អភិបាលរងខេត្តប៉ៃលិន៖ ការអប់រំបណ្តុះបណ្តាលបច្ចេកទេស និងវិជ្ជាជីវៈ ដើរតួនាទីសំខាន់ក្នុងការអភិវឌ្ឍសេដ្ឋកិច្ចជាតិ

លោក ម៉ើង លីដា អភិបាលរងខេត្តប៉ៃលិន នៅថ្ងៃទី១៥ ខែមិថុនា ឆ្នាំ២០២៣នេះ បានមានប្រសាសន៍ថា ការអប់រំបណ្តុះបណ្តាលបច្ចេកទេស និងវិជ្ជាជីវៈ ដើរតួនាទីសំខាន់ណាស់នៅក្នុងការអភិវឌ្ឍសេដ្ឋកិច្ចសង្គមរបស់ប្រទេសជាតិ ព្រមទាំងការបង្កើតចំណេះដឹង និងទទួលបានការងារធ្វើកាន់តែល្អ និងការជំរុញលើកកម្ពស់ជីវភាពកាន់តែប្រសើរឡើង
សម្រាប់ដល់ប្រជាពលរដ្ឋម្នាក់ៗ។

លោកអភិបាលរងខេត្តបានថ្លែងបែបនេះ នៅក្នុងកម្មវិធីប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើក​ទី៦ ឆ្នាំ២០២៣ ក្រោមប្រធានបទ “TVET”។

នៅក្នុងឱកាសនោះដែរ លោក ម៉ើង លីដា មានប្រសាសន៍ថា ទិវានេះរៀបចំឡើងដើម្បីចូលរួមសម្រេចឱ្យបានចក្ខុវិស័យ របស់រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការអភិវឌ្ឍធនធានមនុស្ស ជាពិសេសការកសាងបាននូវកម្លាំងពលកម្មជំនាញដែលមានជំនាញវិជ្ជាជីវៈច្បាស់លាស់ គំនិតច្នៃប្រឌិត និងភាពប្រកួតប្រជែងខ្ពស់ និងដើម្បីធានាថា “យុវជនម្នាក់មានជំនាញមួយយ៉ាងតិចប្រចំាជីវិត”។

លោកអភិបាលរងខេត្ត​ ក៏បានកោតសរសើរ និងវាយតម្លៃខ្ពស់ចំពោះមន្ទីរការងារ មជ្ឍមណ្ឌលបណ្តុះបណ្តាលវិជ្ជាជីវៈខេត្តប៉ៃលិន អង្គភាពពាក់ព័ន្ធ សហគ្រាស ក្រុមហ៊ុន ក៏ដូចជាដៃគូអភិវឌ្ឍន៍នានា ដែលបានសហការ និងចូលចូលរួមអបអរសាទរ ទិវាជាតិអប់រំបណ្តុះបណ្តាល បច្ចេកទេស និងវិជ្ជាជីវៈ លើកទី៦ ឆ្នាំ២០២៣ ដែលសកម្មភាពនេះ បានសបញ្ជាក់ពីការយកចិត្តទុកដាក់ និងសហការគ្នាយ៉ាងខ្លាំងរបស់ក្រសួង ស្ថាប័ន អង្គភាព ភាគីពាក់ព័ន្ធនានា មកលើវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ។ ទន្ទឹមនឹងនេះ រដ្ឋបាលខេត្ត និងមន្ទីរការងារ និងមជ្ឍមណ្ឌលបណ្ដុះបណ្ដាលវិជ្ជាជីវៈកំពុងតែសម្រេចបាននូវសមិទ្ធផលជាច្រើន តាមផែនការយុទ្ធសាស្ត្រអភិវឌ្ឍវិស័យការងារ និងបណ្តុះបណ្តាលវិជ្ជាជីវៈឆ្នាំ២០១៩-២០២៣ បើទោះបីជាកំពុងប្រឈមនូវវិបត្តិជំងឺកូវីដ-១៩ ក៏ដោយ ក៏រដ្ឋបាលខេត្ត និងក្រសួង
នៅតែបន្តការជំរុញ “ការធ្វើទំនើបកម្មប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ” ជាបន្តបន្ទាប់ផងដែរ។

សូមបញ្ជាក់ថា បើតាមរបាយការណ៍របស់លោកស្រី យឿន ចាន់ឌី នាយិកាស្តីទីមជ្ឈមណ្ឌលបណ្តុះបណ្តាលវិជ្ជាជីវៈខេត្តប៉ៃលិន​ បានឲ្យដឹងថា ក្នុងឆ្នាំ២០២២មានសិស្សចូលរៀនសរុប៩៣៥នាក់ ស្រី ៥៤៣ នាក់ ។ ចំណែកនៅក្នុងឆ្នាំ ២០២៣ មានសិស្សចូលរៀនសរុប ៥៥៨ នាក់ ស្រី ២០៤ នាក់ ក្នុងនោះចែកចេញជាកម្រិតសញ្ញាបត្រដូចជា កម្រិតសញ្ញាបគ្របច្ចេកទេស និងវិជ្ជាជីវៈ១(C១) មានសិស្សសរុប ៤១នាក់ ស្រី ២០ នាក់មានដូចខាងក្រោម៖

កម្រិតសញ្ញាបត្របច្ចេកទេស និងវិជ្ជាជីវៈ២(C២) មានសិស្សសរុប ១០០នាក់ ស្រី ៤៤ ផងដែរ៕

អត្ថបទ៖ សេង សុវណ្ណារិទ្ធ