មកស្គាល់ហាងកាហ្វេ ៥ នៅភ្នំពេញ អាចឱ្យយើងចំណាយពេលសោយសុខនឹងការអាន

ហាងកាហ្វេ បានក្លាយជាទីពេញនិយម សម្រាប់មនុស្សសម័យសតវត្សទី២១ ដែលគេច្រើនទុកជាកន្លែងជួបជុំពិភាក្សា ធ្វើការ ពិសេសសិស្ស-និស្សិតបានចាត់ទុកហាងកាហ្វេ ជាថ្នាក់រៀនក្រៅម៉ោងទៀតផង។ ដោយសារតែបែបនេះ បច្ចុប្បន្ន ការបើករបរហាងកាហ្វេ ពេញនិយមខ្លាំងណាស់ ហើយមានច្រើនបំផុត គឺក្នុងក្រុងភ្នំពេញតែម្តង។

យ៉ាងណាមិញ ថ្វីបើជម្រើសហាងកាហ្វេមានច្រើន តែបរិយាកាសនិងភាពទាក់ទាញ រឹតតែសំខាន់ទន្ទឹមនឹងរសជាតិដែរ ព្រោះអ្នកខ្លះ​ បានចំណាយពេលច្រើនម៉ោងនៅទីនោះ។ បើក្រឡេកមកមើលហាងកាហ្វេមួយចំនួន ក្រៅពីផ្តោតលើអាជីវកម្ម ថែមទាំងបានរួមចំណែកក្នុងការលើកស្ទួយនូវការអាននៅកម្ពុជាផងដែរ ដោយការរៀបចំឱ្យមានសៀវភៅក្នុង ហាងរបស់ខ្លួន អាចអានដោយសេរី។ តើហាងកាហ្វេណាខ្លះ ដែលយើងអាចស្វែងរកការអានបាន?

១. វិទ្យាល័យ​កាហ្វេ
គ្រាន់តែបានឃើញខ្លោងទ្វារដើរចូលហាង ក្រាលដោយឥដ្ឋថ្នាក់រៀនសម័យមុន ឈ្មោះ រួមនឹងបរិយាកាសនៅទីនេះ ក៏ធ្វើឱ្យយើងនឹកដល់ពេលវេលាមួយដែលកន្លងផុតទៅបាត់ទៅហើយ គឺអំឡុងពេលដែលយើងប្រើពេលវេលាជាសិស្ស។
ឯ​ការ​រៀប​ចំ​នៅ​ខាង​ក្នុង គឺគេប្រើបែបផែនស្រដៀងនឹងថ្នាក់រៀនយ៉ាងដូច្នេះដែរ សូម្បីតែតុអង្គុយជាដើម​។ នៅទី​នេះ​​មានសៀវភៅជាច្រើនប្រភេទ ទាំងចំណេះដឹងជាភាសាបរទេស ភាសាខ្មែរ រួមនឹងប្រលោមលោទៀតផង។ គួរបញ្ជាក់ថា ទីតាំងហាងកាហ្វេមួយនេះ ស្ថិតនៅសង្កាត់បឹងកក់១ ខណ្ឌទួលគោក។

២. កាហ្វេស្វាង និងហាងសៀវភៅ​ – Swarng Café and Bookstore
មិនត្រឹមតែអាចទួលទានភេសជ្ជៈ អាហារឆ្ងាញ់ៗ ជាមួយនឹងការតុបតែងគួរឱ្យទាក់ទាញ ដែលរួមបញ្ចូលដោយសៀវភៅ សម្រាប់អានសម្បូរបែប និងថែមទាំងអាចទិញសៀវភៅជាច្រើនប្រភេទ រួមមានប្រលោមលោក និងការអប់រំផ្សេងៗ​ ដែលមានដាក់លក់ទៀតផង។ កាហ្វេស្វាង និងហាងសៀវភៅ​ (Swarng Café and Bookstore) នេះ​ ស្ថិតនៅ​សង្កាត់​ជ័យជំនះ​ ​ខណ្ឌ​ដូនពេញ​ ​ចម្ងាយប្រមាណ ២គីឡូម៉ែត្រ​ពីវត្តភ្នំ។

៣. ខូ កាហ្វេ – CO- Creative Corners
មិនសូវជាខុសគ្នានឹងទីតាំងខាងលើប៉ុន្មានដែរ ហាងកាហ្វេមួយនេះ មានលក់ជូនទាំងភេសជ្ជៈនិងអាហារ និងមានរៀបចំ សៀវភៅជាច្រើន អាចអានដោយសេរី ដែលក្នុងនោះមានទាំងសៀវភៅជាភាសាបរទេសទៀតផង។ ជាមួយ​ទីតាំងធំទូលាយ ដែលរចនាឡើងប្រកបដោយភាពច្នៃប្រឌិត រួមនឹងបរិយាកាសនៅក្នុងហាងកាហ្វេផ្ទាល់ ទីនេះអាចទុកថាជាកន្លែង​ល្អ​មួយ សម្រាប់​ជួប​ជុំ​ពិភាក្សា មិនថាការងារ ឬការសិក្សានោះទេ។ ខូ កាហ្វេ មានទីតាំងនៅខណ្ឌទួលគោក និងអាគារ FunMall ។

៤. Lightbrary Coffee
បរិយាកាសដ៏ល្អដែលផ្តល់ជូនដោយហាងកាហ្វេមួយនេះ យើងអាចចំណាយពេលសោយសុខនឹងការអាន និងទទួល​ទាន​ភេសជ្ជៈតាម​ចំណង់​ចំណូលចិត្ត ដោយមិនធុញទ្រាន់ឡើយ។ ហាងកាហ្វេនេះ​ មានទីតាំងនៅសង្កាត់បឹងត្របែក ខណ្ឌចំការមន រាជធានីភ្នំពេញ​។

៥. ក្លេអូកាហ្វេ និងហាងសៀវភៅ – CLÉO Café and BookstoreBook
នៅខាងក្រោយផ្សារទំនើប Aeon2 សែនសុខ ហាងកាហ្វេដែលមាន​ការ​តុបតែង​បែប​ស៊ីវិល័យ ជាមួយ​បរិយាកាសអង្គុយ ទូលាយនៃជាន់ខាងលើ លម្អដោយទូដាក់សៀវភៅរាប់សិប យើងអាចអានដោយសេរី។ ឯផ្នែកខាងក្រោម ក៏មានសៀវភៅ​ជាច្រើន​ប្រភេទ សម្រាប់​អ្នក​ដែល​មាន​បំណង​ចង់​ទិញ​ផង​ដែរ៕