលេីកទីមួយ ស្នើសុំចំនួន ៩៩ នាក់ លេីកទីពីរចំនួន ៦០ នាក់ និងលេីកទីបីចំនួន ៦៧ នាក់ ដោយបានទទួល និងប្រគល់ជូនពួកគាត់ចំនួន ១៥៧ នាក់។

រដ្ឋបាលរាជធានីភ្នំពេញ បានធ្វើពិធីប្រគល់បណ្ណមូលនិធិសមធម៌សុខាភិបាលជូនគណៈកម្មការផ្សាររដ្ឋទាំង២៥ នៅរាជធានីភ្នំពេញ កាលពីថ្ងៃទី២៤ ឧសភាកន្លងមកនេះ ដើម្បីឱ្យគណៈកម្មការផ្សាររដ្ឋទាំង២៥ បន្តចែកជូនអាជីវករលក់តាមកញ្ច្រែងល្អី ឱ្យបានគ្រប់ចំនួន។

គួរបញ្ជាក់ថា បណ្ណមូលនិធិសមធម៌សុខាភិបាល ចែកជូនក្រុមអាជីវករមានជីវភាពខ្វះខាត ក្នុងគោលដៅសម្រាប់ការប្រើប្រាស់លើការទៅពិនិត្យព្យាបាលជំងឺ និងថែទាំសុខភាព នៅ តាមមន្ទីរពេទ្យបង្អែក ឬមន្ទីរពេទ្យរដ្ឋទាំងអស់ ដោយពុំគិតប្រាក់។ ក្រុមអាជីវករ បានបង្ហាញអារម្មណ៍ និងទឹកចិត្តយល់ឃើញថា នេះគឺជាការគិតគូរយកចិត្តទុកដាក់ក្នុងការផ្តល់ ជូនពួកគាត់ទាំងអស់គ្នានូវបណ្ណមូលនិធិសមធម៌សុខាភិបាល ដោយបានចូលរួមសម្រួលកាត់បន្ថយការចំណាយប្រាក់កាសក្នុងការពិនិត្យ ថែទាំ និងព្យាបាលជំងឺ៕

អត្ថបទ៖ ស្រីរ័ត្ន